Salmau 15 - Welsh Psalms 1-20 and selection of Ruth and Isaiah 1830-35 (Ioan Tegid)

Salm XV.Cerdd: eiddo Dafydd.

1 Iehova, pwy a drig yn dy babell?

Pwy a breswylia yn dy fynydd sanctaidd?

2Yr hwn a rodia’n berffaith, ac a wna gyfiawnder,

Ac a lefara wirionedd o’i galon;

3Heb absenu â’i dafod,

Heb wneud i’w gymmydog ddrwg,

Na chodi enllib ar ei gyfnesaf;

4Yr hwn y dirmyger yn ei olwg y gwaradwyddus,

Ond a anrhydeddo y rhai a ofnant Iehova;

Yr hwn a dwng i gymmydog, ac ni newidia;

5Yr hwn ni rydd ei arian ar lôg,

Ac ni dderbyn wobr yn erbyn y dieuog:

A wnelo’r pethau hyn, nis symudir byth.

NODAU.

Darlunir yma y gwir dduwiol, gan osod i lawr ei ymddygiad cyffredin. Ni sonir am yr egwyddor, ond am y ffrwyth. Nid addas disgwyl pob peth ym mhob darluniad. Ni ddywedir dim yma am ffydd a chariad, ond am eu heffeithiau. Tebyg mai diben y Salmydd oedd gwahaniaethu rhwng arddelwyr gwir a rhagrithiol. Cyfenwa llawer eu hunain y’mhob oes yn ganlynwyr Duw, heb feddu ar wir dduwioldeb. Pa fodd y gellir eu hadnabod? Wrth eu buchedd. Os nad ydynt yn ateb i’r fath ddarluniad a roddir yma, nid gwir, ond rhagrith a thwyll yw eu crefydd.