UJeremiya 14 - Ndebele Contemporary Bible 2022

Ukoma, Indlala, Inkemba

1Leli yilizwi likaThixo elafika kuJeremiya mayelana lokoma elizweni lisithi:

2“UJuda uyalila,

amadolobho akhe ayahlupheka;

alilela ilizwe,

njalo isililo siyaqonga sivela eJerusalema.

3Izikhulu zithuma izinceku zazo ukuyafuna amanzi;

ziya emithonjeni

kodwa zifice amanzi engekho.

Ziyabuyela lemigqomo yazo ingelalutho;

zithithibele njalo zidanile,

zemboze amakhanda azo.

4Umhlabathi uqhekezekile

ngoba akulazulu elizweni;

abalimi bathithibele

njalo bemboze amakhanda abo.

5Lenyamazana ensikazi egangeni

iyabalekela inkonyane layo elizelweyo

ngoba akulatshani.

6Obabhemi beganga bema emiqolweni elugwadule

bakhefuzele njengamakhanka;

amehlo abo asefiphele

ngenxa yokuswela amadlelo.”

7Lanxa izono zethu zifakaza kubi ngathi,

Oh Thixo, ake wenze okunye ngenxa yebizo lakho.

Ngoba ukuhlehlela kwethu emuva kunengi;

sonile kuwe.

8Oh Themba lika-Israyeli,

uMhlengi wakhe ezikhathini zokuhlupheka,

kungani usiba njengowezizweni elizweni,

njengesihambi esihlala ubusuku obubodwa kuphela?

9Kungani usiba njengomuntu ojunyiweyo,

lanjengebutho elingelamandla okusiza na?

Ukhona phakathi kwethu, wena Thixo,

njalo sibizwa ngebizo lakho;

ungasilahli!

10Nanku okutshiwo nguThixo ngalababantu:

“Bayakuthanda kakhulu ukuntula;

kabazibambi inyawo zabo.

Ngakho uThixo kayikubamukela;

khathesi uzakhumbula ububi babo

abajezisele izono zabo.”

11 UThixo wasesithi kimi, “Ungakhulekeli inhlalakahle yabantu laba.

12Lanxa bezila ukudla, ukukhala kwabo angiyikukulalela; loba benikela iminikelo yokutshiswa kanye leminikelo yamabele, angiyikuyamukela. Esikhundleni salokho, ngizabaqeda du ngenkemba, ngendlala langezifo.”

13Kodwa mina ngathi, “Awu Thixo Wobukhosi, abaphrofethi bahlezi bebatshela besithi, ‘Kaliyikubona inkemba loba libulawe yindlala. Impela, ngizalipha ukuthula okungapheliyo kule indawo.’ ”

14 UThixo wasesithi kimi, “Abaphrofethi baphrofetha amanga ngebizo lami. Angibathumanga njalo angibakhethanga kumbe ngikhulume labo. Baphrofetha imibono yamanga kini, ukuhlahlula, ukukhonza izithombe lenkohliso yezingqondo zabo.

15Ngakho-ke, nanku okutshiwo nguThixo ngabaphrofethi abaphrofetha ngebizo lami ukuthi: Kangizange ngibathume, kodwa bona bathi, ‘Akulankemba kumbe indlala ezathinta ilizwe leli.’ Bona labo abaphrofethi bazabhujiswa ngenkemba langendlala.

16Abantu abaphrofetha kubo bazaphoselwa phandle emigwaqweni yaseJerusalema ngenxa yendlala lenkemba. Akulamuntu ozabangcwaba kumbe omkabo, amadodana abo loba amadodakazi abo. Ngizabehlisela ingozi ebafaneleyo.

17Khuluma ilizwi leli kubo uthi:

‘Amehlo ami kawehlise inyembezi

ebusuku lemini zingomi;

ngoba indodakazi yami egcweleyo, labantu bami

balimele kakhulu,

balinyazwe yikutshaywa okwesabekayo.

18Nxa ngingena elizweni,

ngibona labo ababulawa ngenkemba;

nxa ngingena edolobheni

ngibona umonakalo owenziwa yindlala.

Bobabili umphrofethi lomphristi

sebeye elizweni abangalaziyo.’ ”

19UJuda usumlahle kokuphela na?

IZiyoni uyaleyisa na?

Usitshayeleni kangaka

size singelapheki na?

Sasilindele ukuthula

kodwa akulabuhle obaba khona,

isikhathi sokwelatshwa

kodwa kulokwesaba kuphela.

20Awu Thixo, siyakuvuma ukona kwethu

kanye lokona kwabokhokho bethu;

impela sonile kuwe.

21Ngenxa yebizo lakho ungasenyanyi;

ungasigconi isihlalo sakho sobukhosi esihle kakhulu.

Khumbula isivumelwano sakho lathi

ungasephuli.

22Zikhona yini izithombe eziyize zezizwe ezinganisa izulu na?

Imikhathi yona ngokwayo iyalinisa izulu na?

Hatshi, nguwe, Thixo Nkulunkulu wethu.

Ngakho ithemba lethu likuwe,

ngoba nguwe owenza konke lokhu.