Tihlabelelo 75 - Siswati 1996 Bible（SWT）

Nkulunkulu utfobisa lomubi aphakamise lolungileSihlabelelo sa-Asafa lesiyingoma leyetfulwe kumhlabelisi kutsi ihlatjelwe ngendlela letsi: “Ungabhubhisi.”

1Siyakudvumisa, Nkulunkulu, siyakudvumisa,

wena usedvutane nasibita libito lakho,

sibalise ngemisebenti yakho lemangalisako.

2 Wena ukhuluma utsi:

“Nakufika sikhatsi lesimisiwe sekwehlulelwa,

mine ngiyakwehlulela ngebucotfo.

3 Nome umhlaba sewutanyatanyiswa,

kanye nabo bonkhe labahlala kuwo,

mine ngisimisa tinsika tawo. Cabanga.

4 “Kulabatigcabhako ngitsite: ‘Ningatigcabhi!’

Kulababi ngatsi: ‘Ningatiphakamisi!

5Ningatiphakamisi nitikhukhumete,

ningakhulumi ngekwedzelela!’ ”

6Ngobe kuphakama nekwehla kwemuntfu

akuveli emphumalanga nome enshonalanga,

akuveli ngisho nasehlane nasetintsabeni;

7 kodvwa nguNkulunkulu lowehlulelako,

wehlisa lomunye

aphakamise lomunye.

8 Ngobe esandleni saSimakadze kunendzebe,

leneliwayini lelibile laze laloya;

ulinatsisa bonkhe lababi bemhlaba

baliminyele, ngisho nenseketse yalo.

9Kepha mine ngiyawujabula

kuze kube phakadze,

ngidvumise Nkulunkulu waJakobe.

10Nkulunkulu utsi:

“Ngiyawubehlisa bonkhe lababi,

ngiphakamise bonkhe labalungile.”