DIEMA 28 - Northern Sotho 2000（NSO00）

1Yo kgopo o tšhaba go se na yo a mo rakedišago,

moloki yena ke yo bogale bjalo ka tau.

2Ge go tsogile mpherefere setšhabeng,

boetapele bo bakwa ke ba bantši.

Naga e lala ge e na le moetapele wa bohlale, wa tsebo.

3Kgoši, sehlakišabadiidi,

e etša pula ya matlakadibe, segogoladibjalo.

4Bakgopo ba retwa ke ba ba tshelago melao ya Morena,

ba lwantšhwa ke ba ba e phethago.

5Ba babe ga ba tsebe se e lego toka,

ba ba khunamelago Morena bona ba kwešiša tšohle.

6Modiidi wa go hloka bosodi

o phala mohumi yo kgopo.

7Ngwana wa tlhaologanyo o phetha melao ya Morena;

mogweranaledijagobe yena o leša tatagwe dihlong.

8Yo a ikokeletšago lehumo ka go adimiša tšhelete

a e tswadiša go feta tekanyo,

o e kgobokeletša yo a tlago e fa badiidi.

9Yo a ithibago ditsebe gore a se kwe melao ya Morena,

le dithapelo tša gagwe di šišimiša Morena.

10Yo a arošetšago moloki tseleng tše mpe,

go tla wela yena moreong woo wa gagwe.

Bahlokabosodi bona ba tla atlega.

11Mohumi o ipona e le yo bohlale,

o lemogwa ke modiidi wa tlhaologanyo.

12Ge baloki e eba baetapele, go a hlalalwa,

fela ge bakgopo e eba baetapele,

batho ba a khuta.

13Mmipadibetšagagwe a ka se atlege;

yo a ipolelago tšona a ba a di tlogela,

yena Modimo o tla mo gaugela.

14Go lehlogonolo yo a boifago Morena ka mehla;

yo a retelago a sa mmoife yena o tla welwa ke masetlapelo.

15Mmuši yo kgopo wa setšhaba se se hlakago

o bjalo ka tau ye e bopago,

ke bere ye e hlaselago.

16Mmuši, mohlokatlhaologanyo,

o hlakiša setšhaba kudu;

yo a hloilego poelo ya bomenetša o phela galele.

17Mmolai o tla phela a tšhaba go fihlela a ehwa;

go se be le yo a mo thibelago.

18Mohlokabosodi o a lotega;

motšeakatselakgopo yena o wa ka bjako.

19Moitemelatšhemo o bolaya mabele,

molatamafeela yena o bolawa ke tlala.

20Motshephegi o atlega kudu;

mopotlakelagohuma ga a pheme kotlo.

21Go ahlola sepitša ke phošo,

fela baahlodi ba bangwe ba rekwa ka sejonyana go dira phošo yeo.

22Ramegabaru o potlakela go huma,

a sa lemoge gore se se mo letetšego ke bodiidi.

23Mosolamotho o feleletša ka go lebogwa

go phala mogegeamotho.

24Yo a rego go hlakola batswadi ga se phošo

ga a fapane le babolai.

25Ramegabaru o hlohleletša phapano.

Yo a atlegago ke yo a tshephago Morena.

26Moipoti ke setlaela,

modirakabohlale yena o a lotega.

27Yo a fago badiidi a ka se hloke selo;

yo a sa ba šetšego yena o tla rogwa

ke badiidi ba bantši.

28Ge bakgopo e eba baetapele, batho ba a khuta;

ge ba bolawa, baloki ba ba ema legato.