Jeremia 47 - Albanian Bible 1994（ALBB）

1Fjala e Zotit që iu drejtua profetit Jeremia kundër filistenjve, para se Faraoni të sulmonte Gazën.

2Kështu thotë Zoti: "Ja ujërat po ngrihen nga veriu, bëhen një përrua që del nga shtrati dhe përmbytin vendin dhe gjithçka përmban, qytetin dhe ata që banojnë në të; atëherë njerëzit do të bërtasin dhe tërë banorët e vendit, do të ulërijnë.

3Në zhurmën e trokut të kuajve të fuqishëm, në rrapëllimën e qerreve të tyre, në poteren e rrotave të tyre, etërit nuk do të kthehen nga bijtë e tyre për shkak të dobësisë së duarve të tyre,

4për shkak të ditës që vjen për të shkatërruar tërë filistenjtë, duke eliminuar nga Tiro dhe Sidoni çdo mbeturinë që mund të japë ndihmë, sepse Zoti do të shkatërrojë filistenjtë, mbeturinat e ishullit të Kaftorit.

5Gaza u bë e shogët, Ashkeloni u shkatërrua. O banorë të luginës së tyre që mbetët gjallë, deri kur do të vazhdoni të bëni prerje?

6O shpatë e Zotit, kur do të kesh prehje? Hyr në millin tënd, ndalu dhe rri e qetë!

7Si mund të pushojë kur Zoti i ka dhënë urdhra kundër Ashkelonit dhe kundër bregut të detit?; ai e ka thirrur atje".