KuTimoti 1 KuTimoti 1 – 4 - Contemporary Xhosa Bible 2024

1Ke kaloku uMoya uthi ngokucacileyo inxenye iya kumka elukholweni, ngamaxesha asemva, inyamekele oomoya abalahlekisayo, neemfundiso zeedemon;

2Othetha ubuxoki ngohanahaniso; betshiswe isazela sabo ngentsimbi;

3bengavumi ukuba kuzekwe, nokuba kudliwe izinto ezidalwe nguThixo, ukuba zamkelwe ngombulelo ngabo bakholwayo, bayaziyo inyaniso.

4Kuba sonke isidalwa sikaThixo sihle; asiyonto yakulahlwa, ukuba samkelwe ngombulelo;

5Kuba singcwaliswa ngelizwi likaThixo nangomthandazo.

6Ukuba uthe ezi zinto wazibeka phambi kwabazalwana, woba ngumlungiseleli omhle kaYesu Kristu, wondliwe ngamazwi okholo, nawemfundiso entle oyilandelayo.

7Ke zona iintsomi ezihlambelayo zamaxhegokazi zigatye;

8Kuba eyeyomzimba ingqeqesho inceda kancinane; ke kona ukuhlonela uThixo kunceda ngako konke, kunedinga lobomi bakalokunje, nobobo buza kubakho.

9Lithembekile ilizwi eli, lifanelwe kukwamkelwa konke.

10Kuba sibulalekela, singcikivelwe oko; ngokuba sithembele kuThixo ophilileyo, onguMsindisi wabantu bonke, ngokukodwa owabakholwayo.

11Bathethele ezi zinto, ufundise zona.

12Makungabikho namnye ubudelayo ubuncinane bakho; suka ube ngumzekelo wabakholwayo ngentetho, ngehambo, ngothando, ngokholo, ngobunyulu.

13Nyamekela ukufunda, uvuselelo, imfundiso, ndide ndifike.

14Ungasihilizeli isipho esingokubabalwa, esikuwe; owasinikwayo ngesiprofeto, kunye nokubekwa izandla yintlanganiso yamadoda amakhulu.

15Zinyamekele ezo zinto; zinikezele ngokupheleleyo kuzo; ukuze ukuphumelela kwakho kubonakale kwinto yonke.

16Zilumkele wena nemfundiso yakho; hlala uhleli kuzo; kuba ngokwenza oko, wozisindisa wena, ubasindise nabo bakuvayo.