RUKA 3 - New Testament with modified orthography(MRNT)

Te Kauwhautanga a Hoani Kaiiriiri(Matiu 3.1-12; Māka 1.1-8; Hoani 1.19-28)

1Nā, i te tekau mā rima o ngā tau o te ranga­tira­tanga o Tai­piria Hīhā, i a Ponotio Pirato e kāwana ana i Hūria, i a Herora e teta­raki ana i Kariri, i tōna teina hoki, i a Piripi, e teta­raki ana i Ituria, i te whenua hoki o Tarakonaiti, ko Raihānia, e teta­raki ana i Apirini;

2ko Anaha rāua ko Kaiapa ngā tohu­nga nui, ka puta te kupu a te Atua ki a Hoani tama a Hakaraia ki te koraha.

3Nā, ka haere mai ia ki ngā wāhi katoa e pātata ana ki Horano, ka kauwhau i te iri­iri rīpe­netā hei muru­nga hara.

4I pērā anō ia me te mea i tuhi­tuhia ki te puka­puka o ngā kōrero a Ihāia poro­piti:

“He reo nō tētahi i te koraha e karanga ana:

‘Whaka­paia te hua­rahi o te Ariki, whaka­tikaia ōna ara!

5Ka whaka­kīa ngā awa­awa katoa,

ka whaka­horoa ngā maunga me ngā puke­puke katoa.

E meinga hoki kia tika ngā wāhi kōpiko­piko,

ko ngā wāhi tara­tara hei ara māeneene.

6Ā, e kite ngā kiko­kiko katoa i te whaka­ora­nga a te Atua!’ ”

7Nā reira, ka mea ia ki ngā mano i haere kia iri­iria e ia, “E te uri nākahi, nā wai koutou i whaka­mahara kia rere i te riri meāke puta mai?

8Nā, whaka­puta­ina ngā hua e rite ana ki ō te rīpe­netā; kei anga kei mea i roto i a koutou, ‘Ko Āperahama tō tātou matua.’ Ko tāku kupu hoki tēnei ki a koutou, e āhei ana anō i te Atua te whaka­ara tama­riki ake mā Āperahama i roto i ēnei kōhatu.

9Nā, ināia­nei anō kei te pā te toki ki te paki­aka o ngā rākau; ki te kāhore tētahi rākau e hua i te hua pai, ka tuaina, ka makā ki te ahi.”

10Nā, ka ui ngā mano ki a ia, ka mea, “Me aha rā mātou?”

11Nā, ka whaka­hoki ia, ka mea ki a rātou, “Ko te tangata i ngā koti e rua, kia hoatu ki te tangata kāhore ōna; me te tangata he kai tāna, kia pērā anō.”

12Nā, ka haere mai hoki ngā pupiri­kana kia iri­iria ka mea ki a ia, “E te kai­whaka­ako, me aha mātou?”

13Ka mea ia ki a rātou, “Kei nui ake i ngā mea i whaka­ritea mā koutou tā koutou e tango ai.”

14Ka ui anō hoki ngā hōia ki a ia, ka mea, “Me aha hoki mātou?”

Nā, ko tāna mea­tanga ki a rātou, “Kaua e tūkino­tia tētahi, kaua e muru noa i tētahi mea; kāti anō mā koutou ko ō koutou utu.”

15Nā, i te iwi e tatari ana e whaka­aro­aro katoa ana i roto i ō rātou ngākau ki a Hoani, me­he­mea ko te Karaiti ia.

16Ka whaka­hoki a Hoani, ka mea ki a rātou katoa, “Ko ahau nei, he iri­iri tāku i a koutou ki te wai; kei te haere mai ia tētahi he kaha rawa ake i ahau, e kore ahau e tāu hei wewete i te here o ōna hū. Māna koutou e iri­iri ki te Wairua Tapu, ki te kāpura.

17Ko tāna mea tahi kei tōna ringa, hei tino tahi i tāna patu­nga wīti, hei kohi hoki i te wīti ki roto ki tāna whare wīti; ko te pāpapa ia e tahuna ki te kāpura e kore e tineia.”

18He maha atu anō āna kupu whaka­hau i kauwhau ai ia i te rongo­pai ki te iwi.

19Otirā, nā tōna riri­nga i a Herora teta­raki mō Herōriaha, mō te wahine a tōna tua­kana, a Piripi, ā, mō ngā kino katoa hoki i meinga e Herora;

20ka āpiti­tia atu e Herora tēnei ki runga i ērā katoa, tū­taki­na ana e ia a Hoani ki te whare here­here.

Te Iriiringa o Īhu(Matiu 3.13-17; Māka 1.9-11)

21Nā, ka poto katoa te iwi te iri­iri, i a Īhu kua oti te iri­iri, ā, i a ia e īnoi ana, ka tu­whera te rangi,

22ā, ka heke iho te Wairua Tapu, ka heke tinana iho, ānō he kūkupa, ki runga ki a ia, ā, ka puta mai he reo nō te rangi, e mea ana, “Ko koe tāku Tama i aroha ai, tāku i āhua­reka ai.”

Te Whakapapa o Īhu(Matiu 1.1-17)

23Nā, ko Īhu, i a ia i tīmata ai ki te whaka­ako, kei te toru tekau ōna tau, ā, ki tā te tangata kī, he tama ia nā Hōhepa tama a Heri,

24ko ia he tama nā Matata, tama a Rīwai, tama a Mereki, tama a Iana, tama a Hōhepa,

25tama a Matatiaha, tama a Āmoho, tama a Nahumu, tama a Eheri, tama a Nakai,

26tama a Māta, tama a Matatiaha, tama a Hemei, tama a Hōhepa tama a Hūrā,

27tama a Hoana, tama a Reha, tama a Herupapera, tama a Haratiera, tama a Neri,

28tama a Mereki, tama a Ari, tama a Kohama, tama a Eremorama, tama a Ere,

29tama a Hohe, tama a Eriētere, tama a Horimi, tama a Matata, tama a Rīwai,

30tama a Himiona, tama a Hūrā, tama a Hōhepa tama a Honana, tama a Eriakimi,

31tama a Merea, tama a Menana, tama a Matata, tama a Nātana, tama a Rāwiri,

32tama a Hehe, tama a Ōpere, tama a Poaha, tama a Haramono, tama a Nāhona,

33tama a Aminarapa, tama a Arame tama a Heteromo, tama a Parete, tama a Hūrā,

34tama a Hākopa, tama a Īhaka, tama a Āperahama, tama a Tera, tama a Nahora,

35tama a Haruku, tama a Rakau, tama a Pereke, tama a Ēpere, tama a Haraha,

36tama a Kai­nana, tama a Arapahata, tama a Hema, tama a Noa, tama a Rameka,

37tama a Matuhara, tama a Ēnoka, tama a Iarere, tama a Marerēre, tama a Kai­nana,

38tama a Ēnoha, tama a Heta, tama a Ārama, a te tama a te Atua.