Romanos 10 - Kuna, Border NT

1Kwenadgan, imi an ulubgin napírra peigujiindo, tegin an Pabzhe pela-pela kolaldabal, Israel-tulemal Pabbal abonolenonimalgal.

2Imi antin Israel-tulemalgin chogmodo, Israel-tulemal chunchunnad Pabga immal imabimalan. Tenal Israel-tulemal immal-kwen-wichulidbal immal imakaldamal.

3Tenal Israel-tulemal kwen wichulmal Pab tar-pentabi-kunain tule-iskued-nikchulidga kunonigal. Tegin Israel-tulemal aga tukin alamadi-kusmal, tule-iskued-nikchulmaladga aga imagal. Al Israel-tulemal Pab-kwen-abingaszhulmal, tule-iskued-nikchulidga kunonigal.

4Imi Moisés-igal-mamikid Cristobal pelgunoni, tule-pel-kwapa-Cristogin-penzhulmalad tule-iskued-nikchulmaladga kunonigal.

5Imi Moisés tule-iskued-nikchulidgin chunmasgu, Moisés-igal-mamikid-pallí-nanediidgin chunmadi-kus. Tenal Moisés chogzhado:

Imi tule we igal-mamikid-pallí naneel,

we tule tullego.

Lv. 18:5

6Tenal tule-Cristogin-penzhulidbal-iskued-nikchulidga-kunonikid-igal chogdo:

Pe melle aga ulubgin pinzhedamalo:

“¿Toa Pab-negzhe togo

(iti-napche Cristo-chedagal)?”

Dt. 30:12

7“¿Toa napil-ulpal nao

(purkwal-maid-akar kannan Cristo chedagal)?”

Dt. 30:13

Keg kue.

8Tenal Pab-kartagin chogdo:

Pab-kaka-nuegan pato pe-waglik kudii,

pe akne-need wichul,

Pab-kaka pal amigal.

Imi Pab-kaka-nuegan

pato pe-ulubgin mai,

tegin pe-uabal choglenaibal.

Dt. 30:14

Tenal anmal Cristogin-penzhulidgin we kakagin chunmananimal.

9Imi pe aga kakagin chogzhal: “Jesús pul Tule-Tummadga mai,” tegin pe aga ulubgin kwen penguszhulbalil, Pab Tummad purkwaled-akar Jesús-otulos, pedin ilagwen-nadgu abonolego Pab Tummadzhe melle sapejul oturdalegal.

10Imi pe chunchunnad aga ulubgin Cristogin penzhulil, kep pe tule-iskued-nikchulidyob kunoniko. Tegin pe tulemal-wagin Jesúsgin chogzhal: “Jesús Pul-Tule-Tummad,” kep pe unniguo abonolegal.

11Imi Pab-kartagin ampa chogmodo:

Imi meke-ibi-tule we tulegin penzhulil,

kwen pinkeguojul-kuo.

Is. 28:16

12Imi Pab akal-akal tule-kwen-takchul, pel yopígwadbi Judiomal-tegin-Judiojulmalad-tak. Imi Pab pel-kwapa-tulemal e-tummadga mai. Tegin Pab tule-pel-kwapa-eje-kolmaladga wilub-okpis immal imabal. Imi Pab-kartagin chogdo:

13Imi meke-ibi-tule Pab Tummadzhe kolnail,

we tule abonolego

Pab Tummadzhe melle sapejul oturdalegal.

Jl. 2:32

14Tenal tule Jesucristogin ampa ibzhejulil, ¿tede we tule igi Pab-Jesúszhe kolnoniko? Keg kue. Tenal tule ampa Jesucristo-igal kwen itodijulil, ¿tede we tule igi Jesucristogin ibzhenoniko? Keg kue. Tenal tule-kwen-nikchulil, Pab-kaka-nuegangin tulemalga chunmagal, ¿tede we tulemal igi wisgumalo Jesucristo ibi-tule? Keg kue.

15Tenal tule kwen palmileszhulil Pab-kaka-nuegangin chunmagal, ¿tede we tule igi tulemalga Jesucristo-igalgin chunmanoniko? Keg kue. Imi Pab-kartagin ampa chogmodo:

Imi tule-Pab-kaka-nuegan-palchogdanikil,

ibi tar-nued.

Is. 52:7

16Tenal Israel-tulemal-pel-kwapa Pab-kaka-nuegan kwen abingaszhulmal. Imi akpene Pab-kaka-palchoged-Isaías ampa chogzhamodo:

Pab Tummadye,

¿toa pe-kaka-palmijadbal ibzhao?

¿Tulemal walpókwajal pegin ibzhaojulzhí?

Teobdo.

Is. 53:1

17Imi tule Pab-Jesucristo-igal-itononikidbal kep Pab-Jesucristogin ibzhenoniko. Tenal Cristo-kakapurwagin tule kep wisgunoniko Pab-Jesucristo-igal, igi.

18Al an ekisbimojundo: ¿Tegil Israel-tulemal Pab-kaka-nuegan kwen itodijulmaldé? ¿Al Israel-tulemal weob chogyé? Chulá. Tenal Israel-tulemal Pab-kaka-nuegan itosmaldo. Imi Pab-kartagin chogmodo:

Imi napa-naid-ugakche,

Pab-kaka mimiles,

tegin tule-napi-pukwamaladzhe

Pab-kaka pel mimilesbal.

Sal. 19:4

19Imi an kannan pemalzhe ekisbibaldo: ¿Imi Israel-tulemalde chunchunnad aku itomalá? Chulá. Imi kepegin Moisés chogzhado:

Pab Tummad chog:

“Imi an tule-pimaladga immal-nuegan imakedbal,

ankin nobgu pemal-imanoniko.

Tegin tulemal-an-tulejulmalad-immal-wichulmaladbal,

an istar-itogal pemal-imamalbalo.”

Dt. 32:21

20Tegin Isaías tobzhulidgin chogzhamodo:

Pab Tummad chog:

“Imi tule-an-amiszhulmalad an-amismal.

Tegin tule an-ekichiszhulmaladga

an oyos antin toa-tule.”

Is. 65:1

21Tenal Isaías Israel-tulemalgin chogzhado:

Pab Tummad chog:

“Imi antin wakur-akar-chedoje

pemalzhe chunkal oyonai, anche taggal.

Tenal pemal yapa anche tagmal,

tegin an-choged-pallí immal kwen imaszhulmalbal.”

Is. 65:2