1Morongwa yola a bego a bolela le nna a tla gape, a ntsoša bjalo ka motho ge a tsošwa borokong.
2A mpotšiša a re: “O bonang?”
Ka mo fetola ka re: “Ke bona sehlomamabone sa gauta. Godimo ga sona go na le sebjana sa makhura a mohlware. Sehlomamabone seo se na le mabone a a šupago, lengwe le lengwe le na le lešobana la thapo.
3 Go na le mehlare ye mebedi ya mehlware ka thoko ga sehlomamabone, wo mongwe ka mo, wo mongwe ka mo.”
4Ke moka ka botšiša morongwa yola ka re: “Na dilo tše di šupang, mong wa ka?”
5Yena a mphetola a re: “O ra gore ga o tsebe gore dilo tše di šupang?”
Ka mo fetola ka re: “Aowa, mong wa ka, ga ke tsebe.”
10bMorongwa yola a re go nna: “Mabone a a šupago ao ke mahlo a a šupago a Morena, a a bonago tša lefaseng ka moka.”
11 Ke moo ke mmotšišitšego ka re: “Mehlare ye mebedi ye ya mehlware ka mo le ka mo ga sehlomamabone e šupang?”
12Ka tšwela pele ka re: “Na makala a mabedi a a mohlware ka thoko ga dipompi tše pedi tša gauta tša go tšhela makhura a mohlware a mmala wa gauta ona a šupang?”
13Yena a re go nna: “O ra gore ga o tsebe gore dilo tše di šupang?”
Ka mo fetola ka re: “Aowa, mong wa ka, ga ke tsebe.”
14Ke moka a re: “Dilo tše di emetše batlotšwa ba babedi ba go hlankela yena Morena, Mong wa lefase ka moka.”
Se Modimo a se tshepišitšego Serubabele6 Morongwa yola a ntaela gore ke botše Serubabele gore Morena o re: “O tla atlega, fela e sego ka maatla a gago goba a madira a gago, eupša ka go tutuetšwa ke moya wa ka.
7Wena thabakgolo, o selo mang go Serubabele? O tla fetoga molala ge a go batamela. Serubabele, wena o tla tsošološa Tempele, gomme ya re ge o bea leswika la mafelelo, batho ba goa ba re: ‘Ga se ka botse! Ke le lebotse bjang!’ ”
8Morena a mpotša gape a re:
9“Tempele ye e theilwe ke Serubabele, gomme e tla ba ya phethwa ke yena. Mohla seo se direga ke gona setšhaba sa ka se tlago tseba gore ke nna ke go romilego go sona.
10a Ba se nyamišwe ke ge go se ne tema ye e bonalago. Ba tla thaba ge ba bona Serubabele a tšwela pele le go aga Tempele.”
Who We AreWhat We EelieveWhat We Do
2025 by iamachristian.org,Inc All rights reserved.
