Salmau 122 - Welsh Selection of Psalms by Lewis Valentine 1936

SALM CXXIIY DDINAS SANTAIDD‘Cân y Pererinion. Salm Dafydd’.

1Dedwydd wyf pan ddywed fy nghyfeillion,

“Yr ydym yn mynd i dŷ Iehofa”.

2Llawen wyf pan saif ein traed

O fewn dy byrth di, O Ieriwsalem, —

3Ieriwsalem a godwyd unwaith eto

Yn ddinas gyfan a chryno.

4Yno gynt daeth y llwythau ar bererindod,

Llwythau Iehofa.

Deddf Israel yno yw moliannu Iehofa.

5Yno codwyd gorseddau barn,

Gorseddau tŷ Dafydd.

6Gweddïwch dros lwyddiant Ieriwsalem,

Boed heddwch i’w charedigion,

7Boed llwyddiant o fewn dy furiau,

A heddwch yn dy blasau.

8Er mwyn fy mrodyr a’m cyfeillion

Dymunaf lwyddiant i ti:

9Er mwyn tŷ Iehofa ein Duw

Ceisiaf ddaioni i ti.

salm cxxii

Hyfrydwch pererin o fro bell yn ystod un o’r gwyliau mawr yn Ieriwsalem a fynegir yn y Salm hon. Myfyria ar hen hanes y ddinas, a gweddïa dros ei llwyddiant a’i lles.

Diweddar iawn ydyw arddull y Salm, ac atgof yn unig oedd y Gaethglud pan ganwyd hi.

Nodiadau

1, 2. Dyry gwahoddiad ei gyfeillion i ddyfod gyda hwynt i’r ŵyl lawenydd iddo, a dwyseir y llawenydd pan sylweddola ddiben y bererindod, sef addoli yn y Deml yn Ieriwsalem.

3, 4, 5. Bu’r ddinas yn adfeilion, ond ail-adeiladwyd hi, ac unwaith eto y mae ei heolydd yn gyfain, a’i muriau yn gryno heb adwyau.

Yn 5 meddwl y mae’r awdur am y gorffennol pan gyrchai ei dadau, fel yntau, yno ar bererindod. Nid hap a digwydd yn hanes Israel ydyw cadw’r gwyliau hyn, ond dyna ei harfer gyson. a’i deddf hi.

6—9. Buasai cynghanedd y gwreiddiol yn apelio at galon Cymro, ond ni ellir ei gyfleu mewn cyfieithiad. Anogaeth i’r pererinion i weddïo dros y ddinas santaidd.

Pynciau i’w Trafod:

1. Pa werth oedd i’r pererindodau i Ieriwsalem i’r Iddewon ar wasgar?

2. Darllenwch hanes ddigwyddiadau cyffrous Dydd y Pentecost yn Llyfr yr Actau, ac ystyriwch y fantais a gafodd Cristnogaeth o bererindod yr Iddewon i’r ddinas.