HOANI 21 - New Testament with modified orthography(MRNT)

Ka Kitea a Īhu e ngā Ākonga tokowhitu

1Muri iho i ēnei mea ka whaka­kite a Īhu i a ia ki ngā ākonga i te moana o Tai­piria; ko tāna whaka­kite­nga tēnei.

2E noho tahi ana a Haimona Pita, a Tamati, ko Ririmu nei tōna ingoa, a Natanahira o Kana o Kariri, ngā tama a Heperi, me tētahi toko­rua atu anō o āna ākonga.

3Ka mea a Haimona Pita ki a rātou, “Ka haere ahau ki te hao.”

Ka mea rātou ki a ia, “Ko tātou tahi e haere.” Haere ana rātou, eke ana ki runga ki te kai­puke; ā, i taua pō kīhai i mau tētahi mea.

4Nā, ka pūao te ata, ko Īhu e tū ana i tātahi; otiia, kīhai ngā ākonga i mōhio ko Īhu ia.

5Nā, ko te mea­tanga a Īhu ki a rātou, “E tama mā, kāhore ā koutou kai?”

Ka whaka­hokia e rātou ki a ia, “Kāhore.”

6Ka mea ia ki a rātou, “Makā te kupe­nga ki te taha matau o te kai­puke, ā, ka mau ētahi.” Nā, i tā rātou maka­nga atu, kīhai i taea te kukume i te tini o ngā ika.

7Kātahi, ka mea te ākonga i aroha­ina e Īhu ki a Pita, “Ko te Ariki!” Ā, nō te rongo­nga o Haimona Pita, ko te Ariki, ka whī­tiki­ria tōna kākahu, e tū kau ana hoki ia, ā, rere ana ki te moana.

8Ko ērā ākonga ia i hoe i runga i te poti, kīhai hoki i mamao atu i te whenua, me te mea e rua rau whatīa­nga, e kukume ana i te kupe­nga, i ngā ika.

9Heoi, nō tō rātou ūnga ki uta, ka kite i te kāpura waro me ngā ika e takoto ana i runga, me tētahi taro.

10Ka mea a Īhu ki a rātou, “Hōmai ētahi o ngā ika kua mau nā i a koutou.”

11Nā, haere ana a Haimona Pita, ā, kūmea ana e ia te kupe­nga ki uta, kī tonu i ngā ika nunui, kotahi rau e rima tekau mā toru; ā, ahakoa tini, kīhai i pakaru te kupe­nga.

12Ka mea a Īhu ki a rātou, “Haere mai ki te kai.” Heoi, kīhai tētahi o ngā ākonga i māia ki te ui ki a ia, “Ko wai koe?” I mōhio hoki ko te Ariki.

13Nā, ka haere a Īhu, ka mau ki te taro, ā, hoatu ana e ia ki a rātou, me ngā ika.

14Ko te toru tēnei o ngā pu­tanga o Īhu ki āna ākonga, i muri i tōna aranga ake i te hunga mate.

Ko Īhu rāua ko Pita

15Ā, ka mutu tā rātou kai, ka mea a Īhu ki a Haimona Pita, “E Haimona, tama a Hona, rahi atu rānei tōu aroha ki ahau i tō ēnei?”

Ka mea tērā ki a ia, “Āe, e te Ariki; e mōhio ana koe e aroha ana ahau ki a koe.”

Ka mea ia ki a ia, “Whāngai­nga āku reme.”

16Ka mea anō ia ki a ia, ko te rua o ngā mea­tanga, “E Haimona, tama a Hona, e aroha ana koe ki ahau?”

Ka mea tērā ki a ia, “Āe, e te Ariki; e mōhio ana koe e aroha ana ahau ki a koe.”

Ka mea ia ki a ia, “Hēpara­tia āku hipi.”

17Ka mea ia ki a ia, ko te toru o ngā mea­tanga, “E Haimona, tama a Hona, e aroha ana koe ki ahau?”

Ka pōuri a Pita nō te mea ka toru rawa āna mea­tanga ki a ia, “E aroha ana koe ki ahau?” Ka mea anō ki a ia, “E te Ariki, e mōhio ana koe ki ngā mea katoa; e mōhio ana koe e aroha ana ahau ki a koe.”

Ka mea a Īhu ki a ia, “Whāngai­nga āku hipi.

18He pono, he pono tāku e mea nei ki a koe, i tōu tama­riki­tanga, i whī­tiki koe i a koe, i haere ki tāu wāhi i pai ai. Ka koro­heke­tia koe, ka whaka­mārō­tia e koe ōu ringa, he tangata kē hoki māna koe e whī­tiki, e kawe ki te wāhi e kore ai koe e pai.”

19(I kōrero­tia tēnei e ia, hei tohu mō te mate e whaka­korōria ai ia i te Atua.) Ā, ka puaki tēnei kupu ana, ka mea ia ki a ia, “Haere mai i muri i ahau.”

Ko Īhu rāua ko tērā o ngā Ākonga

20Nō te tahuri­tanga, o Pita, ka kite i te ākonga i aroha ai a Īhu e aru ana; ko tērā hoki i whaka­whiri­naki rā ki tōna uma i te hapa, i mea rā, “E te Ariki, ko wai te kai­tuku mōu?”

21Ā, i te kite­nga o Pita i a ia, ka mea ki a Īhu, “E te Ariki, e aha rā tēnei?”

22Ka mea a Īhu ki a ia, “Ki te pai ahau kia noho tonu ia kia tae mai rā anō ahau, hei aha māu? Haere mai koe i muri i ahau.”

23Heoi, ka puta atu tēnei kupu ki ngā hoa, e kore taua ākonga e mate. Otiia, kīhai a Īhu i mea ki a ia, “E kore ia e mate”; engari, “Ki te pai ahau kia noho tonu ia kia tae mai rā anō ahau, hei aha māu?”

24Ko taua ākonga tēnei e whaka­atu nei i ēnei mea, ko te kai­tuhi­tuhi hoki ia i ēnei mea; e mōhio ana anō mātou e tika ana tāna whaka­atu.

Whakamutunga

25Nā, tērā atu anō tōna tini o ngā mea i mea ai a Īhu me i tuhia katoa­tia, e mea ana ahau, e kore pea te ao nei e whai takoto­ranga mō ngā puka­puka e tuhia.