EPEHA 3 - New Testament with modified orthography(MRNT)

Ngā Mahi a Paora mō ngā Tauiwi

1Nā konei tāku, tā Paora, he here­here nei ahau nā Karaiti Īhu, hei mahi ki a koutou ki ngā tauiwi;

2kua rongo pea koutou ki te mahi tuari i te aroha noa o te Atua kua hōmai nei ki ahau, hei mea ki a koutou,

3arā, tāna whaka­kite­nga, tāna whaka­atu­ranga i te mea ngaro ki ahau. He pērā hoki me ēnā kupu toru­toru i tuhi­tuhia nā e ahau i mua;

4ka oti i a koutou tēnā te kōrero, ka mōhio koutou ki tōku mātau­ranga ki te mea ngaro a te Karaiti.

5Kīhai nei i whaka­kitea i ērā atu whaka­tupu­ranga ki ngā tama a te tangata, kīhai i pēnei me te whaka­kite­nga ināia­nei e te Wairua ki āna āpō­toro tapu rātou ko ngā poro­piti;

6arā, mō ngā tauiwi kia uru tahi ki ngā taonga, kia tinana kotahi, kia whi­whi ngā­tahi ki āna mea i whaka­ari i mua i roto i a te Karaiti, he mea­tanga nā te rongo­pai.

7Mō reira ahau i meinga nei hei minita, i runga i tā te aroha noa o te Atua, i hōmai nei ki ahau, he mahi­nga nā tōna kaha.

8I hōmai ki ahau, ki te mea iti iho i te iti rawa o te hunga tapu katoa, tēnei aroha noa, kia kauwhau­tia e ahau i roto i ngā tauiwi te taonga o te Karaiti e kore nei e taea te rapu;

9kia whaka­kitea anō hoki e ahau ki ngā tāngata katoa te whi­whi­nga tahi­tanga ki te mea ngaro, ki te mea i huna nei ina­mata noa atu i roto i te Atua, nāna nei i hanga ngā mea katoa;

10kia ai te hāhi ināia­nei hei whaka­atu ki ngā ranga­tira­tanga, ki ngā mana i ngā wāhi o te rangi, i te maha o ngā whaka­aro nui o te Atua.

11I runga i tāna i whaka­takoto ai i mua noa atu, he mea mahi nāna i roto i tō tātou Ariki, i a Karaiti Īhu;

12kei roto nei i a ia tō tātou māia­tanga me tō tātou whaka­tata­nga atu i te mea e ū nei te whaka­aro, he mea­tanga nā te whaka­pono ki a ia.

13Koia ahau ka mea nei kia kaua koutou e ngākau­kore i ōku tūkino­tanga mō koutou; ko tō koutou korōria hoki tēnei.

Te Aroha o te Karaiti

14Nō konei i tūturi ai ōku turi ki te Matua,

15nōna nei te ingoa e huaina ana ki ngā hapū katoa i te rangi, i te whenua.

16Kia rite ki te nui rawa o tōna korōria he hōmai­tanga māna ki a koutou, kia pakari ai a roto i a koutou i te kaha o tōna Wairua;

17kia noho ai a te Karaiti ki roto ki ō koutou ngākau, he mea whaka­pono; ā, i te mea kua whai paki­aka, me te whai tū­ranga mō koutou i roto i te aroha.

18Kia kaha ai koutou me te hunga tapu katoa ki te whaka­aro i te whānui, i te roa, i te hōhonu, i te tike­tike,

19ā, kia mōhio ki te aroha o te Karaiti, e kore nei e taea te whaka­aro; kia tino kī rawa ai koutou i te Atua.

20Nā, ki a ia, e kaha nei ki te mahi i ngā mea nui whaka­hara­hara, nui noa atu i ngā mea katoa e īnoi ai, e whaka­aro ai tātou, he pēnei anō me te kaha e mahi nei i roto i a tātou,

21waiho atu i a ia te korōria i roto i te hāhi i runga i a Karaiti Īhu, ā taea noatia ngā whaka­tupu­ranga katoa, ake ake. Āmine.