ROMA 3 - New Testament with modified orthography(MRNT)

1Ha, he aha rā te painga i hua ki te Hūrai? He aha te rawa o te kotinga?

2He nui rā i ngā mea katoa. Ko te tua­tahi, kua ākona rātou ki ngā kupu a te Atua.

3Ka pēhea, me­he­mea kāhore he whaka­pono o ētahi? E taka rānei tō te Atua pono i tō rātou whaka­pono kore?

4Kāhore rāpea! Engari ko te Atua kia kitea he pono, ko ngā tāngata katoa he teka kau; ko te mea hoki ia i tuhi­tuhia,

“Kia tika ai tāu i tāu kōrero­tanga,

kia puta ai tāu ina whaka­wā­kia koe.”

5Ha, ki te mea nā tō tātou hē i kitea nuitia ai tō te Atua tika, me pēhea he kupu mā tātou? E hē ana rānei te Atua i a ia e whaka­pā ana i te riri? (He kupu tangata tēnei nāku.)

6Kāhore rāpea! Pēnei me pēhea te Atua e whaka­wā ai i te ao?

7Nā, ki te mea nā tōku teka i hira rawa ai tō te Atua pono hei korōria mōna; he aha ahau i whaka­hē­ngia tonu­tia ai ānō hei tangata hara?

8He aha hoki tē pēnei ai, ā, ko te kupu whaka­pae teka tēnei mō mātou, ā, ki tā ētahi ko tā mātou kupu tēnei, “Tātou ka mahi i te kino, kia puta ai he pai”? Tika tonu te tau o te hē ki a rātou.

Kāhore he Tangata e Tika ana

9He aha koia? He pai ake rānei tō mātou wāhi i tō rātou? Kāhore rā hoki; kua oti hoki te whaka­pā e mātou i mua he hē ki ngā Hūrai, ki ngā Kariki, kei raro katoa rātou i te hara;

10ko te mea hoki ia i tuhi­tuhia:

“Kāhore he tangata tika, kāhore kia kotahi;

11kāhore he tangata e mātau ana,

kāhore he tangata e rapu ana i te Atua.

12Kua peka kē rātou katoa, kua kino ngā­tahi;

kāhore he tangata e mahi ana i te pai,

kāhore rawa kia kotahi.

13He urupā puare noa tō rātou koro­koro;

e pati­pati ana ō rātou arero;

kei roto i ō rātou ngutu te wai whaka­mate o ngā nākahi;

14kī tonu ō rātou māngai i te kanga, i te nana­kia.

15Ko ō rātou wae­wae, hohoro tonu ki te whaka­heke toto;

16he whaka­ngaro, he ngākau pōuri, kei ō rātou ara;

17kāhore hoki rātou i mōhio ki te ara o te rangi­mārie.

18Kāhore he wehi o te Atua i mua i ō rātou kanohi.”

19Nā, e mātau ana tātou ki ngā kupu o te ture, e kōrero ana ki te hunga i te ture, kia kopia ai ngā māngai katoa, kia whaka­wā­kia ai te ao katoa e te Atua.

20Nō te mea kāhore he mahi o te ture e tika ai tētahi kiko­kiko i tōna aro­aro; mā roto mai i te ture te mātau­ranga ki te hara.

Te Tikanga a te Atua hei Whakatika i a Tātou

21Otiia, kua whaka­kitea ināia­nei he tika a te Atua, motu kē i te ture, he mea whaka­atu nā te ture, nā ngā poro­piti;

22arā, ko te tika a te Atua e nā runga mai ana i te whaka­pono ki a Īhu Karaiti ki te hunga katoa e whaka­pono ana. Kāhore hoki he poka­nga kētanga;

23kua hara katoa hoki, ā, kāhore e taea e rātou te korōria o te Atua;

24he mea whaka­tika utu­kore nā tōna aroha noa, i runga i tā Karaiti Īhu hoko­nga;

25ko ia hoki tā te Atua i whaka­ari ai hei whaka­mārie, i runga i te whaka­pono, he mea nā ōna toto. Kia whaka­kitea ai tōna tika, i te mea ka whaka­pahemo­tia atu ngā hara ō mua, he mea hoki nā te manawa­nui o te Atua;

26hei whaka­kite i tōna tika i tēnei wā nei anō; he mea kia tika ai ia anō, me te kai­whaka­tika i te tangata e whaka­pono ana ki a Īhu.

27Nā, kei hea te whaka­mana­mana? Kua āraia atu. E tēhea rite­nga ture? E tō ngā mahi? Kāhore, engari, e te ture o te whaka­pono.

28Koia mātou ka mea ai, kei te whaka­pono he tika mō te tangata, motu kē i ngā mahi o te ture.

29Ko te Atua oti te Atua o ngā Hūrai anake? Ehara rānei ia i te Atua o ngā tauiwi hoki? Āe rā, o ngā tauiwi anō hoki;

30ki te mea ia he kotahi te Atua, ā, māna e whaka­tika te kotinga i runga i te whaka­pono, me te kotinga­kore ina whaka­pono.

31E taka rānei te ture i tā mātou, arā i te whaka­pono? Kāhore rāpea! Engari, nā tā mātou i ū ai te ture.