Efesios 1 - Buenas Nuevas para el Paraguay

San Pablo Kuatiañe'ẽ Efeso pegua iglésia peguarã

1Che, Pablo, Jesucristo apóstol Tupã Ñandejára rembipota rupi, ajapo ko kuatiañe'ẽ umi Efeso ciudádpe oĩva peguarã, umi Tupã Ñandejára mba'éva ha ojeroviáva Jesucristo rehe.

2Tupã ñande Ru, ha Ñandejára Jesucristo, ta pende rovasa ha ta pene mbopy'aguapy.

Jehovasa yvága pegua Cristo rupi

3Ñamomba'eguasúkena Ñandejára Jesucristo Ru Tupã Ñandejárape, ha'e niko ñande rovasa va'ekue opaichagua jehovasa yvága pegua reheve ñane mopeteĩ rupi Cristo ndive.

4Tupã Ñandejára niko ñande poravo va'ekue Cristo ndive ojapo mboyve ko mundo, ñane marangatu ha ñande culpa'ỹ haguã henondépe.

5Ñande rayhúgui ñande poravo va'ekue ymaite guive, ñande rereko haguã ta'ýra teerã Jesucristo rupi, oipota haguéicha oiko ha hembipota rupi.

6Upéva rehe ñamomba'eguasu tapia vaerã Tupã Ñandejárape imborayhu tuichaite rehe, ha ipype ñande rovasa rehe Ita'ýra ohayhuetéva rupi.

7Ha'e niko ñande salva va'ekue ita'ýra ruguy rupi, operdona pype ñande pecado kuéra, tuichaite niko pe imborayhu.

8Tupã Ñandejára ñane myenyhẽ imborayhúpe, pe iñarandu ha imba'ekuaa tuichaite rupi

9ha oikuaauka ñandéve pe hembipota ojekuaa'ỹ va'ekue, ha'e voi ojapose haguéicha ha upéichama voi oipotágui oiko Cristo rupi.

10Hi'ára guahẽ ha'ára Tupã Ñandejára ombyatypa vaerã Cristo rehe opa umi mba'e oĩva yvágape ha oĩva yvy ári.

11Tupã Ñandejára, ojapóva opa mba'e ha'e oipota háicha ha hembipota rupi, ñande poravo va'ekue ymaite guive imba'erã ñane mopeteĩ rupi Cristo ndive.

12Ojapo upéicha ikatu haguã ñande kuéra jajerovia tenonde va'ekue Cristo rehe, jaikove ñamomba'eguasu haguã iglória.

13Ha peẽ avei, pehendúvo pe ñe'ẽ añetegua, pe terakuã porã pene salvación rehegua, ha pejeroviávo Cristo rehe, pende sella va'ekue Tupã Ñandejára mba'e tee ramo pe Espíritu Santo rupi ha'e he'i va'ekue ome'ẽtaha.

14Pe Espíritu Santo niko oñeme'ẽ tenonde ñandéve omoañete haguã upe jahupitýtava, upe ára Tupã Ñandejára osalvapaha peve umi imba'éva. Kóva avei niko oñemomba'eguasu haguã pe iglória.

Pablo ojerure Tupã Ñandejárape omoarandu haguã umi Jesús rehe ojeroviávape

15Upéva rehe che, ahendúvo mba'eichaitépa pejerovia Ñandejára Jesús rehe, ha pe mborayhu perekóva opa umi Tupã Ñandejára mba'éva ndive guarã,

16ame'ẽ tapiáva ame'ẽ'ỹre las gracias pende rehe ha che mandu'áva pende rehe che ñembo'épe.

17Ajerure Ñandejára Jesucristo Tupãme, Túva mba'eguasuetévape, tome'ẽ peẽme arandu pende espíritupe peikuaa haguã Tupã Ñandejárape ha'e voi oikuaaukáva peẽme.

18Ajerure Tupã Ñandejára tohesape pende py'apy, peikuaa haguã mba'e peha'arõ haguãpa pene renói, ha mba'eichaitépa tuicha pe mba'eta Tupã Ñandejára ome'ẽva umi imba'évape,

19ha mba'eichaitépa tuicha ha naimbojojahái pe ipu'aka omba'apóva ñande pype ñande jaroviávape. Kóva ko pu'aka voi hína pe Tupã Ñandejára oiporu va'ekue hetaite pu'aka ha mbarete reheve,

20omoingove jevy ramo guare Crístope omanóva apytégui ha omboguapy ipo akatúape yvágape,

21ha omoĩ ichupe mburuvicha, autoridad, pu'aka terã ipoguýpe oporoguerekóva ári ikatúva ñamombe'u ko ára kóvape terã pe ára ou va'erãme.

22Omoĩ opaite mba'e Cristo pyguýpe, ha ichupete voi katu omoĩ pe iglésia akã ramo.

23Pe iglésia niko Cristo rete, ha pe omoĩmbáva Crístope voi; ha Cristo avei, omoĩmba ha omyenyhẽ opa mba'épe.