2 Corintios 5 - Buenas Nuevas para el Paraguay

1Jaikuaa niko, ko ñande rete oñembyai ramo, peteĩ óga hi'are'ỹvaicha, Tupã Ñandejára oguerekoha sako'ipyre ñandéve guarã yvágape peteĩ óga tapia guarãva, ndojejapói va'ekue yvypóra po rupi.

2Upéva rehe niko jaiko aja ko ñande retépe ñane pyahẽ, hi'ãgui ñandéve java pe ñande róga yvága peguápe,

3ñane monde vaerã aóicha ani haguã ñaime opívo.

4Jaikove aja ko ñande retépe, ñane pyahẽ ha jajepy'apy, ndaha'éi ñañemboiségui ko ñande rete tujágui, ñañemondeségui pe ñande rete pyahúguinte uvei, pe ñande rehegua omanóva hekovia haguã pe tekovete pyahu rehe.

5Ha Tupã Ñandejára voi niko pe ñane mbosako'i va'ekue upevarã, ha ome'ẽ tenonde ñandéve pe Espíritu Santo añetegua rechaukaha ramo.

6Upéva rehe jajerovia tapia, ha jaikuaa ñaime aja ko ñande retépe, ñane pore'ỹha Ñandejára gui;

7jerovia rupi niko jaiko ha ndaha'éi jahecháva rehe.

8Opáichavo, jajerovia ramo jepe, hi'ãnte vaerã mo'ã ñandéve jajehekýi ko ñande retégui, jaha haguã Ñandejára rendápe.

9Upéva rehe roñeha'ã rojapo pe Ñandejára oipotáva, toroime terã toroime'ỹ ore retépe.

10Tekotevẽgui opavave jajechauka Cristo tribunálpe, peteĩ teĩme oñeme'ẽ haguã hembiapokue rehe hetépe oiko aja, hembiapo porãngue rehe terã hembiapo vaikue rehe.

Py'aguapy rehegua ñe'ẽ

11Upéva rehe, roikuaágui pe kyhyje Ñandejára gui, roñeha'ã rogueroviauka ore rapicha kuérape. Tupã Ñandejára katu niko oikuaa mba'épa ore, ha aha'arõ peẽ avei peikuaáne haguã pende py'apýpe.

12Ndaha'éi roñepyrũ jevýva roñe'ẽ porã ore jehe, roipotánte uvei ore rerovy'a, ikatu haguã pereko peje vaerã umi ojererovúvape okaguiogua rehe, pe py'apy pegua rehe rangue.

13Ore tarova ramo niko Tupã Ñandejára peguarãnte, ha ore akã porã ramo katu peẽme guarã.

14Pe Cristo mborayhu ore mokyre'ỹ, ropensa ramo kóva rehe: peteĩ omano hague opavave rehe, ha upéva rehe opavave omanomba.

15Cristo omano opavave rehe, umi oikovéva anivéma haguã oikove ojupe kuéra guarã, upe omano ha oikove jevy va'ekue hese kuéra peguarãntema.

16Upéva rehe, ko'ãga ore ndoroikuaavéima avavépe yvypóra rekópe, ha Crístope jepe upéicha roikuaa va'ekue ramo yma, ko'ãga nda upeichavéima roikuaa ichupe.

17Upéva rehe, pe oñemopeteĩva Cristo ndive ohupity tekove pyahu, umi mba'e tuja ohasapáma ha opa mba'e ipyahupa.

18Ha opa ko'ã mba'e Tupã Ñandejára rembiapo, ñane moingo porã jevy va'ekue ondive Cristo rupi, ha ñande jokuái ñamoingo porã haguã opavavépe hendive.

19Cristo rupi Tupã Ñandejára omoingo porã jevy va'ekue yvypóra kuérape ondive, oipe'a va'ekue yvypóra kuéra árigui ipecádo kuéra; ha omoherakuãuka ore rupi pe ñe'ẽ jeiko porã jevy rehegua.

20Upéva rehe rojejokuái Cristo rérape, Tupã Ñandejára ete voi ojerure ramo guáicha ore rupi; rojerure peẽme Cristo rérape: peiko porã jevy haguã Tupã Ñandejára ndive.

21Cristo ndopecái va'ekue, opáichavo, ñande rayhupápe Tupã Ñandejára oguereko va'ekue ichupe pecador ramo, ñañe mopeteĩvo Cristo ndive ikatu haguã jahupity pe teko potĩ Tupã Ñandejára ome'ẽva.