Romanos 11 - Kuna, Border NT

Israel-tulemal-walpókwajal-pesmalad Pabbal abonolego

1Tegil an pemalzhe ekisbimojundo: ¿Imi Pab Tummad chunchunnad aga e-tulemal-mete o chul? Chulá.

Imi antin-Pablo, Israel-tulemodo. Tegin an Abraham-e-wagwamo, Benjamín-chikid. Tenal Pab an-kwen-metejuldo.

2Imi Pab Tummad iktualeba tule-egadga-kumaloed-kwen-metejul. ¿Imi pemal nued wismalzhulzhí Pab-kartagin Elíasgin igi chogzha? Imi Elías Pabzhe-koledgin Israel-tulemal-tuktis:

3Pab Tummadye, Israel-tulemal

Pe-kaka-palchogmalad-mechamalye,

tegin pega-immal-kuged-kwigwismalad eyarismalbalye.

Tegin we tulemal anpí walkwénna an-ebesmal.

Tenal we tulemal ampa an-mesbi-kualmalmoye.

1 R. 19:10,14

4¿Imi Pab Tummadde Elíasga igi chogzha pe ebinzhe? Nabir. Imi Pab Tummad Elíasga chogzhado:

Imi antin milikugle pato tulemal-chus,

melle Baal-chowal-mimmiganzhe Pab Tummadyob kolgal.

1 R. 19:18

5Imisgwadzhe Pab Tummad ampa tule-chunaimo. Imi Pab Tummad tule-chuleged-wilubzhulinadbal yabli walpókwa tule-chus.

6Imi Pab tule-chuleged-wilubzhulinadbal tule-chus-choggu, al tule e-immal-imakedbal kwen chuleszhul. Tenal Pab wilejakwa-takedgin tule-chuszhulilen, Pab-wilejakwa-tule-taked-wilubzhulinad ibga kwen kunonikojulin.

7¿Tede igijun? Nabir. Imi Israel-tulemal peigunain, tule-iskued-nikchulmaladga kunonigal. Tenal Israel-tulemal kwen unniguszhul-kus tule-iskued-nikchulmaladga kunonigal. Tenal tule-chulesmaladbi unnila unnigusmal tule-iskued-nikchulmaladga kunonimal. Tenal Israel-tule-pimalad Pab pela-pela tar-izhos melle egin ibzhemalgal.

8Imi Pab-kartagin ampa nermakal maimodo:

Pab Tummad imisgwadzhe nono-owelejadyob

lolló we tulemal-imas.

Tegin Pab aku-atagal,

tegin aku-itogal tar-imasbal.

Dt. 29:4; Is. 29:10

9Tegin David Pab-kartagin ampa chogmodo:

Imi tule-Pabgin-ibzhejulmalad

weligwal mas-kunpukmaladgin e-poniga kunonikilen,

nabirin, tule-chakigin-kalenonikidyob.

Tenal tulemal weligwal mas-kunpukwadgin tule-iskana

ukposmalalen, nabirin,

tule akwa-mulgin nag-kolnonikidyob.

Tegin we tulemal peyedzhe oturdalenonikilen, nabirbalin.

10Tegin we tulemal-e-imia aku ata-peielen,

nabirin, melle immal takegal.

Tegin we tule-e-yankal ilagwen tulludik peielen,

nabirbalin.

Sal. 69:22-23

Judiojulmalad Jesucristogin-penzhulidbal abonolenonikoed

11Imi an pemalzhe ekisbibaldo: ¿Imi Israel-tulemal chunchunnad Pab-Tummadgin-yolejadbal ilgwen pelguo o chul? Chulá. Tenal Israel-tulemal-Pabbak-iskujadbal Pab Judiojulmalad-abonononi, Israel-tulemal Judiojulmaladgin nobgunonimalgal.

12Imi Israel-tulemal iskuedgin-arkwasmaladbal tule-iti-napkin-pukmaladga ib-nuedga kunoni. Tegin Israel-tulemal Pabgin-nojadbal Judiojulmaladga ib-nuedga kunonimo. Al Israel-tulemal Pabbak kannan igal-nudanonimalal, pul-pule Judiojulmaladga ib-nuedga kunonimalo.

13Imi an pemal-Judiojulmaladga an chogbido: imi an Judiojulmaladga an Jesús-nuggin-palmilegalidga mai-choggu, al an yer itodo, we Pabga-arpagedgin arpagal.

14Imi an imabi-kunaindo, an-tulemal Judiojulmaladzhe nobgumal, an-tulemal-wal-walgwen Pabbal abonolenonimalgal.

15Imi Pab Israel-tulemal-ebejadbal, Judiojulmalad kep Pabbak igal-nudanonimal. Al Pab kannan Israel-tulemal-abingajal, pul-pule Judiojulmaladga ib-nuedga kunoniko, tule purkwaled-akar kannan tullejadyob.

16Imi tule kepe-madu-chobed Pab Tummadga ukchal, Pab Tummadgatpí, al madu-kwagwaled-pejad ampa chwilidikidmo.

Teginbal, olivo-chapi-chagla ampa Pabgatpímo, tegin e-aanganmal ampa chwilidikidmo. Imi Israel-tule ampa weobmo. Imi Israel-tulemal kepegin Pab Tummadgatpí-choggu, al Israel-tulemal ukin-ukin-ampagunatapid ampa chwilidikmalmogad.

17Imi Israel-tulemal-wal-walgwen Pabgin nodmal, chapi-walgin e-aan chiklejadyob kunonimal. Tenal Israel-tulemal olivo-chapi-chunchunnad-e-aanyob.

Tenal Judiojulmaladdin, olivo-chapur-e-aanyob. Imi pemal-olivo-chapur-e-aanganyob, olivo-wal-chunchunnadgin e-aan-kusgu-yoyomaladgin yolenonimal. Tegin pemal olivo-walgin-yolejadbal ampa nimai.

18Tenal pemal-olivo-chapur-aanganyob-yoles-choggu, al pe melle olivo-chunchunnad-aangan-itimilejadgin yolejadbal pe tummarba itononiko. Imi pe tummarba itogel, pe wisguenab pedin tunkugal olivo-wal-chunchunnad-kwen-imajul. Tenal olivo-wal-chunchunnaddin tunkugal pe-imamai.

19Imi an wisdo, pemal-wal-walgwen chogdamalo: “¿Igi taklejun?” Nabir. Tenal pe chogmalbal: “Imi olivo-aangan-itimiles, anmal ánal olivo-wal-chunchunnadgin yolenonimalgal. Al anmal akalzhul tummarba itogodo.”

20Imi pemal nabir chogmalando. Tenal Judiomal Pabgin-ibzhejulidbal itimilenonimal. Tenal pemal Pabgin-penzhulidbal kusguadyob olivo-wal-chunchunnadgin yolenonimal. Al pe melle tummarba itononimalo. Tenal pe tobe-naneenabmal, melle Judioga-kusmaladyob pemalga kunonigalmo.

21¿Ibiga an teob chog? Nabir. Imi Pab olivo-aangan-chunchunnadyob, wilejakwa e-tulemal-pel-takchajul-choggu, imisgin pemal pulzhun, ¿Pab Tummad chun wilejakwa pemal-takojí? Chulá.

22Imi pemal pog-pel pinzheenabmal, Pab chabzhul tule-imakedgin o chulil, Pab wilejakwa tule-takedgin. Imi Pabdin Israel-tulemal egin-pengujadbal chabzhul Israel-tulemal-imas.

Tenal pemal ampa Pab-wilejakwa-tule-takedbal naneel, Pab wilejakwa pe-takmogo. Chulil, Pab ampa chabzhul pe-imanonimogo.

23Imi Judiomal ampa ukin-ukin Pabgin pengunatapchulil, abonolenoniko, olivo-aan kannan e-walgin yolenonikidyob. Imi Judiomal Jesucristogin-penzhul-kunonikil, Pab kannaleged nikado, Judiomal-abonogal.

24Imi Pab tule-abonogal unnigus-choggu, al Pab e-tulega pemal-imako, olivo-aan-chapurbalid pinche kusgu-e-igal-maichulidbal olivo-wal-chunchunnadgin yolejadyob. Al Judiomal-Jesucristogin-penzhul-kunonikil, Pab pul-pule e-tulega Israel-tulemal-imabalo, olivo-aan-chunnad aga e-walgin kannan yolejadyob.

Neg-tuku-omojal, Israel-tule-ampa-pukmaloed Pabbal abonolenonikoed

25Kwenamalad, imi an peichul pemal-Judiojulmalad aga tummarba-itogedgin chogdamalo: “Pab Israel-tulemal-mete-choggu, al anmal yer-itomal.”

Tenal antin, an pei, pemal-Judiojulmalad Pab imichal Israel-tulemalgin-immal-magarojad wisgumal. Imi Pab pel-kwablejal Israel-tulemal-okannos melle Cristogin ibzhegal, Judiojulmalad-Pabbal-chulesmalad pel-kwablejal abonolenonimaloedzhe.

26Tenal Judiojulmalad pél abonolenonimalal, kep Israel-tule-mamimalad-pel-kwapa abonolenonimogo. Imi Pab-kartagin ampa nermakal maimodo:

Imi Pab Tummad chogzhado:

“Imi tule-abonoged Sión-akar noniko.

Tenal we tule iskued-igegal

Israel-tulemal-imanoniko.

Is. 59:20

27Tenal an Israel-tulemalga iskued elijal,

an Israel-tulemalga igal-mesne, iskued igegal.”

Jer. 31:33-34

28Imi Pab-Tummad-kaka-nuegan-igalzhiktin Israel-tulemal pemalbal Pabbak-aichulmal. Tenal Pab-Tummad-tule-chued-igalzhikdin Israel-tulemal e-tad-saglaganbal Pabbak-ai-nuegan.

29¿Ibiga an teob chog? Nabir. Imi Pab Tummad tulemalga immal-ukoeddin keg tulegin pal-idir. Tegin Pab tule-chujal, keg tule-pal-metbal.

30Imi akpene pemal Pab-chogzhad-pallí kwen nanedijulmal. Tenal imidin Israel-tulemal Pab-chogzhad-pallí-immal-kwen-imaszhulidbal Pab wilejakwa yabli pemal-taknonimal.

31Imi Israel-tulemal imisgwadzhe Pab-chogzhad-pallí kwen ibzhejulmal. Tenal Pab wilejakwa pe-takedbal, Pab kujal wilejakwa ampa Israel-tulemal-taknonimogo.

32¿Ibiga weob Israel-tulemalga kus pe ebinzhe? Nabir. Imi Pab Tummad oyononi tulemal-pel-kwapa e-chogzhad-pallí kwen ibzhaszhulmal. Al Pab Tummad akalzhul pel-kwapa wilejakwa tule-taknonimalo.

33Imi Pab-kartagin chogdo:

Imi Pab Tummad napírra

tulemalga immal-nuegan imanoni.

Tegin Pab napírra pinzheed nikabal,

tegin Pab pirkin immal wisbal.

Tegin tule mag kwen itojulbal

Pab ibiga weob immal ima.

Tenal tule Pab-pinzheed-kwen-palgaojul-kuo.

Is. 55:8-9

34¿Imi toa wisguo-junna,

Pab igi pinzhe? Keg kue.

¿Tegin toa Pab-Tummad-uanaibalo? Keg kubal.

Job 15:8; Is. 40:13; Jer. 23:18

35¿Imi toa Pab Tummadga immal ukcha

Pab we tulega immal ukegalmo? Chulá.

Tenal immalmal pel-kwapa Pabgadbi.

Job 41:11

36Tegin immalmal pél Pab-akar tanimal, tegin immalmal pél Pabbal tani, tegin immalmal pél Pab Tummadgadbal. Imi Pab Tummad ilagwen-nadgu nug-otummoledi-kuelen, nabirin. Pitogua.