KwabaseKorinte 1 KwabaseKorinte 1 – 16 - Contemporary Xhosa Bible 2024

1Ke kaloku, ngokubuthwa kwemali yokusiza amakholwa, yenzani ngokunjalo nani ndawamisela amabandla kaThixo akwelaseGalati.

2Ngolokuqala usuku, iiveki ngeeveki, elowo kuni makabeke ekhaya, eqweba, into asukuba esikelelwe ngayo;

3Ndakuba ndifikile, enisukuba nibacikidile nakholwa ngabo, ndobathuma bona benencwadi, base isipho senu esi eYerusalem.

4Ke ukuba kuthe kwabonakala ukuba nam ndiye, bohamba kunye nam.

5Emva koko ndiya kuza kuni, xa ndithe ndacanda kwelaseMakedoni, kuba ndiya kwanela ukucanda nje elaseMakedoni.

6Ke kuni mhlawumbi ndingathi ndihlale ndidlulise nobusika, ukuze nina nindiphelekelele apho ndisukuba ndisiya khona.

7Kuba andithandi ukuba ndinibone ngoku ndidlulayo; kodwa ndithemba ukuba ndokha ndihlale kuni ixesha elithile, ukuba iNkosi ithe yavuma.

8Kodwa ndiya kuhlala e-Efese kude kubekho ipentekoste.

9Kuba ndivulelwe umnyango omkhulu onamandla, bebaninzi nabachasi.

10Ukuba uTimoti uthe wafika, ize nikhangele ukuba angabi nakoyika phakathi kwenu; kuba uyawusebenza umsebenzi weNkosi, kwanjengam.

11Makungabikho mntu ngoko umenza into engento. Mphelekeleleni ke ninoxolo, ukuze eze kum; kuba ndimlindile kunye nabazalwana.

12Ke kaloku, ngaye nApolo umzalwana, ndamvuselela kakhulu, ukuba eze kuni kunye nabazalwana. Kuye akubangakho kanye ukuthanda ukuza okwakalokunje; woza ke, xa athe wanethuba elilungileyo.

13Phaphani, yimani elukholweni; yibani ngamadoda; yomelelani.

14Zonke izinto zenu mazenziwe ngothando.

15Ndiyanivuselela ke nina, bazalwana, niyayazi indlu kaStefana, ukuba iyintlahlela yelaseAkaya, yazinikela ekulungiseleleni abangcwele;

16ukuba nibalulamele abanjalo, nakubo bonke abasincedayo nababulalekayo.

17Ndiyavuya ke ngokufika kukaStefana noFortunato noAkayiko; ngokuba bakwenzelelele bona ukungabikho kwenu;

18Kuba bawuphumzile umoya wam nowenu. Bazini kakuhle ngoko abanjalo.

19Ayanibulisa amabandla aseAsiya. Bayanibulisa kunene eNkosini uAkwila noPrisila, kunye nebandla elisendlwini yabo.

20Bayanibulisa abazalwana bonke. Bulisanani ngolwango olungcwele.

21Umbuliso ungesam isandla, mna Pawulos.

22Ukuba ubani akayithandi iNkosi uYesu Kristu, makasingelwe phantsi.

23Ubabalo lweNkosi yethu uYesu Kristu malube nani.

24Uthando lwam malube nani nonke bakuKristu Yesu. Amen. (Incwadi yokuqala eya kwabaseKorinte yabhalwa nguStefano noFortunato noAkayiko noTimoti eFilipi.)