HOANI 6 - New Testament with modified orthography(MRNT)

Ka Whāngaia e Īhu te Rima Mano(Matiu 14.13-21; Māka 6.30-44; Ruka 9.10-17)

1Muri iho i ēnei mea ka whiti atu a Īhu i te moana o Kariri, (arā, i te moana o Tai­piria.)

2Ā, he rahi te hui i aru i a ia, i kite hoki rātou i āna mere­kara i mea ai ia ki ngā tūroro.

3Nā, ka haere a Īhu ki runga i te maunga, ā, noho ana i reira rātou ko āna ākonga.

4Kua tata hoki te Kape­nga, te hākari a ngā Hūrai.

5Ā, nō te maranga­tanga ake o ngā kanohi o Īhu, ka kite i te rahi o te hui e haere mai ana ki a ia; ka mea ia ki a Piripi, “Ko hea tātou hoko ai i ētahi taro, kia kai ai ēnei?”

6I pēnei ai tāna kī hei whaka­mātau mōna; i mōhio hoki ia ki tāna e mea ai.

7Ka mea a Piripi ki a ia, “E kore e ranea mā rātou ngā taro o ngā pene e rua rau, kia whi­whi ai tēnei, tēnei o rātou i tētahi wāhi iti.”

8Ka mea tētahi o āna ākonga ki a ia, a Anaru, teina o Haimona Pita,

9“He tama­iti tēnei, e rima āna taro pāre, e rua ika no­nohi. Heoi, hei aha ēnei mā tēnei ope nui?”

10Nā, ka mea a Īhu, “Meinga ngā tāngata kia noho.” (He nui hoki te taru­taru i taua wāhi.) Nā, noho ana ngā tāne ki raro, te toko­maha me te mea e rima mano.

11Nā, ka mau a Īhu ki ngā taro; ā, ka mutu te whaka­whetai, ka tuwha atu ki te hunga e noho rā; me ngā ika anō, tā rātou i pai ai.

12Ā, nō ka mākona rātou, ka mea ia ki āna ākonga, “Kohiko­hia ngā toenga o ngā whati­whatinga, kei mau­mau­ria tētahi wāhi.”

13Nā, kohiko­hia ana e rātou, ā, whaka­kīa ana ngā kete tekau mā rua ki ngā whati­whatinga o ngā taro pāre e rima, ki ngā toenga a ngā tāngata i kai rā.

14Ā, i te kite­nga o aua tāngata i te mere­kara i meatia e Īhu, ka kī rātou, “Ko ia anō tēnei, ko te poro­piti e haere mai ana ki te ao.”

15Nā, ka mahara a Īhu, meāke rātou haere mai ki te tango i a ia, ki te whaka­kīngi i a ia, nā, maunu ana anō ia ki te maunga, ko ia anake.

Ka Haere a Īhu i runga i te Moana(Matiu 14.22-33; Māka 6.45-52)

16Ā, nō ka ahi­ahi, ka haere āna ākonga ki te moana.

17Nā, ka eke rātou ki te kai­puke, ka whaka­whiti ki tāwāhi o te moana, ki Kaperenauma. Ā, kua pōuri noa ake, kāhore anō a Īhu kia tae noa mai ki a rātou.

18Nā, ko te tū­ranga o te moana, he nui hoki nō te pū­hanga o te hau.

19Nā, i tō rātou hoenga atu, e rua tekau mā rima, e toru tekau rānei pā­ronga, ka kite i a Īhu e haere māori ana i runga i te moana, e whaka­tata ana ki te kai­puke; nā ka mataku rātou.

20Nā, ka mea ia ki a rātou, “Ko ahau tēnei, aua e wehi.”

21Nā, ka mea rātou kia eke ia ki te kai­puke; ā, kīhai i aha kua ū te kai­puke ki te wāhi i hoe ai rātou.

Ka Kimi ngā Tāngata i a Īhu

22I te aonga ake, ka mahara te mano e tū ana ki tērā taha o te moana, kāhore he poti kē atu o reira, ko tērā anake i eke ai āna ākonga, kīhai hoki a Īhu i eke tahi rātou ko āna ākonga ki te poti, engari, ko āna ākonga anake i haere.

23He poti kē rā ia i ū mai i Tai­piria ki pahaki atu o te wāhi i kai ai rātou i te taro i tā te Ariki whaka­whetai­nga.

24Ā, i te kite­nga o te mano kāhore a Īhu i reira, kāhore anō hoki āna ākonga, ka eke hoki rātou ki ngā kai­puke, ka rere ki Kaperenauma ki te rapu i a Īhu.

Ko Īhu, te Taro o te Ora

25Ā, nō tō rātou kite­nga i a ia i tāwāhi o te moana, ka mea ki a ia, “E Rapi, nōna­hea koe i tae mai ai ki konei?”

26Ka whaka­hoki a Īhu ki a rātou, ka mea, “He pono, he pono tāku e mea nei ki a koutou, ehara i te mea he kite­nga nō koutou i ngā mere­kara i rapu ai koutou i ahau, engari, nō te mea i kai koutou i ngā taro, ā, ka mākona.

27Aua e mahia te kai memeha, engari, te kai e mau tonu ana ā te ora tonu rā anō, ko tā te Tama hoki a te tangata e hoatu ai ki a koutou. Kua oti hoki ia te whai tohu e te Atua, e te Matua.”

28Nā, ka mea rātou ki a ia, “Me aha mātou e mahi ai i ngā mahi a te Atua?”

29Ka whaka­hoki a Īhu, ka mea ki a rātou, “Ko tā te Atua mahi tēnei, kia whaka­pono koutou ki tāna i tono mai ai.”

30Nā, ka mea rātou ki a ia, “Ko tēhea tohu te meatia ana e koe kia kite ai mātou, kia whaka­pono ai ki a koe? Tēnā koa tāu mahi?

31I kai ō tātou mātua i te mana i te koraha; ko te mea hoki tēnā i tuhi­tuhia, ‘I hōmai e ia he taro i te rangi hei kai mā rātou.’ ”

32Nā, ko te mea­tanga a Īhu ki a rātou, “He pono, he pono tāku e mea nei ki a koutou, ehara i a Mohi nāna i hoatu tēnā taro ki a koutou i te rangi. Engari, tēnei te hoatu nei e tōku Matua ki a koutou te taro pono o te rangi.

33Ko te taro hoki a te Atua ko ia e heke iho ana i te rangi, e hōmai ana i te ora ki te ao.”

34Nā, ka mea rātou ki a ia, “E te Ariki, hōmai tēnei taro ki a mātou i ngā wā katoa.”

35Ka mea a Īhu ki a rātou, “Ko ahau te taro o te ora. Ki te haere mai tētahi ki ahau, e kore rawa ia e hia­kai; ki te whaka­pono hoki tētahi ki ahau, e kore rawa ia e mate­wai.

36Otirā, i mea anō ahau ki a koutou, kua kite koutou i ahau, ā, kāhore i whaka­pono.

37Ko ā te Matua e hōmai ai ki ahau ka haere katoa mai ki ahau; ā, ki te haere mai tētahi ki ahau, e kore rawa e pangā e ahau ki waho,

38i heke iho hoki ahau i te rangi, ehara i te mea hei mahi i tāku i pai ai, engari, i tā tōku kai­tono mai i pai ai.

39Ko tā te Matua i pai ai, nāna nei ahau i tono mai, koia tēnei, kia kaua e ngaro i ahau tētahi wāhi o ngā mea katoa i hōmai e ia ki ahau; engari, kia whaka­ara­hia ake e ahau ā te rā whaka­mutu­nga.

40Ko tā tōku Matua hoki tēnei i pai ai, ko te tangata e kite ana i te Tama, e whaka­pono ana anō ki a ia, kia whi­whi ia ki te ora tonu; māku anō ia e whaka­ara ake ā te rā whaka­mutu­nga.”

41Nā, ka kōrero kō­muhu­muhu ngā Hūrai ki a ia, mōna i mea, “Ko ahau te taro i heke iho i te rangi.”

42Ka mea rātou, “Ehara oti tēnei i a Īhu, tama a Hōhepa, e mōhio nei tātou ki tōna pāpā rāua ko tōna whaea? Ha! He pēhea tāna e kī nei, ‘I heke iho ahau i te rangi?’ ”

43Nā, ka whaka­hoki a Īhu, ka mea ki a rātou, “Kāti te kō­muhu­muhu i roto i a koutou.

44Kāhore he tangata e āhei te haere mai ki ahau, ki te kāhore ia e kūmea mai e te Matua, nāna nei ahau i tono mai. Ā, māku anō ia e whaka­ara ake ā te rā whaka­mutu­nga.

45Kua oti te tuhi­tuhi i roto i ngā poro­piti, ‘Ā, ka whaka­akona rātou katoa e te Atua.’ Nā, ko te tangata kua rongo ki te Matua, kua ākona hoki, ka haere mai ki ahau.

46Ehara i te mea kua kite tētahi i te Matua; ko ia anake i puta mai i te Atua, ko ia kua kite i te Matua.

47He pono, he pono tāku, e mea nei ki a koutou, Ki te whaka­pono tētahi, he ora tonu tōna.

48Ko ahau te taro o te ora.

49I kai rā ō koutou mātua i te mana i te koraha, ā, i mate rātou.

50Ko te taro tēnei e heke iho ana i te rangi, kia kai ai te tangata i a ia, ā, kia kaua e mate.

51Ko ahau te taro ora i heke iho i te rangi; ki te kai tētahi i tēnei taro, e ora tonu ia. Āe rā, ko te taro e hoatu e ahau ko ōku kiko­kiko, e hoatu e ahau hei oranga mō te ao.”

52Nā, ka totohe ngā Hūrai tētahi ki tētahi, ka mea, “Me pēhea e hōmai ai e tēnei tangata ōna kiko­kiko kia kainga e tātou?”

53Nā, ko te mea­tanga a Īhu ki a rātou, “He pono, he pono tāku e mea nei ki a koutou, ki te kāhore koutou e kai i ngā kiko­kiko o te Tama a te tangata, e inu i ōna toto, kāhore he ora i roto i a koutou ake.

54Ko ia e kai ana i ōku kiko­kiko, e inu ana i ōku toto, he ora tonu tōna; ā, māku ia e whaka­ara ake ā te rā whaka­mutu­nga.

55He kai pono hoki ōku kiko­kiko, he mea pono ōku toto hei inu­manga.

56Ko ia e kai ana i ōku kiko­kiko, e inu ana i ōku toto, e noho ana i roto i ahau, me ahau hoki i roto i a ia.

57Nā, te Matua ora hoki ahau i tono mai, nō te Matua anō tōku ora; wai­hoki ki te kai tētahi i ahau, kei ahau he ora mōna.

58Ko te taro tēnei i heke iho i te rangi. E kore e pērā i tā ō koutou mātua i kai rā, ā, mate ana. Ki te kai tētahi i tēnei taro, e ora tonu ia.”

59I kōrero­tia ēnei mea e ia i roto i te whare kara­kia, i a ia e whaka­ako ana i Kaperenauma.

Ngā Kupu o te Ora Mutungakore

60Nā, he toko­maha āna ākonga i te rongo­nga, i mea, “He kupu pakeke tēnei; ko wai e āhei te whaka­rongo atu?”

61Ka mōhio ia a Īhu i roto i a ia, e kō­muhu­muhu ana āna ākonga ki tēnei, ka mea ia ki a rātou, “E hē ana koutou ki tēnei?

62Ka pēhea rā ki te kite koutou i te Tama a te tangata e kake atu ana ki te wāhi i noho ai ia i mua?

63Ko te wairua te whaka­ora ana; kāhore a te kiko­kiko wāhi. Ko ngā kupu e kōrero nei ahau ki a koutou he wairua, he ora.

64Tēnei anō ia ētahi o koutou kāhore ō rātou whaka­pono.” (I mātau hoki a Īhu nō te tīma­tanga ki ngā mea kāhore ō rātou whaka­pono, ki te tangata anō e tukua ai ia.)

65Ā, ka mea ia, “Nā, konei ahau i mea ai ki a koutou, kāhore he tangata e āhei te haere mai ki ahau, ki te kāhore e hoatu ki a ia e tōku Matua.”

66I taua wā, he toko­maha āna ākonga i hoki ki muri, ā, mutu ake tā rātou haere tahi me ia.

67Nā, ka mea a Īhu ki te tekau mā rua, “E mea ana anō rānei koutou kia haere?”

68Nā, ka whaka­hokia e Haimona Pita ki a ia, “E te Ariki, me haere mātou ki a wai? Kei a koe ngā kupu o te ora tonu.

69Kua whaka­pono mātou, kua mātau, ko te Karaiti koe, ko te Tama a te Atua ora.”

70Ka whaka­hokia e Īhu ki a rātou, “He teka ianei kotahi tekau mā rua koutou i whiri­whiria e ahau, he rēwera anō tētahi o koutou?”

71Ko Hūrā Ikariote tama a Haimona tāna i kōrero ai; ko te tangata hoki ia meāke nei tuku i a ia; ko tētahi hoki ia o te tekau mā rua.