Salmau 9 - Welsh Psalms 1-20 and selection of Ruth and Isaiah 1830-35 (Ioan Tegid)

Salm IX.I’r Pencerdd; ar y “dôn” marwolaeth Laban, cerdd o eiddo Dafydd.

1CLODFORAF Iehova â’m holl galon,

Mynegaf dy holl ryfeddodau:

2Llawenychaf a gorfoleddaf ynot,

Canaf i’th enw, y Goruchaf.

3 Pan droesai fy ngelynion yn ol,

Syrthient a darfyddent o’th flaen:

4Canys cynhaliaist fy iawn a’m hachos;

Eisteddaist ar orsedd yn Farnwr cyfiawn:

5Ceryddaist y cenhedloedd, distrywiaist yr annuwiol;

Eu henw a ddileaist yn oes oesoedd.

6O elyn! darfu “dy” anrheithiau dros byth!

A’r dinasoedd a ddiwreiddiaist —

Difethwyd eu coffadwriaeth hwynt!

7Ond Iehova dros byth a eistedd,

Darparodd i farn ei orsedd;

8Ac efe a farna’r byd mewn cyfiawnder,

A llywodraetha’r bobloedd mewn uniondeb:

9A bydd Iehova yn uchel-dwr i’r cystuddiol,

Yn uchel-dwr ar amserau o gyfyngder:

10Ac ymddiried ynot y rhai a adwaenant dy enw;

Gan na adewir y rhai a’th geisiant di, Iehova.

11Cenwch i Iehova, preswylydd Sïon;

Traethwch y’mysg y bobloedd ei weithrediadau.

12Pan ymofyn am waed, hwynt a gofia,

Nid anghofia waedd y gorthrymedig.

13 Bydd rasol wrthyf, Iehova;

Gwel fy ngorthrymder gan fy nghaseion,

Fy nyrchafydd o byrth angeu:

14Fel y mynegwyf dy holl foliant y’mhyrth merch Sïon,

“Ac” y gorfoleddwyf yn dy waredigaeth: —

15‘Soddodd y cenhedloedd yn y pwll a wnaethent,

Yn y rhwyd a guddiasent, y daliwyd eu traed:

16Adwaenir Iehova wrth y farn a wnaeth;

Yng ngwaith ei ddwylaw y maglwyd yr annuwiol.

(Myfyrdod. Selah.)

17Troir annuwiolion i uffern —

Yr holl genhedloedd sy’n anghofio Duw:

18Canys nid yn dragywydd yr anghofir yr anghenog;

A gobaith y gorthrymedig, ni dderfydd dros byth.’

19Cyfod, Iehova, na orfydded adyn;

Barner y cenhedloedd ger dy fron.

20Gosod, Iehova, ofn arnynt;

Gwybydded y cenhedloedd mai dynionach ydynt. Selah.