1“Ungambamba na uLeviyathani ngewuka
loba uhitshele ulimi lwakhe ngentambo na?
2Ungawufaka umkhala yini emakhaleni akhe
kumbe ubhoboze umhlathi wakhe ngewuka na?
3Uzabe elokhu ekuncenga yini ukuthi umzwele?
Uzakhuluma lawe ngamazwi apholileyo yini?
4Uzakwenza isivumelwano lawe na
ukuthi abe yisichaka sakho kokuphela?
5Ungamenza abe yisifuyo sokudlalisa njengenyoni na
kumbe umfake umkhungo adlaliswe ngamantombazana na?
6Abathengi bazabhejelana ngentengo yakhe na?
Bazakwahlukaniselana ngaye na abathengi?
7Ungasibhoboza yini isikhumba sakhe ngenhlendla
loba ikhanda lakhe ngemikhonto yokuciba inhlanzi?
8Ungabeka isandla phezu kwakhe,
uzahlala ukukhumbula ukutshukana kwenu ungaphindi futhi!
9Ukucabanga ukuthi ungamehlula kuyize;
ukumbona nje kodwa kuqeda amandla.
10Kakho ongaba lesibindi sokuthi alwe laye.
Pho ngubani ongamelana lami na?
11Ngubani engilomlandu kuye othi kangihlawule na?
Konke okukhona ngaphansi kwezulu ngokwami.
12Kangisoze ngikhawule ukubabaza izitho zakhe,
amandla akhe langesimo sakhe esihle.
13Ngubani ongaxebula isikhumba sakhe na?
Ngubani ongasondela kuye ngamatomu na?
14Ngubani ongaqunga isibindi avule iminyango yomlomo wakhe,
ogqagqelwe zingavula zamazinyo na?
15Umhlane wakhe ulezinhlu zamahawu
abophene silikici;
16yilelo lithe mba kwelinye
okuthi kakungeni moya phakathi kwawo.
17Anamathelene ndawonye;
abambene okokuthi angeke ehlukaniswe.
18Ukuthimula kwakhe kukhupha inhlansi zomlilo;
amehlo akhe anjengemisebe yokusa.
19Amalangabi omlilo alavuka emlonyeni wakhe;
inhlansi zomlilo ziqhatsha ziphuma khona.
20Intuthu ithunqa iphuma emakhaleni akhe
kungathi isuka embizeni ebilayo phezu komlilo wemihlanga.
21Ukuphefumula kwakhe kulumathisa amalahle,
njalo kulavuka amalangabi emlonyeni wakhe.
22Amandla akhe asentanyeni yakhe;
okuphambi kwakhe kuhle kuphele amandla.
23Amavinqo enyama yakhe abambene nki;
aqine nko kawehlukaniseki.
24Isifuba sakhe silukhuni njengelitshe,
siqine njengengaphansi kwembokodo.
25Uthi nxa ephakama kwesabe amaqhawe ngokwawo;
atshede ebalekela ukubhula komsila wakhe.
26Inkemba leyo emfikelayo kayenzi lutho,
kumbe umkhonto, loba umtshoko loba isijula.
27Insimbi uyithatha njengotshani
lethusi kungathi luluthi olubolileyo.
28Imitshoko kayimenzi abaleke;
lamatshe esavutha anjengomule kuye.
29Induku kuye ingumuca wotshani;
uyahleka esizwa ukukhenceza komdikadika.
30Ingaphansi yomzimba wakhe injengendengezi ezibukhali,
itshiya umzila odakeni kungathi yisileyi esizunguzekayo.
31Udunga inziki zamanzi ayabuke njengembiza enkulu ibila,
aluvube ulwandle njengembiza yamagcobo.
32Ngemva kwakhe utshiya umzila okhazimulayo;
umuntu angazathi ulwandle luloboya obumhlophe.
33Kakukho emhlabeni okulingana laye,
isidalwa esingesabiyo.
34Ubakhangelela phansi bonke abathi bazithembile;
uyinkosi phezu kwabo bonke abazigqajayo.”
Who We AreWhat We EelieveWhat We Do
2025 by iamachristian.org,Inc All rights reserved.
