1 AbaseThesalonika Isingeniso - Ndebele Contemporary Bible 2022

IsingenisoIsingenisoEminyakeni engaba ngamatshumi amahlanu lanye (51) emva kokuvuka kukaKhristu, uPhawuli, loSayilasi kanye loThimothi baletha ilizwi ngoJesu uKhristu endaweni yaseThesalonika. Abantu abanengi baphenduka baba ngamakholwa kodwa kwaba lomsindo lapho uSayilasi loThimothi basolwa ngokungalandeli imithetho kaKhesari ngokuthi kuleyinye inkosi ebizwa ngokuthi nguJesu (bona Imisebenzi 17.1-9). Baphunyuka ngesikhala senalithi ngoba kwakumele babaleke.Kuthe sekudlule isikhathi esincane uPhawuli waqala ukukhathazeka ngamakholwa ayeseThesalonika ukuthi bengatshiyana lokholo lwabo ngenxa yokuphikiswa ababehlangana lakho. Ngakho wathuma uThimothi ukuthi abakhuthaze (uThimothi wayengumGrikhi ngalokho wayezahamba kakuhle). UThimothi wathi ephenduka e-Akhayiya lendaba ezinhle zokuthi abantu baseThesalonika babelokhu bengamakholwa njalo bethembekile, uPhawuli wabalobela etshengisa injabulo yakhe.Encwadini yakhe emfitshane, uPhawuli ukhumbula isikhathi sakhe eseThesalonika njalo ubonga ukholo lwabo olungamanga, kungenani lokuthi bake bahlangana lezilingo lenkathazo. Ubafundisa ukuthi baxwaye ukuhlobonga, bathandane ngokupheleleyo njalo basebenze nzima ukuze baziphilise.UPhawuli uphinda aphendule umbuzo oqakathekileyo othi: Themba bani amaKhristu alalo ngalabo abafayo? Uchasisa ukuthi laba abafa bekholwa uKhristu engakaphenduki abalahlekanga kodwa bazavuswa kwabafileyo mhla ephenduka. Ukhumbuza abantu baseThesalonika ukuthi uJesu uzabonakala ngokuphazima kwelihlo okungakhangelelwanga. Ngokunjalo kufanele baphile ngendlela engasoze ibayangise nxa behlangana loJesu bembingelela. Encwadini yakhe uPhawuli, umlayezo wakhe omqoka ngothi, “Qhubekani ngomsebenzi omuhle!”