PIRIPAI 4 - New Testament with modified orthography(MRNT)

He Tohutohu

1Heoi, e ōku tēina aroha, e hia­hia­tia atu nei, e tōku hari­nga, e tōku karauna, tēnā rā, e tū i runga i te Ariki, e ōku hoa aroha.

2He kupu tēnei nāku ki a Ūoria, he kupu anō tēnei ki a Hina­tiki, kia kotahi tō rāua whaka­aro i roto i te Ariki.

3Nā, he tohe tēnei nāku ki a koe, e tōku hoa pono ki te mahi, ko koe hei whaka­māmā i aua wāhine, he hunga rāua i uru tahi me ahau ki te tohe ki ngā mea o te rongo­pai, me Keremeneta anō, me ērā atu hoki o ōku hoa mahi, kei roto nei i te puka­puka o te ora ō rātou ingoa.

4Kia hari tonu i roto i te Ariki; ko tāku kupu anō tēnei, Kia hari!

5Kia mōhio­tia tō koutou ngākau ngā­wari e ngā tāngata katoa. Kua tata te Ariki.

6Kaua e mā­nuka­nuka ki tētahi mea; engari i ngā mea katoa whaka­atu­ria ki te Atua ngā mea e matea ai e koutou, i runga i te kara­kia, i te īnoi, me te whaka­whetai hoki.

7Ā, mā te mārie o te Atua, e kore nei e taea te whaka­aro, e tiaki ō koutou ngākau, ō koutou hine­ngaro, i roto i a Karaiti Īhu.

8Heoi, e ōku tēina, ko ngā mea e pono ana, ko ngā mea e whai hōnore ana, ko ngā mea e tika ana, ko ngā mea e kino­kore ana, ko ngā mea e āta­ahua ana, ko ngā mea e kōrero­tia paitia ana; ki te mea he pai, ki te mea he whaka­moe­miti; whaka­aroa ēnei mea.

9Ko ngā mea i whaka­akona ki a koutou, i riro i a koutou, i rongo ai, i kite ai rānei ki ahau, mahia ēnei; ā, ka noho te Atua o te rangi­mārie ki a koutou.

He Mihi Whakawhetai mō te Koha

10Nui atu ia tōku hari i roto i te Ariki mō tō koutou whaka­aro ki ahau kātahi nei ka pihi ake anō; he mea anō ia i whaka­aroa e koutou i mua, otiia, kīhai i whai mea­tanga.

11Ehara tāku e kōrero nei i te mea mō te rawa­kore; kua ako hoki ahau, ahakoa kei hea ahau e noho ana, kia tatū tōku ngākau i reira.

12Ko te whaka­hoki i ahau ki raro, mātau tonu i ahau; ko te whai rawa, mātau tonu i ahau; i ngā wāhi katoa, i ngā mea katoa, ka oti ahau te whaka­ako, kia mākona, ā, kia mate i te kai, kia whai rawa, ā, kia rawa­kore rānei.

13Ka taea e ahau ngā mea katoa i roto i a te Karaiti e whaka­kaha nei i ahau.

14He ahakoa rā, he pai tā koutou mahi, i a koutou i uru nei ki tōku mate.

15Nā, e mātau ana anō rā koutou e ngā Piripai, i te tīma­tanga o te rongo­pai, i ahau i haere atu ai i Makeronia, kāhore he hāhi i uru ki tāku tikanga; arā mō tētahi mea kia tukua atu, kia hōmai rānei, ko koutou anake.

16I Teharonika anō hoki kotahi, e rua, ā, koutou hōmai­tanga i ngā mea i matea e ahau, kia kawea ake māku.

17Ehara i te mea e whai ana ahau i tētahi mea kia hōmai; engari e whai ana ahau kia maha ake ngā hua hei mea mā koutou.

18Otiia, kei te whi­whi ahau i ngā mea katoa, hira noa ake hoki āku; kua kī ahau, kua tae mai nei i a Epaporitu ngā mea i ahu mai i a koutou, he kakara reka, he patu­nga tapu e manako­hia ana, ko tā te Atua e āhua­reka mai ai.

19Ā, mā tōku Atua e mea kia hua ngā mea katoa e matea ana e koutou, kia rite ki te nui o tōna korōria, i roto i a Karaiti Īhu.

20Nā, waiho i te Atua, arā i tō tātou Matua, te korōria ake ake. Āmine.

Poroporoaki

21Oha atu ki te hunga tapu katoa i roto i a Karaiti Īhu. He oha atu tēnei ki a koutou nā ngā tēina i ahau nei.

22He oha atu tēnei ki a koutou nā te hunga tapu katoa, tēnei rawa ia tā te hunga o te whare o Hīhā.

23Kia tau te aroha noa o tō tātou Ariki, o Īhu Karaiti ki a koutou katoa. Āmine.