MĀKA 10 - New Testament with modified orthography(MRNT)

Ka Whakaako a Īhu mō te Whakarerenga(Matiu 19.1-12; Ruka 16.18)

1Nā, ka whaka­tika ia i reira, haere ana ki ngā wāhi o Hūria ki tērā taha o Horano. Nā, ka hui­hui mai anō ngā mano ki a ia; ka whaka­ako anō ia i a rātou, ko tāna tikanga hoki tērā.

2Nā, ka haere mai ngā Parihi, ka ui ki a ia, “He mea tika rānei kia whaka­rere te tangata i tāna wahine?” He whaka­mā­tau­tau hoki mōna.

3Nā, ka whaka­hoki ia, ka mea ki a rātou, “He aha tā Mohi i mea ai ki a koutou?”

4Ka kī rātou, “I tukua e Mohi kia tuhi­tuhia he puka­puka whaka­rere, ka whaka­rere ai.”

5Nā, ka whaka­hoki a Īhu, ka mea ki a rātou, “Nā te pakeke o ō koutou ngākau i tuhi­tuhia ai e ia tēnei kupu ako ki a koutou.

6I te oroko­hanga­nga ia, ‘I hangā rāua e te Atua he tāne, he wahine.

7Mō konei ka mahue i te tangata tōna pāpā me tōna whaea, ka piri ki tāna wahine;

8hei kiko­kiko kotahi hoki rāua toko­rua.’ Nā, heoi anō tō rāua toko­rua­tanga, engari, kotahi anō kiko­kiko.

9Nā, ko ā te Atua i hono ai, kaua e wehea e te tangata.”

10Ā, i te whare ka ui anō āna ākonga ki a ia ki taua mea.

11Ka mea ia ki a rātou, “Ki te whaka­rere tētahi i tāna wahine, ā, ka mārena i tētahi atu, e pūremu ana ia, e hara ana ki tērā.

12Ki te whaka­rere hoki te wahine i tāna tāne, ā, ka mārena­tia ki tētahi atu, e pūremu ana ia.”

Ka Manaakitia e Īhu ngā Tamariki Nonohi(Matiu 19.13-15; Ruka 18.15-17)

13Nā, ka kawea mai ki a ia ētahi tama­riki no­nohi, kia pā ai ia ki a rātou; otirā, ka rīria e ngā ākonga te hunga nāna i kawe mai.

14Nō te kite­nga ia o Īhu, ka riri, ka mea ki a rātou, “Tukua ngā tama­riki no­nohi kia haere mai ki ahau, kaua hoki rātou e āraia atu; nō ngā pēnei hoki te ranga­tira­tanga o te Atua.

15He pono tāku e mea nei ki a koutou, ki te kāhore e rite te tango a tētahi i te ranga­tira­tanga o te Atua ki tā te tama­iti nohi­nohi, e kore ia e tomo ki roto.”

16Nā, oko­okona ana rātou e ia, whaka­pā­kia iho ōna ringa ki a rātou, manaaki­tia ana rātou.

Te Tangata Whai Taonga(Matiu 19.16-30; Ruka 18.18-30)

17Nā, i a ia e haere ana i te hua­rahi, ka oma mai tētahi, ka tuku iho i ngā turi ki a ia, ka ui, “E te Kai­whaka­ako pai, me aha ahau ka whi­whi ai ki te ora tonu?”

18Nā, ka mea a Īhu ki a ia, “He aha ahau i kīa ai e koe he pai? Kāhore tētahi i pai, kotahi anake, ko te Atua.

19E mātau ana koe ki ngā ture, ‘Kaua e pūremu. Kaua e patu tangata. Kaua e tāhae. Kaua e whaka­pae teka. Kaua e kaiā. Whaka­hōnore­tia tōu pāpā me tōu whaea.’ ”

20Nā, ka whaka­hoki tērā, ka mea ki a ia, “E te Kai­whaka­ako, kua rite katoa ēnei mea i ahau nō tōku tama­riki­tanga ake.”

21Nā, ka ti­tiro a Īhu ki a ia, ka aroha ki a ia, ka mea ki a ia, “Kotahi te mea kāhore nei i a koe. Haere, hokona āu mea, ka hoatu ki ngā rawa­kore, ā, e whai taonga koe ki te rangi. Kātahi ka haere mai, ka aru i ahau.”

22Otirā, ka tuku tōna mata i taua kupu, ā, haere pōuri atu ana; he maha hoki ōna taonga.

23Nā, ka tiro­tiro a Īhu, ka mea ki āna ākonga, “Anō te whaka­uaua o te tapoko o te hunga taonga ki te ranga­tira­tanga o te Atua!”

24Nā, ka mīharo ngā ākonga ki āna kupu. Otirā, ka whaka­hoki anō a Īhu, ka mea ki a rātou, “E tama mā, anō te whaka­uaua o te tapoko ki tō te Atua ranga­tira­tanga o te hunga e whaka­whiri­naki ana ki ngā taonga!

25Erangi, te haere o te kāmera rā te kōwhao o te ngira he mea takoto noa, he whaka­uaua rawa ia te haere o te tangata taonga ki roto ki te ranga­tira­tanga o te Atua.”

26Nā, rahi rawa tō rātou mīharo, ka mea ki a rātou anō, “Ko wai rā e ora?”

27Nā, ka ti­tiro a Īhu ki a rātou, ka mea, “E kore tēnei e taea e te tangata, ki te Atua ia ka taea; e taea hoki ngā mea katoa e te Atua.”

28Kātahi, ka anga a Pita, ka mea ki a ia, “Nā, kua mahue nei i a mātou ngā mea katoa, kua aru nei i a koe.”

29Nā, ka whaka­hoki a Īhu, ka mea, “He pono tāku e mea nei ki a koutou, ki te whaka­rērea e tētahi tangata, he whare, he tēina, he tuā­hine, he whaea, he pāpā, he tama­riki, he māra, he whaka­aro nōna ki ahau, ki te rongo­pai hoki,

30inā, tā­taki­rau ngā mea e riro i a ia, i tēnei wā, he whare, he tēina, he tuā­hine, he whaea, he tama­riki, he māra, me te whaka­toi; ā, i te ao meāke puta, he ora tonu.

31He toko­maha ia ō mua e waiho ki muri; ko ō muri hoki ki mua.”

Ngā Kōrerotanga a Īhu mō Tōna Matenga(Matiu 20.17-19; Ruka 18.31-34)

32Nā, i te hua­rahi rātou e haere ana ki Hiruhārama, me te haere anō a Īhu i mua i a rātou; nā, e mīharo ana rātou, e aru mataku ana. Heoi, ka mau anō ia i te tekau mā rua, ka anga, ka kōrero ki a rātou i ngā mea meāke pā ki a ia.

33“Nana, e haere ana tēnei tātou ki Hiruhārama; ā, ka tukua te Tama a te tangata ki ngā tohu­nga nui, ki ngā karai­pi; ka kīa e rātou kia mate, ka tuku hoki rātou i a ia ki ngā tauiwi;

34ka tāwaia ia, ka tu­whai­na, ka whiua, ka whaka­matea, ā, i te toru o ngā rā, ka ara.”

Te Īnoi a Hēmi rāua ko Hoani(Matiu 20.20-28)

35Nā, ka whaka­tata mai ki a ia a Hēmi rāua ko Hoani, ngā tama a Heperi, ka mea, “E te Kai­whaka­ako, e hia­hia ana māua kia meatia e koe tā māua e īnoi ai.”

36Nā, ka mea ia ki a rāua, “He aha tā kōrua e hia­hia ai kia meatia e ahau mā kōrua?”

37Ka mea rāua ki a ia, “Tukua ki a māua kia noho, tētahi ki tōu matau, tētahi ki tōu mauī, i tōu korōria.”

38Nā, ko te mea­tanga a Īhu ki a rāua, “Kāhore kōrua e mātau ki tā kōrua e īnoi nei; e āhei rānei kōrua te inu i te kapu ka inumia nei e ahau? Kia iri­iria ki te iri­iri­nga ka iri­iria nei ahau?”

39Ka mea rāua ki a ia, “E āhei anō.”

Ka kī atu a Īhu ki a rāua, “E inu anō kōrua i te kapu ka inumia e ahau; e iri­iria kōrua ki te iri­iri­nga e iri­iria ai ahau.

40Tēnā, ko te noho ki tōku matau, ki tōku mauī rānei, ehara i te mea māku e hoatu, engari, ka riro i te hunga i whaka­ritea nei mō rātou.”

41Ā, nō te rongo­nga o te tekau, ka anga ka riri ki a Hēmi rāua ko Hoani.

42Nā, karanga­tia ana rātou e Īhu ki a ia, ka mea ki a rātou, “E mahara ana koutou, ko te hunga e kīa ana he kāwana nō ngā tauiwi hei whaka­tupu ranga­tira ki a rātou; ko ō rātou tāngata rarahi hoki hei aki­aki i a rātou.

43Otirā, e kore e pērā i roto i a koutou; engari, ki te mea tētahi kia whaka­tupu tangata rahi i roto i a koutou, me whaka­tupu kai­mahi ia mā koutou.

44Ki te mea hoki tētahi o koutou kia whaka­tupu tino tangata, me whaka­tupu pono­nga ia mā te katoa.

45Kīhai nei hoki te Tama a te tangata i haere mai kia mahia he mea māna, engari, kia mahi ia, kia tuku hoki i a ia kia mate hei utu mō ngā tāngata toko­maha.”

Ka Whakaorangia e Īhu a Paratimiuha he Matapō(Matiu 20.29-34; Ruka 18.35-43)

46Nā, ka tae rātou ki Heriko. A, i a ia e haere atu ana i roto i Heriko, rātou ko āna ākonga me te mano tini, e noho ana a Paratimiuha, tama a Timiuha, he matapō, i te taha o te ara, ki te tono mea māna.

47Ā, i tōna rongo­nga ko Īhu o Nahareta tēnā, ka anga ia, ka karanga, ka mea, “E Īhu, e te Tama a Rāwiri, kia aroha ki ahau.”

48Ā, he toko­maha ki te riri i a ia kia noho puku, heoi, tino rahi ake tāna karanga, “E te Tama a Rāwiri, kia aroha ki ahau.”

49Nā, ka tū a Īhu, ka mea kia karanga­tia ia.

Ā, karanga­tia ana e rātou te matapō, ka mea ki a ia, “Kia māia, whaka­tika; e karanga ana ia ki a koe.”

50Nā, ka whaka­rērea e ia tōna kākahu, ā, whaka­tika ana, haere ana ki a Īhu.

51Nā, ka oho a Īhu, ka mea ki a ia, “He aha tāu e hia­hia nā kia meatia e ahau māu?”

Ka kī te matapō ki a ia, “E te Ariki, kia ti­tiro ahau.”

52Ka mea a Īhu ki a ia, “Haere; nā tōu whaka­pono koe i ora ai.”

Nā, ti­tiro tonu iho ia, aru ana i a Īhu i te ara.