Salmau 10 - Welsh Psalms 1-20 and selection of Ruth and Isaiah 1830-35 (Ioan Tegid)

1Pam, Iehova, y sefi o bell,

Yr ymguddi ar amserau o gyfyngder!

2Mewn ucheldrem yr annuwiol a erlid y gorthrymedig;

Dalier hwynt yn y bwriadau a ddychymmygasant.

3Canys ymffrostia’r annuwiol am ddymuniad ei enaid,

A’r cybydd a fendithia, — dirmyga Iehova.

4Yr annuwiol, gan uchder ei ffroen, ni weddia;

Nid “yw” Duw “yn” ei holl feddyliau.

5Pâr ei ffyrdd flinder bob amser;

Uchel dy iawnderau o’i olwg:

Ei holl wrthwynebwyr, chwytha yn eu herbyn.

6Dywed yn ei galon, Ni’m syflir

O oes i oes, gan na fyddaf mewn drygfyd.

7O felldith ei enau sy’n llawn,

Ac o ddichellion a thwyll;

Tan ei dafod ormes a chamwedd.

8Eistedd yn nghynllwynfa’r pentrefydd;

Mewn cuddfanau y lladd y diniwed;

Ei lygaid ar y methedig a dremiant.

9Cynllwyna yn y cudd fel llew yn y ffau,

Cynllwyna i ddal y gorthrymedig,

Deil y gorthrymedig gan ei dynu i’w rwyd.

10Ymostwng, cryma,

A syrth, ynghyd â’i gedyrn, ar drueiniaid.

11Dywed yn ei galon, Anghofiodd Duw,

Dirgela ei wyneb fel na wêl byth.

12Cyfod, Iehova; Duw, dyrcha dy law;

Nac anghofia y gorthrymedig.

13Paham y dirmyga yr annuwiol Dduw,

Y dywed yn ei galon, nad ymofyni?

14Gwelaist, gan y sylwi ar ormes a sarhâd,

I’“w” rhoddi yn dy law dy hun;

Arnat yr hydera yr egwan,

Ti wyt gynnorthwywr yr ymddifad.

15Tor fraich yr annuwiol a’r drygionus;

Ymofyni am ei annuwioldeb, y cwbl a gei allan.

16 Iehova “sydd” frenin oesol a thragywyddol:

Difethwyd y cenedloedd o’i wlad.

17Dymuniad y gorthrymedig a wrandawaist, Iehova;

Cadarnhei eu calon, gostyngi dy glust

18I iawnhau’r ymddifad a’r cystuddiol;

Fel na chwanego fod mwy er braw ddynionach y ddaear.