Esta Grik E - Buk Baibel Long Tok Pisin 2008 + DC（TPI2008）

King i givim tok bilong helpim ol Juda

13 Em hia olgeta tok i stap long pas bilong king, “Bikpela King Serksis i givim gude long ol hetman bilong ol 127 provins i stap namel long India na Sudan, na long ol pipel i belgut long mipela.

14 Planti man i save kamap bikhet moa yet taim ol man i givim biknem long ol na i helpim ol.

15 Ol i gat gutpela taim tru, tasol ol i no save yusim gut. Olsem na ol i kirap na i laik mekim nogut long ol wokman bilong mipela. Na ol i pasim tingting nogut bilong bagarapim ol man i bin helpim ol bipo.

16 Ol i no save tenkyu long ol pipel i mekim gut long ol. Nogat. Na tu ol i ting ol inap hait long ai bilong God na ol bai i no inap kamap long kot bilong em. Tasol God i save lukim olgeta samting na em i no laikim tru ol pasin nogut. Ol dispela man i save bikhet na ol i save putim yau long ol tok gris bilong ol longlong man bilong mekim sin.

17 “Planti taim ol pren bilong king i save kisim wok bilong bosim olkain samting, na bihain ol i save putim hevi long ol bikman. Olsem na ol dispela pren bilong king i kamap poroman wantaim ol bikman. Ol i painim rot bilong kilim nating ol man na long mekim olkain pasin nogut, i no gat rot long stretim gen.

18 Na long tok giaman na tok gris bilong ol, ol dispela pren i save paulim gutpela tingting bilong ol hetman.

19 “I gat planti eksampel bilong dispela kain pasin i stap, em pasin bilong yusim pawa bilong mekim pasin nogut. Yumi ken ritim long stori bilong ol tumbuna. Na tu yumi ken lukim long ol samting nogut i bin kamap namel long yumi yet.

20 Mi tingting nau long wokim strongpela lo bai kantri bilong mi i no gat trabel. Na olgeta pipel insait long en i ken sindaun gut.

21 Mi inap mekim olsem, sapos mi senisim sampela pasin, na sapos mi skelim stret olgeta tok i kamap long kot bilong mi.

22 “Yupela tingim nau dispela man Haman, pikinini bilong Hamedata. Em i man bilong kantri Masedonia. Em i man bilong narapela lain. I no gat wanpela man bilong Persia i bin i stap namel long ol tumbuna papa bilong en tu. Haman em i no man bilong belgut olsem mi. Tasol maski, em i bin kam na mi bin amamas long kisim em.

23 Mi man bilong laikim ol arapela man, olsem na mi lukautim em gut. Ol i kolim em olsem papa bilong kantri bilong yumi, na em i kisim biknem tru namel long yumi. King wanpela tasol i antap long em.

24 “Tasol hambak bilong dispela man i moa yet. Em i kirap na i traim long kilim mi bai em yet i ken bosim kantri bilong mi.

25 Em i gris na i trik na i laik mekim mi i kilim i dai Mordekai, dispela man i bin lukautim gut laip bilong mi na oltaim i save helpim mi. Na tu, Haman i laik bai mi mas kilim Esta, dispela gutpela kwin bilong yumi. Na las tru, em i laik bai mi mas kilim i dai olgeta Juda i stap namel long yumi.

26 Long dispela pasin em i laik pinisim olgeta lain i stap bilong helpim yumi, na bihain ol Masedonia i ken kam na kisim kantri bilong Persia.

27 Dispela man nogut i bin pasim tingting long pinisim olgeta manmeri bilong lain Juda. Tasol mi bin painimaut olsem, ol Juda i gutpela pren tru bilong dispela kantri, na ol yet i gat gutpela lo tru namel long ol.

28 Ol i save lotuim God bilong i stap oltaim, em God i antap tru na i winim olgeta arapela god. God yet i bin lukaut gut tru long dispela kantri, stat long taim bilong ol tumbuna na i kam inap nau.

29 “Olsem na mi tokim yupela nau, yupela i no ken bihainim ol dispela tok yupela i bin kisim long pas Haman i bin salim i kam long yupela.

30 Long wanem, man i bin givim tok long yupela i mas mekim ol dispela samting, em wantaim famili bilong en i hangamap pinis klostu long dua bilong biktaun Susa. God i save bosim olgeta samting, em i bin bekim dispela rong bilong Haman kwiktaim tru.

31 “Yupela i mas kisim ol dispela pas na hangamapim long olgeta ples bung bilong ol manmeri. Na yupela i mas larim ol Juda i bihainim ol pasin bilong ol.

32 Na sapos sampela man i laik bagarapim ol Juda long dispela de Haman i bin makim pinis, orait yupela i mas helpim ol Juda. Dispela de em i de namba 13 bilong namba 12 mun, em ol i kolim mun Adar.

33 God i save bosim olgeta samting, em i bin senisim dispela de nogut, na nau em i kamap de bilong amamas bilong dispela lain manmeri em i bin makim bilong em yet.

34 “Yupela ol Juda, yupela i mas makim dispela de olsem wanpela bikpela de bilong yupela, na yupela i mas amamas long en.

35 Long dispela yia na long olgeta yia bihain, dispela de i ken helpim yumi na ol kantri i stap pren bilong yumi long tingim dispela samting, God i save lukautim kantri bilong yumi. Na ol man i bin pasim tok long bagarapim yumi, ol i ken lukim dispela de na ol i ken tingting long promis bilong God long pinisim ol birua bilong yumi.

36 “I no gat wanpela lain bilong wanpela taun o provins i ken sakim dispela tok. Sapos ol i sakim, orait ol bai i pilim belhat bilong mi. Bai mi krungutim ol na kukim taun bilong ol olgeta. Na ol man na pisin na animal bai i no i go moa long dispela ples inap oltaim.