1Oh Thixo, uNkulunkulu ophindiselayo,
Oh Nkulunkulu ophindiselayo, khanya uvele.
2Phakama, awu Mahluli womhlaba;
baphindisele abazigqajayo ngokubafaneleyo.
3Koze kube nini ababi, Oh Thixo,
koze kube nini ababi beklamasa na?
4Bathulula amazwi okukloloda;
zonke izigangi zifuthelene ngokuzikhukhumeza.
5Ziyabanyathezela abantu bakho, Oh Thixo;
zincindezela ilifa lakho.
6Zibulala umfelokazi kanye lowezizweni;
zibulala intandane.
7Zithi, “UThixo kaboni;
uNkulunkulu kaJakhobe kananzi.”
8Limukani, lina elingelangqondo phakathi kwabantu;
lina ziphukuphuku, lizahlakanipha nini?
9Yena lowo owayigxumekayo indlebe kezwa yini?
Yena lowo owabumba ilihlo kaboni na?
10Yena lowo oqondisa izizwe kajezisi yini?
Yena lowo ofundisa umuntu kalalwazi na?
11 UThixo uyayazi imicabango yomuntu;
uyayazi ukuthi iyize nje.
12Ubusisiwe umuntu omqondisayo, Oh Thixo,
umuntu omfundisa okomthetho wakho;
13uyamphumuza ensukwini zokuhlupheka,
kuze kuthi ababi bembelwe igodi.
14Ngoba uThixo kazukwala abantu bakhe;
kasoze lanini afulathele ilifa lakhe.
15Ukwahlulela kuzaphinda njalo kumiswe ngokulunga,
kuthi bonke abaqotho ngenhliziyo bakulandele.
16Ngubani ozangimela ekulweni lababi na?
Ngubani ozangelekelela ekulweni lezigangi na?
17Aluba uThixo wayengangelulekanga,
ngabe ngahle ngahlala ngathula zwi ekufeni.
18Lapho ngasengisithi, “Unyawo lwami selutshelela,”
uthando lwakho, Oh Thixo, lwangisekela.
19Nxa ukunqineka kwase kungikhulela,
induduzo yakho yaletha intokozo emphefumulweni wami.
20Kambe isihlalo sobukhosi esixhwalileyo singema lawe yini
leso esiletha inhlupheko ngezimemezelo zaso?
21Bayahlangana ukumelana labalungileyo
ongelacala agwetshelwe ukufa.
22Kodwa uThixo useyinqaba yami,
loNkulunkulu wami ulidwala engiphephela kulo.
23Uzabaphindisela ngenxa yezono zabo
ababhubhise ngenxa yobubi babo;
uThixo uNkulunkulu wethu uzababhubhisa.
Who We AreWhat We EelieveWhat We Do
2025 by iamachristian.org,Inc All rights reserved.
