Romanos 11 - Buenas Nuevas para el Paraguay

Hembýva Israelita kuéragui

1Ha ko'ãga aporandu: ¿Oheja rei pipoko Tupã Ñandejára hetã Israélpe? ¡Mba'evéicharamo! Ko che voi Israelítava, Abraham retãygua ha Benjamín ra'yre.

2Ymaite guive, Tupã Ñandejára oikuaa Israelita kuéra imba'eha; ha ko'ãga ndoheja reíri ichupe kuéra. ¿Ndapeikuaái piko peẽ pe Tupã Ñandejára Kuatiañe'ẽme he'íva Elías rehe, mba'épa ha'e he'i raka'e iñembo'épe Tupã Ñandejárape Israel rehe? He'i va'ekue:

3“Che Jára, ojukapa hikuái ne ñemoñe'ẽhára kuérape ha oitypa nde altar kuéra, ha che añoite apyta, ha chéve che jukase avei hikuái.”

4¿Ha mba'e he'i ichupe Tupã Ñandejára? “Opyta gueteri chéve siete mil kuimba'e oñesũ'ỹ va'ekue Baal renondépe.”

5Ha upéicha avei ko'ãga opyta gueteri umi Tupã Ñandejára imborayhu rupi oiporavo va'ekue.

6Ha imborayhu rupi ramo, ndaha'evéima pe máva rembiapokue rehe, upéicha rire niko pe Tupã Ñandejára mborayhu ndaha'éi vaerã mo'ã mborayhu.

7¿Upéicharamo piko mba'e? Israelita kuéra ndohupitýi upe oheka va'ekue, umi Tupã Ñandejára oiporavo va'ekue katu ohupity. Ambue kuéra katu oñemohatã,

8Tupã Ñandejára Kuatiañe'ẽme he'i háicha: “Tupã Ñandejára omonguerái ichupe kuéra; ome'ẽ ichupe kuéra tesa ohecha'ỹva ha apysa ohendu'ỹva, ha upéicha ko'ãga peve.”

9David he'i avei:

Ijarete kuéragui toiko ñuhã ha poro'apytĩha,

oñepysanga ha oñembuepotĩ haguã;

10ta iñypytũ hesa kuéra ani haguã ohecha

ha ta ijatúa karapã tapia guarã.

Umi Israelita'ỹva salvación

11Ko'ãga aporandu: ¿Oñepysanga pipoko umi Israelita ho'aite haguã? ¡Mba'evéicharamo! Upéva rangue, na iñe'ẽrendúivo ha'e kuéra, umi Israelita'ỹva ohupity salvación, Israelgua kuéra oñemokyre'ỹ haguã.

12Aipóramo, pe hembiapo vai kuéra rupi ou porã ramo yvypóra kuérape, ha pe ijejavy kuéra ou porã ramo umi Israelita'ỹvape, ¡mba'éicha va'erãpa ha'e kuéra oikepa ha'ára!

13Opáichavo, kóva che ha'e peẽ Israelita'ỹvape: Tupã Ñandejára che mondógui Israelita'ỹvape, amomba'e pe che rembiaporã,

14jahecha namokyre'ỹipa umi che rehegua kuéravape ojapose haguã peẽicha, ha upéichapepa oime ojesalváva ijapytégui kuéra.

15Israelita kuéra oñemboyke rupi ikatu ramo umi Israelita'ỹva oñembopy'aguapy Tupã Ñandejára ndive, ¿mba'épa ndoikói chéne ha'e kuéra ojererohory jevy ha'ára? Jeikove jevy omano va'ekue peguarã.

16Pe tenonderã oñekuave'ẽva Tupã Ñandejárape imarangatu ramo, pe hesegua uperiregua imarangatupa avei. Ha pe hapo imarangatu ramo, pe hakã nguéra imarangatu avei.

17Oime Israelita kuérava, pe olivo rakãicha oñekytĩ va'ekue, ha hendaguépe reñemoheñói nde rejogua va'ekue olivo ka'aguýpe. Ha upéicha rehupity avei nde pe olivo rapo ha hykuere porãite.

18Aníke upéva rehe reimo'ã nde ne porãveha umi hakã nguéra teégui. Reimo'ã ramo ne porãveha ke ehechakuaa na ndeiha pe remoingovéva pe yvyra rapópe, pe hapo uvei ne moingoveha ndéve.

19Ikatúne vaerã ere: “Umi hakãngue oñekytĩ va'ekue che añemoheñói haguã pe olivo rehe.”

20Iporãite, opáichavo, oñekytĩ va'ekue ndojeroviáigui, ha nde reime ne rendaguãme rejerovia rupínte. Upéva rehe ani rejererovu, ema'ẽ porã uvei.

21Tupã Ñandejára operdona'ỹ rire ramo umi hakã etépe, na ne perdonái chéne ndéve avei.

22Ema'ẽke aipóramo mba'éichapa Tupã Ñandejára ipy'aporã, opáichavo, ipochy avei. Ipochy va'ekue umi ho'a va'ekue ndive, nendive katu imba'eporã. Opáichavo, rejerovia tapia vaerã pe ipy'aporã rehe; upeicha'ỹ ramo, nde avei reñekytĩ vaerã.

23Upéicha avei, umi Israelita ojerovia jevy ramo, oñemoheñói jevy pyahu vaerã, Tupã Ñandejára niko ipu'aka ojapo haguã upéicha.

24Nde Israelita'ỹva reñekytĩ rire ramo olivo ka'aguýgui, ha hekope'ỹme ramo jepe reñemoheñói pe olivo ñeñotỹmbyréva rehe, ¡umi Israelítama katu, ko ha'e kuérava pe olivo ñeñotỹmbyre rakãva, oñemoheñói jevy pyahu vaerã imáta tee rehe!

Israelita kuéra ojesalva vaerã ipahápe

25Che ryvy kuéra, aipota peikuaa ko mba'e ñemimby ani haguã peimo'ã pene aranduha: Umi Israel pegua oñemohatã va'ekue niko umi Israelita'ỹva oikepa pevénte.

26Upéicha oiko rire katu, opa Israel pegua ojesalva vaerã he'i háicha Tupã Ñandejára Kuatiañe'ẽme:

Pe tetã mosãsohára ou vaerã Sióngui,

ha oipe'a vaerã Jacóbogui pe iñañangue.

27Ha kóvata che ñe'ẽme'ẽ hendive kuéra,

che aipe'a rire ichugui kuéra ipecádo kuéra.

28Israelita kuéra niko ojerereko ohayhu'ỹva ramo Tupã Ñandejárape peẽ perovia hague rehe pe salvación rehegua ñe'ẽ; opáichavo, Tupã Ñandejára ohayhu ichupe kuéra oiporavo hague rehe ijypy kuérape.

29Tupã Ñandejára ndoipe'ái pe ome'ẽva, terã noñemo'ambuéi pe iporohenóigui.

30Peẽ yma na pene ñe'ẽrendúi va'ekue Tupã Ñandejárape, ko'ãga katu Tupã Ñandejára pende poriahuvereko Israelita kuéra iñe'ẽrendu'ỹgui.

31Upéicha avei ko'ãga ha'e kuéra na iñe'ẽrendúi, Tupã Ñandejára oiporiahuvereko haguã ichupe kuéra upe peẽme pende poriahuvereko háicha.

32Tupã Ñandejára omoĩ opavavépe ñe'ẽrendu'ỹ poguýpe, oiporiahuvereko haguã opavavépe.

33¡Ipypuku ete niko umi Tupã Ñandejára mba'eta, pe iñarandukue, ha imba'ekuaa! Ndaikatúi jaikuaa umi mba'e ichupe hi'ãva, terã hape kuéra.

34“¿Máva piko oikuaa raka'e pe Ñandejára py'apy? ¿Terã mávapa ohekombo'e ra'e ichupe?

35Ndaipóri avave ikatu va'ekue ome'ẽ raẽ Ñandejárape, ikatu haguã upéi oñembyekovia ichupe.”

36Opaite mba'e oúgui Tupã Ñandejára gui, ha hembiapokue, ha imba'erã. ¡Toñembotuicha Tupã Ñandejára tapia guarã! Amén.