Матеј 28 - Свето Евангелие 2008（MK2008）

ГЛАВА 28(Зачало 115)

1Кога измина саботата, на осамнување, во првиот ден од седмицата, дојдоа Марија Магдалина и другата Марија, да го видат гробот.

2И ете, стана голем потрес: ангел Господов слезе од небото, пристапи, го оттргна каменот од гробната врата и седеше на него;

3лицето му беше како молња, а алиштата – бели како снег;

4и стражарите, уплашени од него, трепереа и беа како мртви.

5Ангелот се заврте кон жените и им рече: – Не плашете се; знам дека Го барате Исуса Распнатиот;

6не е овде, воскресна, како што беше рекол. Дојдете и видете го местото, каде што лежел Господ,

7па отидете побргу и кажете им на учениците Негови дека Он воскресна од мртвите. И ете, ќе отиде во Галилеја, порано од вас; таму ќе Го видите. – Ете, ви кажав.

8И откако излегоа набрзина од гробот, тие со страв и голема радост отрчаа да им соопштат на учениците Негови.

9Кога одеа да им јават на Неговите ученици, ете, Исус ги сретна и рече: – Радувајте се!

Крај на предутреното евангелие на Велигден

А тие се приближија, се фатија за нозете Негови и Му се поклонија;

10тогаш Исус им рече: – Не плашете се; одете и соопштете им на браќата Мои, да отидат во Галилеја, и таму ќе Ме видат.

11Кога одеа тие, ете, некои од стражарите, влегувајќи в град, им кажаа на првосвештениците за сето она што беше се случило.

12И тие, кога се собраа со старешините и направија совет, им дадоа многу пари на војниците,

13велејќи: – кажете дека учениците Негови дојдоа и Го украдоа, кога ние спиевме;

14и, ако за тоа чуе управникот, ние ќе го смириме и ќе направиме и вам ништо да не ви се случи.

15А тие ги зедоа парите и направија, како што беа подучени. И тој глас се пренесува меѓу Јудејците и до ден-денеска.

(Зачало 116)

16Аединаесетте ученици отидоа во Галилеја, во гората, каде што им беше заповедал Исус;

17па штом Го видоа, Му се поклонија; а некои се сомневаа.

18А Исус, кога се приближи, им проговори, велејќи: – Ми се даде секаква власт на небото и на земјата.

19Одете и научете ги сите народи, крштевајќи ги во името на Отецот, и Синот, и Светиот Дух,

20и, учејќи ги да пазат сѐ што сум ви заповедал; и ете, Јас сум со вас преку сите дни, до крајот на светот. – Амин!

Крај на Велика Сабота и на првото воскресно евангелие.