UHagayi Isingeniso - Ndebele Contemporary Bible 2022
IsingenisoIsingenisoNgesikhathi uKhurosi, inkosi yasePhezhiya inqoba iBhabhiloni, ngo-539 uKhristu engakazalwa, wavumela abathunjwa abangamaJuda ukuthi babuyele kibo, bayekwakha ithempeli eJerusalema. Iqembu elilodwa lahamba ngomnyaka olandelayo, bakha, banikela isisekelo sethempeli ngeminyaka emibili behambile. Kodwa bamiswa ngomakhelwane ababelesazela lenzondo, njalo babelamandla edale lePhezhiya (bona U-Ezra 4.4 – 6.22). Sekwedlule iminyaka elitshumi lasithupha, ngesikhathi sombuso wenkosi uDariyu, umphrofethi uHagayi unxusa abantu ukuthi bayoqala njalo umsebenzi. Ubiza mathupha uZerubhabheli, umbusi okhethiweyo, loJoshuwa umphristi omkhulu ukuthi bakhokhele lumsebenzi. Ngeminyaka emine ukwakhiwa kwasekuphelile njalo lenkonzo ethempelini isiqalisile.UHagayi uphawula imilayezo yakhe emine, ngezinyanga ezine ezihleliweyo ekuqaliseni kombuso kaDariyu. Umlayezo wakuqala uchasisa ukuthi izilimo zabantu bako-Israyeli aziyikubusiswa ngoba indlu kaNkulunkulu itshiywe ilunxiwa. Umlayezo wesibili ukhuthaza laba ababona ithempeli elitsha lidanisa nxa liqathaniswa lelalakhiwe nguSolomoni. UNkulunkulu uthembisa ukuthi udumo lwalo luzadlula lelo elakuqala. Umlayezo wesithathu uyisiqiniseko ebantwini ukuthi izilimo zabo sezizabusiswa. Umlayezo wokucina ngowokukhuthaza uZerubhabheli ngokwakhe, indlalifa yombuso kaDavida. Abantu baphendukile endaweni yabo ngokufanayo lesibusiso sikaNkulunkulu siphendukile.
