1 Emakhosi 14 - Siswati 1996 Bible（SWT）

Kufa kwendvodzana yaJerobowamu

1Ngaso leso sikhatsi Abiya, umsa waJerobowamu, wagula.

2 Jerobowamu wakhuluma kumkakhe, watsi: “Hamba, utifihle ngekwembatsa letinye tingubo, ungabonakali, khona bangetikubona kutsi umgumkaJerobowamu, bese uya eShilo. Umphrofethi Ahiya ukhona lapho, yena lowo lowangitjela kutsi ngitawuba yinkhosi etikwalesive.

3Tsatsa imikhama lelishumi yetinkhwa uhambe nayo, nemacebelengwane, kanye nelijeke leluju, uye kuye. Yena utakutjela kutsi kutakwentekani kulomsa wami.”

4 Ngako umkaJerobowamu wakwenta konkhe loko labekutjeliwe, wahamba waya endlini ya-Ahiya eShilo.

Ahiya abengasaboni emehlweni ngenca yekutsi abesamdzala kakhulu.

5Kodvwa Simakadze abesatjele Ahiya, watsi: “UmkaJerobowamu uyeta, utekukubuta ngendvodzana yakhe, ngobe iyagula, wena kufanele umnike impendvulo lengukutsi nekutsi. Nakefika lapha, utawutentisa shangatsi ungulomunye umuntfu.”

Watsi kube umkaJerobowamu efike, watenta shangatsi ungulomunye umuntfu.

6Ngako kwatsi kube Ahiya eve tigi tekuhamba kwakhe emnyango, wakhuluma watsi: “Ngena, mkaJerobowamu. Utentiselani? Ngitfunywe kuwe kutsi ngikutjele tindzaba letimbi.

7Hamba utjele Jerobowamu kutsi naku lokushiwo nguSimakadze, Nkulunkulu wema-Israyeli, utsi: ‘Ngakuphakamisa emkhatsini wesive, ngakwenta waba ngumholi wesive sami sema-Israyeli.

8 Umbuso ngawudzabula, ngawususa endlini yaDavide ngawunika wena, kodvwa wena awukahambi njengenceku yami Davide, lowagcina imiyalo yami wangilandzela ngenhlitiyo yakhe yonkhe, enta loko lokwakukuhle emehlweni ami.

9Wena wente lokubi kakhulu kwendlula bonkhe labake babusa embikwakho. Utentele bonkulunkulu netithico letibunjwe ngensimbi, wangicunula ngatfukutsela, wase ungilahla emvakwakho.

10 “ ‘Ngenca yaloko indlu yakaJerobowamu ngitayiletsela inhlekelele, ngitawubulala tonkhe titukulwane takho letidvuna, letincane naletindzala. Indlu yakaJerobowamu ngitayishisa njengemuntfu ashisa lilongwe, ishe ize iphele nya.

11Tinja tiyawudla tidvumbu tebakaJerobowamu labayawufela edolobheni, kantsi tinyoni telizulu tona tiyawudla tidvumbu talabo labayawufela esigangeni, Simakadze sewukhulumile!’ ”

12Ahiya wachubeka akhuluma kumkaJerobowamu, watsi: “Wena-ke, ncandzeka ubuyela ekhaya. Utawutsi usangena nje edolobheni, umfana afe.

13Sonkhe sive saka-Israyeli sitamlilela, simngcwabe. Nguye yedvwa umntfwana waJerobowamu lotawungcwatjwa, ngobe nguye yedvwa endlini yakaJerobowamu Simakadze Nkulunkulu waka-Israyeli lamtfole anentfo lenhle.

14“Simakadze utativusela inkhosi yaka-Israyeli letawubhubhisa lonkhe lusendvo lwendlu yakaJerobowamu. Ngilo leli-ke lilanga! Yebo, khona manje.

15 Simakadze utawushaya sive saka-Israyeli, size sifanane nemhlanga loveveteliswa ngumoya emantini. Uyawusiphula lesive saka-Israyeli kulelive lelihle lalipha bokhokho baso, bese usisakatela ngesheya kweMfula iYufrathe, ngobe sicunule Simakadze samtfukutselisa ngekwakha tinsika ta-Ashera.

16 Simakadze utasiyekelela sive saka-Israyeli ngenca yetono letentiwe nguJerobowamu, leto ladvonsela ngato sive saka-Israyeli ekoneni.”

17UmkaJerobowamu wancandzeka, wabuyela eThisa. Watsi nakanyatsela emphundvwini yendlu, umfana wafa.

18Bamngcwaba, sonkhe sive saka-Israyeli samlilela, kwaya njengobe Simakadze abeshito ngenceku yakhe Ahiya, umphrofethi.

Kukhotsama kwaJerobowamu

19Leminye imininingwane ngekubusa kwaJerobowamu netimphi takhe, nekutsi wabusa njani, kubhaliwe encwadzini yemilandvo yemakhosi aka-Israyeli.

20Wabusa iminyaka lengema-22, wabe sewuyakhotsama. Nadabi, umsa wakhe, wase uba yinkhosi esikhundleni sakhe.

Rehobowamu, inkhosi yakaJuda(2 Khr. 11:5 – 12:15)

21 Rehobowamu, umsa waSolomoni, waba yinkhosi yakaJuda. Abeneminyaka lengema-41, nakabekwa kuba yinkhosi yakaJuda, wabusa iminyaka leli-17 eJerusalema, lidolobha Simakadze lalikhetsa emkhatsini wato tonkhe tive taka-Israyeli kutsi abeke khona Libito lakhe. Unina wakhe bekunguNama, angum-Amoni.

22Bantfu besive sakaJuda benta lokubi emehlweni aSimakadze, ngetento tabo labatenta, bavusa intfukutselo yaSimakadze; benta lokubi kakhulu, kwendlula loko lokwakwentiwe boyise.

23Batakhela tindzawo letiphakeme tekukhonta tithico, netinsikamatje tato lekwakutsiwa tingcwele kanye netinsika ta-Ashera eticongweni tato tonkhe tintsaba letiphakeme nangaphansi kwato tonkhe tihlahla letendlala emagala ato.

24 Kwaze kwaba khona ngisho netitabane kuleto tindzawo tekukhontela tithico. Sive sakaJuda senta tonkhe leto tintfo letilihlazo letatentiwa nguletive Simakadze labetidvungulule ngesikhatsi nakufika sive sema-Israyeli.

25 Ngemnyaka wesihlanu wekubusa kwenkhosi Rehobowamu, Shishaki, inkhosi yaseGibhithe, wahlasela iJerusalema.

26 Watfumba yonkhe ingcebo yasethempelini laSimakadze neyasesigodlweni. Watsatsa konkhe, ngisho nawo onkhe emahawu egolide labentiwe nguSolomoni imbala.

27Ngako Rehobowamu, inkhosi, wenta emahawu elitfusi kutawutsatsa sikhundla salawa egolide, wase uwetfula esandleni setindvuna tabogadzi basekungeneni kwesigodlo.

28Njalo nje inkhosi nayiya ethempelini laSimakadze, bomahlalesangweni babetfwala lamahawu, bese kutsi emvakwaloko bawabuyisele emuva endlini yabogadzi.

29 Leminye imininingwane ngekubusa kwaRehobowamu nako konkhe lakwenta, kubhaliwe encwadzini yemilandvo yemakhosi akaJuda.

30 Ngaso leso sikhatsi boRehobowamu naJerobowamu babevame njalo kuhlaselana.

31Rehobowamu wase uyakhotsama, wafihlwa emathuneni emakhosi, eDolobheni laDavide. Libito lenina bekunguNama, angum-Amoni; Abiya, umsa wakhe, waba yinkhosi esikhundleni sakhe.