Habakhuki 2 - Siswati 1996 Bible（SWT）

Imphendvulo yaNkulunkulu kuHabakhuki

1 Ngitawuma embonisweni yami ngibuke,

ngitimise kahle etingosini tami,

ngitawubukisisa kahle ngitewubona

kutsi Nkulunkulu utawutsini kimi,

nekutsi ngitawuphendvula ngitsini ngalokukhonona.

2 Simakadze wase uyaphendvula, watsi:

“Bhala phansi lesembulo,

usibhale sicace

kuletibhelekeca,

kuze kutsi kufundzeke kahle.

3Ngobe lesembulo silindzele sikhatsi lesimisiwe;

sikhuluma ngesiphetfo lesiphutfumako,

futsi ngeke sibonakale singemanga.

Nome sephutisa nje, silindzele,

sona sitawufika nome kanjani,

futsi ngeke sephute.

4 “Nasi sembulo:

Lotiphakamisako angeke aphephe,

kodvwa lolungile uyawuphila ngekukholwa kwakhe.”

Imbhubhiso yalabakhohlakele

5 Yebo, liwayini liyamyenga,

ungumuntfu lotigcabhako,

futsi akasenakuphumula.

Njengobe ungugubhela kusakhe njengelidliza

nanjengekufa akaze eneliseke,

utibutsela kuye tonkhe tive,

atfumbe bonkhe bantfu, babe bakhe.

6“Abayikumchukuluta bonkhe yini

ngemagama ekumeya,

bahlekise ngaye batsi:

‘Maye kulowo lompongisa timphahla letebiwe,

atinjingise ngekweba!

Loku kutawuchubeka kuze kube ngunini?’

7Labo lobakweledako abayiwuvuka masinyane yini?

Abayiwuvuka bakwesabise yini?

Lapho-ke uyawuba yimphango yabo.

8 Njengobe uphange tive letinyenti,

letive letisele tiyawukuphanga nawe.

Ngobe ucitse ingati yebantfu,

wabhubhisa emave nemadolobha

kanye nabo bonkhe labebahlala kuwo.

9 “Maye kulowo lowakha likhaya lakhe

ngenzuzo lengakalungi,

atakhele sidleke sakhe etulu ekuphakameni,

kuze atewuphunyula etidladleni tembhubhiso.

10Wakhe luzungu lwekubhubhisa tive letinyenti,

wahlazisa indlu yakho;

walahlekelwa nakuphila kwakho.

11 Ematje elubondza ayawukhala ngetento takho,

nemishayo yeluphahla iyawuklaza ivumelane nawo.

12 “Maye kulowo lowakha lidolobha ngekucitsa ingati,

emise lidolobha ngebugebengu!

13 Kungabe kambe Simakadze longuSomandla

akakumisi yini engcondvweni yakhe

kutsi kushikashikeka kwebantfu kungemafutsa nje

ekubhebhetela umlilo,

nekutsi tive tishikashikeke,

titikhandlekele lite?

14Ngobe umhlaba uyawugcwala

kwati bukhosi baSimakadze,

njengaloku emanti asibekela lwandle.

15 “Maye kulowo muntfu lonatsisa

bomakhelwane bakhe tjwala,

abutfululele kuso sikhumbasikhwama,

banatse baze badzakwe,

entele kutsi atewubukela imitimba yabo nase bangcunu.

16 Wena uyawudliwa ngemahloni esikhundleni sekudvunyiswa.

Manje-ke selitfuba lakakho!

Natsa nawe, ungcunuleke!

Lendzebe lesuka esandleni saSimakadze

sangasekudla seyijikela ngakuwe,

nelihlazo liyawumbonya ludvumo lwakho.

17 Lobudlova lobente kuyo iLebanoni buyawukwehlula,

nekubhubhisa kwakho tilwane kuyawukwesabisa.

Ngobe ucitse ingati yebantfu,

wabhubhisa emave nemadolobha

kanye nabo bonkhe labebahlala kuwo.

18 “Sinamsebenti muni sithico,

njengaloku sibatwe ngumuntfu nje?

Yebo, sisitani sitfombe lesifundzisa emanga?

Ngobe lowo losibatako wetsembela

emsebentini wetandla takhe,

wakha tithico letingeke tize tikhulume.

19Nako kulowo muntfu losho esigodvweni

atsi: ‘Phila!’

nome etjeni lelingenamphilo

atsi: ‘Vuka!’

Lingasinika yini seluleko?

Lembeswe ngegolide nangesiliva,

kute umphefumulo kulo.

20 “Kodvwa Simakadze usethempelini lakhe lelingcwele.

Umhlaba wonkhe awuthule embikwakhe.”