DIPESALOME 77 - Northern Sotho 2000（NSO00）

Go ikhomotša ka nako ya tlaleloGo tsebišwa moopediši gore ke pesalome ya Asafo; e opelwe ka modumo wa kopelo “Jeduthune”.

1Ke llela Modimo ke goelela;

ke llela Modimo ke goelela,

mme o a nkwa.

2Ge ke tlaletšwe ke rapela Morena;

ke lala ke otlolotše matsogo ke sa lape,

fela ke hloka wa go mpea pelo.

3Ge ke gopola Modimo ke a fegelwa;

ge ke mo nagantšhiša,

ke nolega moko. Sela

4O ntlhoba boroko;

ke a balabala ke šitwa le ke go bolela.

5-6Ke gopola tša mehla yela ya kgale;

ke eleletša tša mengwaga ya bogologolo.

Ke lala ke nagana kudu,

ke balabala ke re:

7“Kgane Morena o tla re lahlela ruri?

Afa re tla hlwa re sa mo kgahla?

8Na e ka ba o leseditše ruri go re rata?

Na a ka napa a se phethe se a se holofeditšego?

9Kgane o lebetše go gaugela?

Na ge a galefile o gana go re šokela?” Sela

10Ka phetha ka go re:

“Se se nkwešago bohloko ke gore Ragodimodimo ga a sa ne maatla.” Sela

11Morena,

ke gopola tiro tša gago tše dikgolo;

ke nagana ka mehlolo ya gago ya bogologolo.

12Ke nagana ka tšohle tše o di dirilego;

ke gopodišiša ditiro tša gago tše maatla.

13Modimo,

tšohle tše o di dirago ke tše dikgethwa.

Ke ofe modimo wo mogolo go etša wena?

14Ke wena Modimo, Modiramehlolo;

o bontšhitše baditšhaba maatla a gago.

15O phološitše setšhaba sa gago

ka maatla a gago a magolo,

tšona ditlogolo tša Jakobo le Josefa. Sela

16Meetse a rile go go bona,

wena Modimo,

meetse a rile go go bona a thothomela ka poifo,

phamphamadiba le yona ya biloga.

17Maru a tloromiša pula,

legodimo la kidimetša;

magadima a gago a pekenya ka mathoko ohle.

18Mokidimetšo wa tladi ya gago wa ratha,

gomme magadima a bonega lefase;

lefase la thothomela,

la rekareka.

19Wa putla lewatle o sepela,

wa tshela meetsemagolo,

fela mohlala wa gago wa se bonagale.

20Wa hlahla setšhaba sa gago boka modiša wa mohlape,

mohlape wo o hlokometšwego ke Moshe le Arone.