HOANI 16 - New Testament with modified orthography(MRNT)

1“Kua kōrero­tia e ahau ēnei mea ki a koutou, kei hē koutou.

2Ka peia atu koutou i roto i ngā whare kara­kia; ā, meāke puta te wā e mea ai te kai­whaka­mate i a koutou, he mahi pai tāna ki te Atua.

3Nā, e meatia ēnei mea, nō te mea kāhore rātou i mōhio ki te Matua, kāhore hoki ki ahau.

4Otiia, kua kōrero­tia ēnei mea e ahau ki a koutou, mō te puta rawa mai o taua wā, ka mahara koutou ki aua mea, he mea kōrero nāku ki a koutou.

Ngā Mahi a te Wairua Tapu

“Nā, kīhai ēnei mea i kōrero­tia e ahau ki a koutou i te tīma­tanga, nō te mea e noho ana ahau i a koutou.

5Nā, e haere ana tēnei ahau ki tōku kai­tono mai; ā, kāhore tētahi o koutou i ui mai ki ahau, ‘Ko hea koe?’

6Otirā, i tāku kōrero­tanga i ēnei mea ki a koutou, ka kī ō koutou ngākau i te pōuri.

7He pono ia tāku kōrero ki a koutou; nui atu te pai mō koutou ki te haere ahau; ki te kāhore hoki ahau e haere, e kore te Kai­whaka­mārie e tae mai ki a koutou; ā, ki te haere ahau, māku ia e tono mai ki a koutou.

8Nā, ka tae mai ia, māna e whaka­atu ki te ao te hara, te tika, me te whaka­wā.

9Te hara, mō rātou kāhore e whaka­pono ki ahau;

10te tika, nō te mea e haere ana ahau ki tōku Matua, ā, heoi anō tō koutou kite­nga i ahau;

11te whaka­wā, nō te mea kua whaka­tikaia te whaka­wā mō te ranga­tira o tēnei ao.

12“He maha atu anō ngā mea hei kōrero māku ki a koutou, otirā, e kore e taea e koutou te mau āia­nei.

13Otirā, kia tae mai ia, te Wairua o te pono, māna koutou e ārahi ki te pono katoa; ehara hoki tāna i te kōrero nāna ake; engari, ka kōrero­tia e ia ngā mea e rongo ai ia; māna hoki e whaka­kite ki a koutou ngā mea e puta mai ana.

14Ka whaka­korōria­tia ahau e ia; ka tango hoki ia i āku mea, ā, ka whaka­atu­ria ki a koutou.

15Ko ngā mea katoa a te Matua, nāku. Koia ahau i mea ai, ka tango­hia e ia āku mea, ā, ka whaka­atu­ria ki a koutou.”

Te Pōuritanga me te Hari

16“Taro ake, ā, e kore koutou e kite anō i ahau; ā, taro ake anō, ka kite koutou i ahau, nō te mea ka haere ahau ki te Matua.”

17Nā, ka mea ētahi o āna ākonga tētahi ki tētahi, “He aha tēnei e mea nei ia ki a tātou, ‘Taro ake, ā, e kore koutou e kite i ahau; ā, taro ake anō, ka kite koutou i ahau’; me tēnei, ‘Nō te mea e haere ana ahau ki te Matua’?”

18Nā, ka mea rātou, “He aha tēnei e mea nei ia, ‘Taro ake?’ E kore tātou e mātau ki tāna e mea nei.”

19Ā, i mōhio a Īhu e hia­hia ana rātou ki te ui ki a ia, ka mea ki a rātou, “E rapu ana koutou ki a koutou anō ki tāku i mea rā, ‘Taro ake, ā, e kore koutou e kite i ahau; ā, taro ake anō ka kite koutou i ahau’?

20He pono, he pono tāku e mea nei ki a koutou, Ka tangi koutou, ka auē, ko te ao ia ka hari; e pōuri anō koutou, otirā ka meinga tō koutou pōuri hei hari.

21I te mea ka whaka­mamae te wahine, ka pōuri, nō te mea ka tae tōna wā. Ka whānau tāna tama­iti, heoi anō, mahara ki te mamae, i te hari hoki, nō te mea ka whānau he tangata ki te ao.

22Nā, tēnei koutou te pōuri nei; e kite anō ia ahau i a koutou, ā, ka hari ō koutou ngākau, e kore hoki e tango­hia i a koutou tō koutou hari e tētahi.

23“Nā, ā taua rā e kore koutou e ui ki tētahi mea i ahau. He pono, he pono tāku e mea nei ki a koutou, ko ā koutou e īnoi ai ki te Matua i runga i tōku ingoa, e hoatu e ia ki a koutou.

24Kāhore anō i īnoia noatia e koutou tētahi mea i runga i tōku ingoa. Īnoia, ā, ka whi­whi koutou, kia tino nui ai tō koutou koa.

Te Wikitōria ki te Ao

25“He mea whaka­rite tāku kōrero i ēnei mea ki a koutou. Otiia, meāke puta te wā e kore ai ahau e kōrero kupu whaka­rite ki a koutou, engari, ka mārama tonu tāku kōrero ki a koutou mō te Matua.

26Ā taua rā, ka īnoi koutou i runga i tōku ingoa; ā, e kore ahau e mea ki a koutou e īnoi ahau ki te Matua mō koutou.

27E aroha ana hoki te Matua ake anō ki a koutou, mō koutou i aroha ki ahau, i whaka­pono hoki i haere mai ahau i te Matua.

28I haere mai ahau i te Matua, ā, kua tae mai nei ki te ao; ka mahue anō i ahau te ao, ā, ka haere ki te Matua.”

29Ka mea āna ākonga ki a ia, “Nā, kua mārama tāu kōrero, ehara tāu kōrero i te kupu whaka­rite.

30Kātahi mātou ka mōhio, tēnei koe te mōhio nei ki ngā mea katoa, e kore anō e mea mā tētahi e ui ki a koe; nā konei mātou i whaka­pono ai i haere mai koe i te Atua.”

31Ka whaka­hokia e Īhu ki a rātou, “Kātahi koutou ka whaka­pono?

32Nā, meāke puta te wā, ā, kua puta nei anō, e whaka­marara­tia ai koutou ki tōna wāhi, ki tōna wāhi, ā, ka waiho ko ahau anake. Otiia, he teka ko ahau anake, nō te mea kei ahau nei te Matua.

33Kua kōrero­tia e ahau ēnei mea ki a koutou, kia whai mārie­tanga ai koutou i roto i ahau. Ko tā koutou i te ao nei, he mamate. Otirā kia māia; kua taea e ahau te ao!”