2 Timoteo 3 - Buenas Nuevas para el Paraguay

Mba'éichapa va'erãpa ára pahávo yvypóra kuéra

1Reikuaa vaerã avei kóva: pe ára pahávo ou va'erãha ára ipohýiva.

2Yvypóra kuéra ojupe kuéra guarã añónte vaerã, ha iplata rayhu vaerã, ojejapo ha ijuruguasu vaerã. Oñe'ẽ ky'a vaerã Tupã Ñandejára rehe, na iñe'ẽrendúi vaerã túva kuérape, ha idesagradecido ndoroapói vaerã mba'eve ramo.

3Ndoporohayhúi ha ndoporoporiahuverekói vaerã, ijurumby'ỹi ha ndojejokokuaái vaerã, isagua'a ha ndohayhúi vaerã mba'eve iporãva.

4Itraicionero, hova atã ha ijejapo vaerã, ohekáva hembipota kuéra uvei, oheka rangue Tupã Ñandejárape.

5Heko marangatu gua'u vaerã, ipy'apýpe kuéra katu ndoikuaái pe marangatu pu'aka.

Aníke rereko mba'evete umichagua ndive.

6Umíva apytépe oĩ umi oikéva óga kuéra rupi ha ombotavy kuña kuéra oñemboheko'ỹvape, henyhẽva pecádogui. Umívape ombotyryry opaichagua mba'e pota vai,

7oikuaapa tapiátava ha máramo oikuaapa'ỹva pe añete.

8Ha Janes ha Jambres oñemoĩ haguéicha Moisés rehe, upéicha avei ko'ãva oñemoĩ pe añete rehe; kuimba'e ipensamiénto ky'áva ñemombopyre pe jerovia reheguágui.

9Upéicharamo jepe ndoho mombyry mo'ãi, opavave ohechakuaátagui ivýro hague, ojehu haguéicha umi Moisés rehe oñemoĩ va'ekuépe.

Pablo he'íva ipaharã Timotéope

10Nde katu reikuaa porã pe che ambo'éva, ha che rekovekue, che py'apy, che jerovia, che paciencia, che mborayhu, ha upe aropu'aka va'ekue,

11ajepersegui ha upe ahasa asy ramo guare. Reikuaapa pe ojehu va'ekue chéve umi ciudad kuéra Antioquía, Iconio ha Lístrape, ha heta ajerereko asy hague, opáichavo, Ñandejára che libra opa umi mba'égui.

12Ha upéicha avei opa umi heko marangatuséva Cristo Jesús rayhupápe ojepersegui vaerã katuete.

13Umi tekove vai oikóva oporombotavy katu oho vai vaive vaerã, oporombotavy ha oñembotavy vaerã.

14Nde katu epyta hatã umi mba'e reikuaa ha rerovia va'ekuépe, reikuaa pype mávapa ne mbo'e raka'e,

15ha ne mitã guive reikuaaha pe Ñandejára Kuatiañe'ẽ Marangatu ikatúva ne moarandu salvacionrã rejerovia rupi Cristo Jesús rehe.

16Pe Kuatiañe'ẽ Marangatu oikopa va'ekue Tupã Ñandejára remimoiuka rupi, oporombo'e ha oporomomarandu haguã, oporomuatyrõ ha oporohekombo'e haguã pe hekopeteguáva rehe,

17ikatu haguã pe kuimba'e Tupã Ñandejára reheguáva oĩmbaite, ojapokuaa haguã opaichagua mba'e iporãva.