1 SAMUELE 21 - Northern Sotho 2000（NSO00）

Dafida o tšhabela Saulo

1 Dafida a ya go moprista Ahimeleke kua Nobo. Ahimeleke a tšwa a thothomela a tlile go mo gahlanetša gomme a mmotšiša a re: “O reng o tlile mo o le noši?”

2Dafida a mo fetola a re: “Ke tlile mo ka ditaba tša kgoši. O mpoditše gore ke se ke ka tsebiša motho se a nthomilego gore ke tle ke se dire. Ge e le banna ba ka bona, ke ba boditše gore ba nkgahlanetše lefelong le lengwe.

3Bjale ge, a o na le se o ka mphago sona? Hle, mphe dinkgwa tše di fetšago seatla goba se sengwenyana se o nago naso.”

4Moprista a re: “Ga ke sa na le dinkgwa tša mehleng; tše ke nago natšo ke dinkgwa tše kgethwa fela; o ka di tšea ge eba banna ba gago ga se ba robala le basadi kgauswinyana.”

5Dafida a mo fetola a re: “Aowa, ga se ba robala le basadi. Banna ba ka ka mehla ba fela ba itlhwekiša ge re etšwa ka ditaba tša ka mehla; bjale ba ka se itlhwekiše bjang lehono mola re bile re tšwile ka ditaba tše e sego tša mehleng!”

6 Ka gona moprista a fa Dafida dinkgwa tšela tše kgethwa, ka gobane dinkgwa tše a bego a na le tšona e be e le fela tše di abetšwego Modimo, tše di bego di tlošitšwe tafoleng ye kgethwa mme legatong la tšona go beilwe tše di sa fišago.

7Mookamedi wa badiši ba maruo a Saulo, Doege, wa Edomo, o be a le moo ka letšatši leo, ka gobane o be a tlile go phetha tshwanelo ya sedumedi.

8Dafida a re go Ahimeleke: “A ga o na le lerumo goba tšhoša ye o ka mphago yona? Ditaelo tša kgoši di ntlošitše ka lephakuphaku ka ba ka hloka le nako ya go tšea tšhoša ya ka goba dibetša tše dingwe.”

9 Ahimeleke a mo fetola a re: “Ke na le tšhoša ya Goliate, Mofilista, yola o mmolailego molaleng wa Ela; e ka mola morago ga seaparo se sekgethwa, e phuthetšwe ka lešela. Ge o e nyaka, e tšee – ke sona sebetša se nnoši mo.”

Dafida a re: “Mphe yona. Ga go tšhoša ye e phalago yeo!”

10Ka gona Dafida a tloga a tšhaba Saulo, gomme a ya go Kgoši Akishe wa Gathe.

11 Bakgomana ba Kgoši Akishe ba mmotšiša ba re: “A motho yo ga se Dafida, kgoši ya naga ya gabo? Yo ke monna yola basadi ba bego ba bina ba opela ka yena ba hlatlolana ba re: ‘Saulo o bolaile dikete, eupša Dafida o bolaile dikete tše masomesome.’ ”

12 Ge Dafida a ekwa tše ba di bolelago, a thoma go boifa Kgoši Akishe kudu.

13 Ka gona nako ye nngwe le ye nngwe ge ba le gona, Dafida o be a dira mo nkego ga a tšee gabotse mme a itshwara bjalo ka segafa ge ba leka go mo kgala; o be a ngwalangwala mo mamating a dikgoro tša motse gomme a intšha diteta di elela maledung.

14Ka gona Akishe a re go bakgomana ba gagwe: “Bonang! Monna yo o a gafa! Ke ka lebaka lang le mo tlišitše go nna?

15Ga ke re ke šetše ke na le digafa tše ntši mo? Bjale ke ka lebaka lang le ntlišetša se sengwe gape gore se tle se ntshwenye ka bogafa bja sona ka mo lapeng la ka?”