Tihlabelelo 60 - Siswati 1996 Bible（SWT）

Umthandazo wekucela kuvikelwa esitseni(Hla. 108:6-13)Sihlabelelo lesiyimiktamu yaDavide, lesetfulwe kumhlabelisi kutsi sifundziswe satiwe ngekusihlabela ngendlela letsi: “Siphephane.” Bufakazi. Wasihlabela ngesikhatsi alwa nemaSiriya aseMesophothamiya naseSobha, Jowabe wabe sewubuyela emuva wacitsa baka-Edomu labatinkhulungwane letilishumi natimbili endzaweni letsiwa Sigodzi Seluswayi.

1 Awu, Nkulunkulu,

usiyekelele wasilahla,

wenta netivikelo tetfu tabhidlitwa,

kwaya njengobe usitfukutselele.

Buya utesilulamisa.

2Utamatamise umhlaba,

wawudzabula timfa;

tivale letimfa tawo ngobe uyaceka.

3 Sive sakho usibonise tintfo letimatima,

wasinatsisa liwayini sadzakwa,

saba ngumhlaba.

4Ubanike luphawu labakwesabako,

wabenta bacocana ngaphansi kwalo,

kuze bavikeleke

emicibisholweni yetitsa. Cabanga.

5 Sisindzise ngesandla sakho sekudla,

usiphendvule,

kuze labatsandzekako bakho bakhululwe.

6Nkulunkulu ukhulume

asendzaweni yakhe lengcwele watsi:

“Ngiyakwetsaba,

ngilehlukanise lakaShekhemu,

ngisabe Sigodzi saseSukhothi.

7 Live laGileyadi lami,

nelive laManase lami,

Efrayimu usivikelo senhloko yami,

Juda uyindvuku yami yebukhosi.

8 Mowabi ungumgezelo wami,

etikwa-Edomu ngijika sicatfulo sami.

Nine maFilisti, memetani, ningikhonte.”

9Ngitawumikiswa ngubani

kulomuti loyinqaba?

Ngitawuholwa ngubani

kuya ka-Edomu?

10 Awu, Nkulunkulu,

wena usilahlile.

Awu, Nkulunkulu,

awusahambi nemabutfo etfu emphi.

11 Sisite usephule etitseni tetfu,

ngobe lusito lwebantfu lulite.

12 Sitawutincoma ngaNkulunkulu.

Nguye lotawugcobagcoba titsa tetfu.