Romanos 9 - Buenas Nuevas para el Paraguay

Tupã Ñandejára oiporavo va'ekue Israelita kuérape

1Ha'e añetegua Cristo rehe ajerovia háicha, ha nda che japúi, pe che py'apy ñe'ẽ Espíritu Santo ohekombo'éva, he'i chéve añeteha.

2Che mba'embyasy eterei ha tapia hasy chéve che corazõ,

3hi'ãnte chéve chete voi aime maldición guýpe, mombyry Crístogui, upéva iporãta ramo che ryvy kuéra peguarã, umi che retã megua kuéra.

4Ha'e kuéra niko Israel ñemoñare kuéra, ha Tupã Ñandejára omoguahẽ ichupe kuéra ta'ýra ramo, Tupã Ñandejára oĩ va'ekue hendive kuéra ha ome'ẽ va'ekue ichupe kuéra iñe'ẽ, pe tembiapoukapy, ha pe ichupe ñemomba'eguasu ha umi promesa.

5Ha'e kuéra ñande ru kuéra ypykue ñemoñare, ha hetã megua kuéragui ou va'ekue pe Cristo yvypóraicha, ha'e niko Tupã opaite mba'e ári, oñemomba'eguasu vaerã tapia guarã. Amén.

6Ndaha'éi oiko'ỹgui pe Tupã Ñandejára ñe'ẽ he'íva, nda opa Israel ñemoñare Israelita etéguinte uvei.

7Nda opa Abraham ñemoñare Abraham ra'y, Tupã Ñandejára he'i va'ekue Abrahámpe: “Isaac rupi ne ñemoñare vaerã.”

8Kóva rupi jaikuaa avave ndaha'eiha Tupã Ñandejára ra'y peteĩ tetã meguaha rehe, umi onace va'ekue Tupã Ñandejára promesa rupínte, umíva ojerereko Abraham ra'y ramo.

9Kóva ha'e hína pe Tupã Ñandejára promesa Abrahámpe: “Hi'árape ajúta ha Sara imembýta.”

10Ha nda upéva añói. Rebeca memby kuéra ñande ru ypykue Isaac ra'y kuéra;

11-13upéicharamo jepe ha'e kuéra onace mboyve gueteri, ha ojapo mboyve mba'eve iporãva terã ivaíva, Tupã Ñandejára he'i va'ekue Rebécape: “Pe ijypykue pe imitãvéva rembiguairã.” Kóva pe Tupã Ñandejára Kuatiañe'ẽme he'i háicha: “Ahayhu Jacóbpe, Esaú rehe katu nda che a'éi.” Ha upéicha ojekuaauka Tupã Ñandejára ikatuha oiporavo pe ha'e oiporavosévape, omomba'e'ỹ rehe pe ha'e kuéra ojapóva.

14¿Mba'épa ja'éta aipóramo? ¿Ja'éta piko Tupã Ñandejára heko joja'ỹha? ¡Mba'evéicharamo!

15Moiséspe he'i va'ekue voi: “Aiporiahuverekóne aiporiahuverekosévape, ha ambyasýne pe che ambyasysévape.”

16Upéicha niko ndaha'éi jaipota terã ñañeha'ã rehe, Tupã Ñandejára oporoporiahuvereko rehénte uvei.

17Pe Kuatiañe'ẽ Marangatúpe niko Tupã Ñandejára he'i Faraónpe: “Ajapo va'ekue nde hegui Rey ahechauka haguã nde rupi che pu'akakue, ha aikuaauka haguã che réra yvy jerekuévo.”

18Ha upéicha Tupã Ñandejára oiporiahuvereko upe ha'e oiporiahuverekosévape, ha upéicha avei omohatã pe ha'e omohatãséva corazõ.

19Aipóramo eréta chéve: “Upéicharamo, ¿piko mba'e rehe Tupã Ñandejára oguereko yvypóra kuérape mba'e vai apohare ramo? ¿Máva piko ikatu oñemoĩ hembipota rehe?”

20¡Nde kuimba'e! ¿Nde piko máva rembohovái haguã Tupã Ñandejárape? Pe olla tujúgui apopyre piko he'íta pe ijapoharépe: “¿Mba'érehe piko che apo péicha?”

21Pe tuju rehe omba'apóva ikatu ojapo pe tujúgui pe ha'e ojaposéva; ikatu ojapo peteĩ olla ojeporu porã vaerã, ha ambue katu ojerereko haguã mba'evéramo.

22¿Ha mba'e piko? Tupã Ñandejára ohechaukaségui ipu'aka ha mba'éichapa oporonupã, ojejoko kirirĩhápe umi ojecastiga ha oñehundi vaerã ndive guarã.

23Ha ojapo upéicha oikuaauka haguã pe iglória mba'eguasuha umi ha'e oiporiahuverekóva ha ombosako'i va'ekue ndive guarã ohupity haguã upe gloria.

24Tupã Ñandejára niko ñane renói, peteĩme Israelita kuéra apytégui ha ambue kuérape katu Israelita'ỹva apytégui.

25Oseas kuatiañe'ẽme he'i háicha:

Umi che retã megua'ỹvape, ambohérata che retã megua;

ha pe ojehayhu'ỹ va'ekuépe, ambohérata che rembiayhu.

26Ha upe oje'e haguépe ichupe kuéra: “Peẽ ndaha'éi che rehegua”,

upépe oñembohéra vaerã Tupã Ñandejára oikovéva ra'y kuéra.

27Umi Israel peguáva rehe katu, Isaías he'i va'ekue: “Israel ra'y kuéra heta ramo jepe yvyku'i mar rembe'y peguáicha, hembyre añó mante ojesalva vaerã,

28Ñandejára ojapo va'erãgui iñe'ẽ yvy ári hekoitépe ha pya'e.”

29Pe Isaías voi he'i haguéicha:

Ñandejára, pe ejército ruvicha, oheja'ỹ rire ñandéve ñande ra'y kuerarã,

oiko vaerã mo'ã ñande hegui Sodoma ha Gomorra ciudad kuéraicha.

Israelita kuéra ha evangelio

30¿Mba'épa ja'éta aipóramo? Umi Israelita'ỹva ha umi oheka'ỹ va'ekue pe mba'e heko pegua, umíva ohupity hague. Upéva he'ise ohupity hague pe ñemboheko potĩ oúva jerovia rupi.

31Israelita kuérava katu oiko va'ekue pe ley omboheko potĩ vaerã mo'ãme ichupe kuéra, ndojapói hekópe upe ley.

32¿Mba'érehe? Ndoikói hague rehe jerovia rupi, umi mba'e ha'e kuéra ojapo va'ekue rupínte. Upéva rehe oñepysanga pe “ita ñepysangarã rehe”

33oje'e háicha hese Tupã Ñandejára Kuatiañe'ẽme:

Che ko amoĩ Siónpe peteĩ ita ñepysangarã,

peteĩ ita oporoitýva; pe ojeroviáva hese, noñemotĩ va'erãi.