1 TEHARONIKA 5 - New Testament with modified orthography(MRNT)

Kia Mataara ki te Hokinga mai o te Ariki

1Ko ngā wā ia me ngā tāima, e ōku tēina, kāhore he take e tuhi­tuhi atu ai ahau ki a koutou.

2E mātau pū ana hoki koutou, tērā e haere mai te rā o te Ariki, ānō he tāhae i te pō.

3I a rātou hoki e kī ana, “He rangi­mārie, he ora,” ko reira te mate huaki tata ai ki a rātou, ka pērā me te mamae ki te wahine hapū, e kore hoki rātou e mawhiti.

4Ko koutou ia, e ōku tēina, kāhore i roto i te pōuri, e rite ai ki tā te tāhae te hopu ā taua rā i a koutou.

5He tama koutou katoa nō te mārama, he tama nō te rā. Ehara tātou i te pō, ehara i te pōuri.

6Heoi, aua tātou e moe, kei pērā me ērā atu; engari kia mata­ara tātou, kia whai whaka­aro.

7Ko te hunga hoki e moe ana, e moe ana i te pō; ko te hunga e hau­rangi ana, e hau­rangi ana i te pō.

8Kia whai whaka­aro tātou, ko tātou nei te hunga o te rā, kia kākahu­ria iho te whaka­pono me te aroha hei puku­puku; hei pōtae hoki, ko te tū­mana­ko atu ki te ora.

9Kīhai hoki tātou i meinga e te Atua mō te riri engari kia whi­whi ai ki te ora mā roto i tō tātou Ariki, i a Īhu Karaiti;

10i mate nei mō tātou, ahakoa tātou mata­ara, moe rānei, kia ora tahi ai me ia.

11Nā, whaka­mārie koutou tētahi i tētahi, hangā hoki te pai o tētahi e tētahi; pērā­tia me tā koutou e mea mai nā.

Poroporoaki

12He mea ia tēnei nā mātou ki a koutou, e ōku tēina, kia mātau ki te hunga e mahi ana i roto i a koutou, e tohu­tohu ana i a koutou i roto i te Ariki, e whaka­tūpato ana i a koutou;

13kia nui whaka­hara­hara anō ō koutou whaka­aro ki a rātou i runga i te aroha, me whaka­aro ki tā rātou mahi. Kia mau tā koutou rongo ki a koutou anō.

14Nā, ko tā mātou whaka­hau tēnei ki a koutou, e ōku tēina, whaka­tūpato­ria te hunga whaka­keke, whaka­mārie­tia te hunga ngākau rahi­rahi, tau­tokona ake te hunga ngoi­kore, kia manawa­nui ki ngā tāngata katoa.

15Kia tūpato kei hoatu he kino mō te kino e tētahi ki tētahi; engari, i ngā wā katoa whāia he pai mō tētahi, mō tētahi, mō ngā tāngata katoa anō hoki.

16Kia hari i ngā wā katoa.

17Kei whaka­mutua te īnoi.

18I ngā mea katoa me whaka­whetai atu; ko tā te Atua hoki tēnei i pai ai i roto i a Karaiti Īhu hei mahi mā koutou.

19Kei tineia te Wairua.

20Kaua e whaka­hāwea atu ki ngā poro­piti­tanga.

21Whaka­mā­tau­tau­ria ngā mea katoa; kia ū ki te pai;

22mawehe atu i ngā āhua katoa o te kino.

23Ā, mā te Atua pū anō o te rangi­mārie e tino whaka­tapu rawa koutou; kia tiaki­na hoki ō koutou wairua, ō koutou ngākau, ō koutou tinana, kia toitū, kia hēkore, i te taenga mai o tō tātou Ariki, o Īhu Karaiti.

24He pono te kai­karanga i a koutou, māna anō hoki e whaka­oti.

25E ōku tēina, īnoi mō mātou.

26Oha atu ki ngā tēina katoa, hei te kihi tapu.

27He tohe atu tēnei nāku ki a koutou i runga i te Ariki, kia kōrero­tia tēnei puka­puka ki ngā tēina tapu katoa.

28Kia tau ki a koutou te aroha noa o tō tātou Ariki, o Īhu Karaiti.