Salmau 126 - Welsh Selection of Psalms by Lewis Valentine 1936

SALM CXXVICHWERTHIN A DAGRAU.‘Cân y Pererinion.’

1Pan adferodd Iehofa amser da i Sion,

Yr oeddem fel rhai’n breuddwydio.

2Yna llanwyd ein genau â chwerthin,

A’n tafod â bloeddio llawen.

Yna dywedwyd ymysg y cenhedloedd,

“Pethau mawr a wnaeth Iehofa â’r rhai hyn”.

3Pethau mawr, yn wir, a wnaeth Iehofa â ni,

A llawen oeddem.

4O Iehofa adfer i ni eto yr amser da,

Fel y mae’r afonydd yn adfer y Deheudir cras.

5Bydded medi gorfoleddus

I’r rhai sy’n hau mewn dagrau.

6Â’r heuwr i’r maes gan feichio wylo,

A chludo baich o hadau;

Ond deued adref â bloeddio llawen

Gan gludo ei ysgubau.

salm cxxvi

Nid oes neb o bwys bellach yn ystyried y Salm hon yn disgrifio llawenydd y caethion pan ryddhawyd hwynt o Fabilon, a’r seithug oedd iddynt ar ôl dychwelyd. Cofia’r awdur am amser da a llwyddiannus a fu, a heddiw mewn dydd o gyni a chyfyngder a thlodi gweddïa am adfer yr amser hwnnw.

Nodiadau

1—3. Ystyr lythrennol yr ymadrodd “adfer amser da” ydyw ‘troi y troad’. Nid cyfeiriad sydd yma at droi adref o’r gaethglud, ond yn hytrach ei ystyr yw ‘adfer eto yr amser da a’r llwyddiant a fu’. Yr oedd y llwyddiant mawr a gofia’r awdur yn y gorffennol yn rhy dda i fod yn wir yn ei olwg ef a’i gyfoeswyr, — yr oedd fel breuddwyd, ac yn destun syndod i gymdogion Israel.

4—5. Y deheudir cras ydyw’r ‘Negeb’ yn neheudir Iwdea rhwng yr Aifft a Phalesteina. Yn yr haf mae’r afonydd a’r nentydd hysbion, ond pan ddêl glawogydd y gaeaf llenwir hwynt â dyfroedd, a gordoir y tir cras â thwf a glesni. Dengys yr adnodau hyn mai sychdwr mawr oedd achos y gofid, a thlodi yn dilyn methiant y cnydau. Yn yr adnod olaf y mae darlun dihafal o alaeth hau ac elwch medi.

Pynciau i’w Trafod:

1. Dywedir bod y Salm hon yn ddarlun perffaith o fywyd dyn gyda’i chwerthin a’i ddagrau, ei elwch a’i alaeth, ei freuddwyd prydferth a’i sylweddoli creulon.

2. Ai ymdeimlad o waredigaeth ydyw un o elfennau pwysicaf crefydd? Ystyriwch hyn yng ngoleuni 1-3.

3. Pa mor flin bynnag a fo gorchwyl hau, a sicrheir i ddyn fedi llawn a gorfoleddus? A oes hau ofer? A oes dichon i weithwyr Duw weithio’n ofer?

4. Ar adeg o fethiant ac aflwyddiant a oes gennym ni gysur a gobaith amgenach nag oedd gan y Salmydd hwn?