2 KORINITI 9 - New Testament with modified orthography(MRNT)

Āwhinatia te Hunga Rawakore

1Nā, mō te minita­tanga ki te hunga tapu, kāhore noa he tikanga i tuhi­tuhi atu ai ahau ki a koutou.

2E mōhio ana hoki ahau ki tō koutou ngākau hihiko, i whaka­mana­mana­tia ai koutou e ahau ki ngā tāngata o Makeronia, arā, ko tā Akāia kua rite noa ake i tērā tau rā anō; ā, he toko­maha o rātou i oho i tō koutou ngākau hihiri.

3Heoi, kua tonoa atu nei e ahau ngā tēina, kei whaka­kāhore­tia tēnei wāhi o tāku whaka­mana­mana ki tā koutou mahi; kia rite ai tā koutou, kia pērā ai me tāku i mea ai.

4Kei tūpono, ka haere atu i ahau ētahi o Makeronia, ā, ka roko­hanga atu kāhore anō kia rite noa tā koutou, nā, ko te whaka­mā mō mātou, e kore mātou e kī mō koutou, i tēnei whaka­mana­mana e kaha nei.

5Koia ahau i whaka­aro ai he tika kia whaka­haua ngā tēina, kia haere atu rātou i mua ki a koutou, kia wawe te rite i a rātou tēnei manaaki a koutou kua kōrero­tia rā, kia noho rite, kia tū-ā-manaaki ai, kei rite ki te mea e manawa­pā­tia ana.

6Ko tāku ia tēnei, he toru­toru a tētahi i rui ai, he toru­toru anō āna e kokoti ai; ā, ko te mea he maha āna i rui ai, he maha anō āna e kokoti ai.

7Kia rite te mahi a ia tangata ki tāna i whaka­aro ai i roto i tōna ngākau; kaua e tū-ā-pōuri, kaua e whaka­uaua. Ko tā te Atua hoki e aroha ai, ko te tangata ringa māhora­hora.

8E taea anō hoki e te Atua te mea kia hira ngā aroha noa katoa ki a koutou; nā, i te mea ka ranea nā ō koutou taonga i ngā mea katoa i ngā wā katoa, kia hira anō ā koutou mahi pai katoa.

9Kia rite ai ki te mea i tuhi­tuhia:

“Kua tī­tari­taria e ia, kua hoatu e ia ki te hunga rawa­kore;

he pūmau tonu tōna tika ake ake.”

10Nā, mā te kai­hōmai i te pura­pura ki te kai­whaka­tō, i te taro hoki hei kai, e hōmai, e mea kia maha tā koutou e whaka­tō ai, e whaka­nui hoki ngā hua o tō koutou tika;

11me te hua anō ō koutou taonga i ngā mea katoa hei oha­oha, e puta ai i a mātou ngā whaka­whetai ki te Atua.

12Nā tēnei mahi hoki e minita­tia nei i whi­whi ai te hunga tapu ki ngā mea i kore i a rātou, ā, nā reira anō i hua noa atu ai ngā whaka­whetai ki te Atua.

13Nā te mea hoki ka kitea koutou i tēnei mahi minita, ka whaka­korōria rātou i te Atua mō koutou kua whaka­ae nei, kua ngohe­ngohe nei ki te rongo­pai o te Karaiti, ā, mō tō koutou pono ki ā koutou oha­oha ki a rātou me te katoa.

14I a rātou anō e īnoi ana mō koutou, me te kōingo anō rātou ki a koutou, he whaka­aro hoki ki te aroha noa o te Atua ka nui rawa nei ki a koutou.

15Me whaka­whetai ki te Atua mō tāna mea hōmai noa, e kore nei e taea te kōrero!