JOB 35 - Afrikaans 1983

Elihu: Wat jy praat, is wind

1Elihu het voortgegaan:

2“Dink jy dit handel die saak af

as jy sê: ‘Ek sal my reg van God ontvang’

3en dan aanhou om te sê: ‘Wat baat dit my,

wat kan ek wen as ek nie sondig nie?’

4Daarop sal ek jou

en ook jou vriende by jou antwoord.

5Kyk op, kyk na die hemel,

kyk na die wolke hoog bokant jou:

6as jy sondig, wat doen dit aan God,

as jy baie keer oortree, hoe raak dit Hom,

7as jy sonder sonde is, wat baat dit Hom,

wat kry Hy van jou?

8Jou sonde raak jou medemens

en jou onskuld raak jou medemens.

9“Mense roep om hulp onder hulle swaar verdrukking,

hulle soek hulp teen die geweld van mense met mag.

10Maar hulle vra nie na God, hulle Maker,

na Hom wat selfs in die nag

'n lied kan laat sing nie,

11na Hom wat aan ons meer verstand gegee het as aan die diere,

meer insig as aan die voëls.

12Mense roep om hulp,

maar Hy antwoord nie,

want hulle is vol hoogmoed en boosheid.

13God luister nie na hol woorde nie,

die Almagtige slaan daar geen ag op nie,

14ook nie as jy sê dat jy Hom nie sien nie,

dat jou saak voor Hom is, dat jy op Hom wag nie,

15as jy sê Hy straf nie in sy toorn nie,

Hy dra geen kennis van die sonde nie.

16Job, wat jy praat, is wind,

jy praat en praat, maar sonder kennis.”