ROMA 5 - New Testament with modified orthography(MRNT)

Tika ki te Atua

1Nā, i te mea ka tika nei i te whaka­pono, kia mau tā tātou maunga rongo ki te Atua, he mea nā tō tātou Ariki, nā Īhu Karaiti;

2nāna nei te whaka­tata­nga i a tātou i runga i te whaka­pono ki tēnei aroha noa e tū nei tātou; ā, kia hari tātou i te mea ka tū­mana­ko nei tātou ki te korōria o te Atua.

3Ā, ehara i te mea ko tērā anake, engari, kia whaka­mana­mana anō tātou ki ō tātou mamae; e mōhio ana hoki ko tā te mamae e mahi ai he manawa­nui;

4ko tā te manawa­nui he mātau­ranga; ko tā te mātau­ranga he tū­mana­ko;

5e kore anō e whaka­mā i te mea ka tū­mana­ko nei. Kua ringi­hia hoki te aroha o te Atua ki ō tātou ngākau e te Wairua Tapu kua hōmai nei ki a tātou.

6I a tātou hoki e ngoi­kore tonu ana, i te wā i rite ai, ka mate a te Karaiti mō te hunga karakia­kore.

7E mate whaka­uaua hoki tētahi mō te tangata tika; tērā pea ia tētahi e māia rawa kia mate mō te tangata pai.

8Heoi, e whaka­kitea nuitia ana e te Atua tōna aroha ki a tātou, i te mea, i a tātou anō e hara ana, ka mate a te Karaiti mō tātou.

9Nā, i a tātou ka tika nei i ōna toto, tērā noa ake he whaka­ora­nga māna i a tātou i te riri o te Atua.

10Me­he­mea hoki, i te wā he hoa whawhai tātou, ka houhia tā tātou rongo ki te Atua i runga i te mate­nga o tāna Tama, tērā noa ake, i te mea ka mau nei te rongo, he whaka­ora­nga mō tātou, i a ia kua ora nei.

11Ehara hoki i te mea ko tērā anake, engari, e whaka­mana­mana ana anō tātou ki te Atua, he mea nā tō tātou Ariki, nā Īhu Karaiti, nāna nei tēnei hou­hanga rongo ki a tātou.

Ko Ārama rāua ko Īhu Karaiti

12Nā, ka rite ki te pu­tanga mai o te hara ki te ao, he mea nā te tangata kotahi, me te mate anō i runga i te hara; ka hōrapa te mate ki ngā tāngata katoa; nō te mea kua hara katoa.

13I te ao nei hoki te hara, ā tae noa mai te ture; otirā, e kore e whaka­iria te hara i te mea kāhore he ture.

14Ahakoa rā he mana kīngi tō te mate nō Ārama iho anō taea noatia a Mohi, ki te hunga rawa kīhai nei i rite tō rātou hara ki tō Ārama poka kē.

He āhua nei hoki ia nō tēnei i tāria nei.

15Otirā, kīhai i rite ki te hara te mea i hōmai noa mai. Me­he­mea hoki nā te hara o te kotahi i mate ai te toko­maha, wai­hoki tērā noa atu te huanga ki te toko­maha o tō te Atua aroha noa, o te mea hōmai hoki i runga i te aroha noa o te tangata kotahi, o Īhu Karaiti.

16Kīhai anō hoki i rite te mea i hōmai ki tō te kotahi i hara. Nō te kotahi hoki te whaka­wā i tau ai te hē; nō ngā hara maha ia te mea i hōmai noa mai hei whaka­tika.

17Me­he­mea hoki nā te hara o te kotahi i kīngi ai te mate, he mea nā te tangata kotahi; wai­hoki tērā noa ake he kīngi­tanga i runga i te ora mō te hunga ka riro nei i a rātou te aroha noa e hua tonu nei, me te tika i hōmai noa nei, he mea nā te kotahi, arā, nā Īhu Karaiti.

18Āe rā, i te mea nā te hara kotahi i tau ai te hē ki ngā tāngata katoa, wai­hoki nā te tika kotahi i puta ai te mea hōmai noa ki ngā tāngata katoa, e tika ai, e ora ai.

19Nā, i te mea nā te tutū o te tangata kotahi i whai hara ai te toko­maha, wai­hoki nā te ngohe­ngohe o te kotahi, ka meinga te toko­maha kia tika.

20I puta mai te ture kia nui ai te hara; heoi i te hara e nui noa ana, kua hua noa ake te aroha noa;

21he mea hoki, i te hanga ko te hara te kīngi i roto i te mate, kia kīngi hoki ko te aroha noa i runga o te tika ki te ora tonu, he mea­tanga nā Īhu Karaiti, nā tō tātou Ariki.