ROMA 10 - New Testament with modified orthography(MRNT)

1E ōku tēina, ko tā tōku ngākau i wawata ai, ko tōku īnoi hoki ki te Atua mō rātou, kia whaka­ora­ngia rātou.

2E whaka­ae ana hoki ahau ki a rātou, he ngākau nui tō rātou ki te Atua, otiia, ehara i te mea mōhio.

3I a rātou hoki e kūware ana ki tā te Atua tika, e whai ana kia whaka­ū­kia ko tō rātou ake, kīhai rātou i ngohe­ngohe ki te tika a te Atua.

4Ko te Karaiti hoki te tuku­nga iho o te ture hei tika mō ngā tāngata whaka­pono katoa.

Te Whakaoranga mō ngā Tāngata Katoa

5Kua tuhi­tuhia hoki e Mohi, “Ko te tangata e whaka­rite ana i tā te ture tika, ka ora ia i reira.”

6Ko te kupu ia tēnei o tō te whaka­pono tika, “Aua e mea i roto i tōu ngākau, ‘Ko wai hei kake ki te rangi?’ ” Arā, ki te tiki atu i a te Karaiti ki raro.

7Ko wai rānei hei heke iho ki te hōhonu? Arā, ki te tiki atu i a te Karaiti i roto i te hunga mate.

8E pēhea ana oti? “E tata ana ki a koe te kupu, kei tōu māngai, kei tōu ngākau.” Ko ia tēnei, ko te kupu o te whaka­pono e kauwhau nei mātou;

9arā, ki te whaka­ae tōu māngai ko Īhu te Ariki, ā, ki te whaka­pono tōu ngākau nā te Atua ia i whaka­ara ake i te hunga mate, e ora koe.

10Mā te ngākau hoki kia whaka­pono ka tika ai; mā te māngai kia whaka­ae ka ora ai.

11E mea ana hoki te karaipi­ture, “Ko ngā tāngata katoa e whaka­pono ana ki a ia e kore e meinga kia whaka­mā.”

12Kāhore hoki he rere­kē­tanga o te Hūrai, o te Kariki; ā, ko taua Ariki anō te Ariki o te katoa, ā, e hua ana āna taonga ki te hunga katoa e karanga ana ki a ia.

13“E ora hoki ngā tāngata katoa e karanga ana ki te ingoa o te Ariki.”

14Nā, me pēhea tā rātou karanga ki a ia, ki te kāhore i whaka­pono ki a ia? Me pēhea hoki tā rātou whaka­pono ki a ia, ki te kāhore i rongo ki a ia? Me pēhea hoki e rongo ai, ki te kāhore he kai­kauwhau?

15Ā, me pēhea e kauwhau ai, ki te kāhore e tonoa? Ko te mea ia i tuhi­tuhia, “Anō te āta­ahua o ngā wae­wae o te hunga kawe mai i te rongo whaka­hari o ngā mea papai!”

16Otirā, kāhore rātou katoa i ngohe­ngohe ki ngā rongo whaka­hari. E mea ana hoki a Ihāia, “E te Ariki, ko wai i whaka­pono ki tā mātou whaka­atu?”

17Inā, nā te rongo te whaka­pono, ā, ko te rongo nā te kupu a te Karaiti.

18Otiia, ko tāku kupu tēnei, “Kāhore rānei rātou i rongo?” Koia rā ia,

“Kua puta atu tō rātou reo ki te whenua katoa,

ā rātou kupu hoki ki ngā tōpito o te ao.”

19Ko tāku kupu ia tēnei: Kāhore ianei a Īharaira i mōhio? Nā Mohi te kupu tua­tahi:

“Māku koutou e whaka­oho kia hae

ki te hunga ehara i te iwi;

ka meinga e ahau te iwi pō­au­au

hei whaka­oho i a koutou ki te riri.”

20Ā, ka māia rawa a Ihāia, ka mea,

“Kua kitea ahau e te hunga kīhai i rapu i ahau;

kua whaka­kitea ahau ki te hunga kīhai nei i ui ki ahau.”

21Ko tāna kupu ia mō Īharaira,

“Pau noa te rā i totoro atu ai ōku ringa

ki te iwi tutū ki te iwi whaka­hāwea.”