Buk Song 87 - Buk Baibel Long Tok Pisin 2008 + DC（TPI2008）

Ol i amamas long JerusalemDispela song em song bilong ol lain Kora. Em i song bilong lotu.

1God i bin wokim

taun bilong en

long maunten bilong em yet.

2Bikpela i laikim

olgeta arapela ples long Israel,

tasol em i laikim tumas

Jerusalem.

3Ol manmeri bilong taun bilong God,

yupela harim.

God i mekim gutpela gutpela wok

long yupela.

4God i tok olsem,

“Taim mi kaunim ol lain manmeri

i save bihainim tok bilong mi,

bai mi kaunim ol Isip na Babilon

wantaim ol.

Na bai mi tokim ol Filistia na Tair

na Itiopia olsem,

ol tu i bilong Jerusalem.

5Bai mi tok long Jerusalem olsem,

‘Em i ples

bilong olgeta lain manmeri.’”

Na God Antap Tru,

em yet bai i sanapim Jerusalem

na mekim em i stap strong olgeta.

6Bikpela bai i raitim nem

bilong ol arapela lain manmeri,

na em bai i bungim ol

na kaunim ol wantaim ol manmeri

bilong Jerusalem.

7Na ol manmeri

i stap long Jerusalem

bai ol i singsing na amamas.

Na bai ol i tok, “Jerusalem, yu as

bilong olgeta gutpela samting

mipela i gat.”