DIPESALOME 4 - Northern Sotho 2000（NSO00）

Thapelo ya mantšiboaGo tsebišwa moopediši gore ke pesalome ya Dafida; e opelwe e letšwa ka diletšo tša metato.

1Ge ke go kgopela thušo, o nthuše,

hle, Modimo, Moemedi wa ka.

Mola ke le tlalelong o ntlhakodišitše.

Bjale nkgaugele, o nkwe, hle,

ge ke go rapela.

2Lena boramaemo, le tla feletša kae le go mpolela gampe?

Le tla rata lefeela le maaka go fihlela neng? Sela

3Tsebang gore Morena o direla mmotegi wa gagwe dimakatšo;

ge ke mo kgopela thušo,

o a nkwa.

4 Le ge le galefile le se dire sebe;

le nagantšhiše taba ye ka dikobong,

mme le se dire selo. Sela

5Le neele dihlabelo tše di laetšwego,

gomme le bote Morena.

6Ke ba bantši ba ba rego:

“Nke nkabe re ka atlega!

Nke o re edišetše sefahlego, Morena!”

7Fela nna lethabo le o mphilego lona le feta la ba ba bolailego mabele le beine.

8Gomme bjale ke robala boroko ka re kgu;

gobane ke wena fela o ntudišago ka boiketlo, Morena.