SALMO 2 - Quechua, San Martín NT+（qvs）

Tata Dios akllashkan wambran kamachikun.

1Sukaman yuyani: ¿Imapatí Tata Diosta mana kasuk runakuna turbakunsapa?

¿Imapatí mana valekkunata yuyaykunsapa rurayta?

2Tukuy allpapi sinchi kamachikukkuna awtoridarkuna

Tata Diosta mana kasunayansapachu.

Chashna mana kasunayashpankuna

Tata Dios akllashkan sinchi kamachikukwan makanakuk tantanakunsapa.

3Tantanakushpa kaparishpa rimansapa:

“Akuychi Tata Dios akllashkan kamachikuk runawan makanakuk.

Akuychi paymanta kishpichinakuk amana kamachiwananchikunapana.”

4Chashna rimaptinkuna

sielupi kawsak Tata Dios

paykunata asichinsapa.

5Chaymanta Tata Dios rabyakushpa manchachinsapa.

Sinchita piñakushpa willansapa:

6“Ñukami akllashkayni Sion urkupi sinchi kamachikukta churashkani tukuy layata kamachinanpa.”

7Kunanka ñuka willaykichi Tata Dios munananta.

Payka willawashka:

“Kanka wambraynimi kanki.

Kantami churashkayki sinchi kamachikuk kanaykipa.

8Chayrayku tukuy llaktakunata mañaway.

Ñukami allpa kuchun mañanta kushkayki chaypi kamachikunaykipa.

9Sinchi kamachikuk kashpayki suk runakuna mana kasushunayaptinkuna kastigankisapa.

Yerumanta ruradu varawan

metomanta ruradu ollata pakikshina paykunata kastigankisapa.”

10Chashna Tata Dios wambranta willaptin

Kankuna sinchi kamachikukkuna, awtoridarkuna,

willanaynita allita entiendiychi.

Yachachinaynita yachakuychi.

11Tata Diosta manchashpa sirviychi.

Kushikushpa payta kuyaychi.

12Tata Dios kunanllami sinchita rabyakun.

Chayrayku chukchukushpa ñawpakninpi kumurayaychi

ama Tata Dios rabyashpa mana allita rurashkaykichirayku wañuchishunaykichipa.

Tata Dios amachawananchikunata yachashpanchikuna

kushikushpa kawsanchisapa.