Romanos 7 - Buenas Nuevas para el Paraguay

Omendáva reko

1Che ryvy kuéra, peẽ peikuaáva ley, ¿ndapeikuaái nga'u piko pe ley ipu'akaha pe máva rehe oikove aja añó?

2Pe kuña omendáva niko ojuaju iména rehe ley rupi pe iména oikove aja; pe iména omano ramo katu pe kuña ojei pe ley poguýgui ombojuaju va'ekue ichupe iména rehe.

3Upéicha rupi ha'e oiko ramo kuimba'e ambue ndive pe iména oikove aja, omongy'a imendare. Iména omano ramo katu, ha'e ojei upe imendare rehegua ley poguýgui, ha ikatu omenda kuimba'e ambue rehe omongy'a'ỹ rehe imendare.

4Upéicha avei che ryvy kuéra, peẽ pemano va'ekue pe léype pejuaju rupi Cristo rete rehe, peiko haguã ména ambue mba'éramo. Ko'ãga niko Cristo mba'e peẽ, pe oikove jevy va'ekue omanóva apytégui. Ha upéva niko ikatu haguã Tupã Ñandejára ñande poru.

5Jaikove aja pe yvypóra rekovekue ojerure háicha, pe ley omombáy va'ekue umi ñane mba'e vai pota, ha umíva rembiapokue ñande retepýpe ñande reraha ñemanóme.

6Ko'ãga katu ñamanóma pe ley peguarã ñande rereko va'ekue ipoguýpe, ha jajei ipoguýgui jajejokuaiuka haguã Tupã Ñandejárape pe tekove pyahu Espíritu reheguápe, ha nda pe ley tuja poguýpei oĩva kuatiápe.

Pe pecado che pype oĩva

7Aipóramo, ¿piko mba'e ja'éta? ¿Pecadoha pe ley piko? ¡Mba'evéicharamo! Opáichavo, che ndaikuaái vaerã mo'ã pecádopa mba'e, pe ley rehe'ỹ. Ñdaikuaái vaerã mo'ã pe che mba'e'ỹva pota, pe ley he'i'ỹ rire: “Ani reipota ne mba'e'ỹva.”

8Pe pecado katu oiporu upéva, ha pe tembiapoukapy rupi voi omombáy che pype opaichagua mba'e pota vai. Pe ley'ỹ rehe katu pe pecado omano.

9Ymavémi ley'ỹ rehe che aikove. Oúma ramo pe tembiapoukapy katu, pe pecado oikove jevy ha che amano.

10Ha upéicha ojehu, pe tembiapoukapy che moingove vaerã mo'ãva, chéve che juka.

11Pe pecado niko oiporu pe tembiapoukapýpe ha che mbotavy, ha pe tembiapoukapy rupi voi che juka.

12Pe ley niko ojehegui voi imarangatu, ha pe tembiapoukapy imarangatu, ijoheipyre ha iporã.

13Ha aipóramo, ¿piko pe iporãva chéve che juka? ¡Mba'evéicharamo! Pe pecado niko pe che juka va'ekue, ojehechauka haguã pecadoha; upéicha ojapo pe iporãva rupi ha upéicha pe tembiapoukapy rupi voi ojehechauka pe pecado ivai etereiha.

14Jaikuaa niko pe ley yvága peguaha, che katu yvypóra, me'ẽmbyre hepy rehe pecado rembiguairã.

15Che niko ndaikuaái pe ajapóva, ndajapói pe ajaposéva, pe ajapose'ỹva uvei katuete ajapo.

16Ha ajapo ramo pe ajapose'ỹva ahechakuaa pe ley iporãha.

17Upéicharamo nda chevéima pe ajapóva upéva, pe pecado che pype oĩva uvei ojapo.

18Che aikuaa voi che pype ndaiporiha pe iporãva, ha'ese pe che rekovekue yvypóra reko reheguápe, ajapose ramo jepe pe iporãva ndaikatúi ajapo.

19Pe iporãva ajaposéva ndajapói, pe ivaíva ajapose'ỹva uvei ajapo.

20Upéicharamo, ajapo ramo pe ajapose'ỹva, nda chevéima pe ojapóva, pe pecado che pype oĩvante.

21Ha upéicha ojehu chéve kóva; ajapose jave pe iporãva ivaíva mante ajuhu che pype.

22Che py'apýpe arohory pe Tupã Ñandejára ley;

23che pype katu ahecha ambue ley, orairõva pe ley che akãme oĩvape, pe pecado rehegua ley oĩva che pype ha che rerekóva ipoguýpe.

24¡Angái che! ¿Mávapa che pe'áta ko tete te'õngueichaguágui?

25Tupã Ñandejára mante, Ñandejára Jesucristo rupi. Ame'ẽ las gracias Tupã Ñandejárape. Ha upéicha che py'apýpe aime Tupã Ñandejára ley he'ívape, pe che rekovekue yvypóra reko rehegua rupi katu oiko che hegui pe pecado rehegua ley rembiguái.