U-Isaya Isingeniso - Ndebele Contemporary Bible 2022
IsingenisoIsingenisoUmphrofethi u-Isaya watshumayela esizweni sakoJuda okweminyaka engamatshumi amane, kusukela ngomnyaka okwakhothama khona iNkosi u-Uziya (eminyakeni yabo-740 uKhristu engakazalwa) kusiya esikhathini sokuthunjwa kweJerusalema yi-Asiriya ngo-701 uKhristu engakazalwa. Njengabo bonke abaphrofethi, imilayezo ka-Isaya yayigxile esivumelwaneni sikaNkulunkulu labantu bakhe bako-Israyeli. Abaphrofethi babejwayele ukwethula imilayezo yabo ngendlela ezilohlonzi, ezifana lenkondlo ezazisenziwa emphakathini. U-Isaya wayetshiyene labanye abaphrofethi ngoba yena wayelethuba lokufinyelela amakhosi abusa ngensuku zakhe. Wayesenelisa ukupha izeluleko ezilobunkulunkulu enkosini u-Ahazi lenkosi uHezekhiya ngesikhathi umbuso wase-Asiriya uhlasela isizwe sako-Israyeli. Egwalweni lakhe, u-Isaya ugcizelela ngomumo wangaphandle kwelizwe lako-Israyeli, etshengisa ukugxila kwabo ezintweni zangaphandle kwelizwe labo.U-Isaya ukhuthaza abantu ukuthi banakekele abampofu labaswelayo njalo bazinikele ekulandeleni indlela zikaNkulunkulu, babuye baqakathekise ukuhlalisana lokunanza ezomnotho ngokulunga. Ngendlela yesiphrofethi, u-Isaya ukhuluma ngokwahlulelwa kuka-Israyeli okuzayo ngenxa yokona kwakhe, kodwa ubuya akhulume ngesithembiso sokuvuselela isizwe sako-Israyeli kusiya ezizweni zonke jikelele. Ukuqondisa kukaNkulunkulu kusemsebenzini wokuvuselela. Isiphrofethi sika-Isaya samuva siveza isimo sesisebenzi esimangalisayo, esithi ngokuzinikela kwaso kubelensindiso. “Izingoma zezisebenzi” lezi ziveza kahle ukuphenduka kuka-Israyeli evela ekuthunjweni, lokuphenduka kukaThixo ebantwini bakhe, lezizwe ziphendukela kuNkulunkulu. Abalobi bengwalo zeThestamente Elitsha balokucaphuna izicaphuno zika-Isaya nxa bechasisa ukuba izenzo zika-Israyeli zasendulo zagcwalisa njani ukubusiswa komhlaba.
