Lucas 3 - Kuna, Border NT

Juan Bautista neg-nikchulidbal chunmadi-kujad(Mateo 3:1-12; Marcos 1:1-8; Juan 1:19-28)

1Imi teun takalgu, César-Tiberio Romano-tummadga-togzhad-akar, pirkaambe-kakaatal kudani. Tenal teun Poncio-Pilato Provincia-Judeagin gobernadorga maimo. Tenal Herode Provincia-Galileagin gobernadorga maimo. Tenal teun Herode-e-urpa-Felipe Provincia-Itureagin tegin Provincia-Traconitegin gobernadorga maimo. Tenal teun Lisanias Provincia-Abiliniagin gobernadorga maimo.

2Tenal teun Anás tegin Caifás tule-irwal-Pabzhe-kolmalad-pul-tummadga maimo.

Imi teun takalgu, Zacarías-machi-Juan-Bautista neg-nikchulidbal-maidgin, Pab Tummad Juan Bautistaga chunmanoni.

3Tegidgin Juan Bautista nadzhun Jordán-tiwalzhik. Tegin Juan Bautista tulemalga chogalzhun: “Imi pemal aga ulubgin iskuedgin pukib-itogenabmal, tegin pe-taed ogwaenabmal. Tegin pe tigin oglegenabmalbal, Pab Tummad pega iskued-nikad eligal.”

4Tenal teun Juan Bautistagin weob immal-kunaid akpene Pab-kaka-palchoged-Isaías nermajadyob kunoni. Tenal teun Isaías chogzhado:

Imi neg-nikchulidbal tule-walgwen kolmakal-kolmakal

chunmanoniko:

“Imi pemal Tule-Tummadga neg nudakenabmal,

tegin pe Tummadga inniki-inniki igal imakenabmalbal.

5Tegin pe neg-kullu-kullu-takleged enzheenabmal,

tegin pe yal-murre-murre-taklemalad omataroenabmal,

Tegin pe igal-ebiral-mamimalad inniki-inniki

onoenabmal,

tegin pe igal-mullu-mullu-taklemalad chwili imakenabmalbal.

6Tegin kep tulemal-pel-kwapa

Pab-tule-abonoged-mag-taknonimalo.”

Is. 40:3-5

7Tegin Juan Bautista pél chunmasgu, tulemal Juanzhe nonimal, Juande tigin e-ogmalgal. Tegin Juan tulemalga chogal: “Pemal nia-wagwagan, ¿toa pemalga chogzha-ade tigin-oboedbal Pab-peyedzhe-tule-oturdakoed-akar abonolego? We tigin oboedbal tule-kwen-abonogojul-kuo.

8Tenal pemal nued-naneedbal tulemalga aga oyogenabgwel, pemal chunchunnad aga ulubgin iskuedgin pukib-itononimal.

“Tenal pemal melle chogdamalo: ‘Abraham an-tad-sagla-choggu, al an akalzhul yozhagu nanao.’ Tenal an chunchunnad pemalga chogdo: imi Pab Tummad chunna nabir we akwamal opinno Abraham-e-wagwaganga kugal. Al Pab Tummad pemal-kwen-napijul Abraham-wagwaganga kugal.

9“Imi Pab Tummad kuakwa mai sapejul tule-nuekwá-nanejulmalad-oturdagal, tule chapi-keg-chanmaked-chalgin akan-kani-kwichidyob, kuakwa chapi olegal. Tenal Pab peyedzhe pel-kwapa tule-iskana-oturdako, chapi-keg-chanmaked keg-chulgu olaoedyob tegin chogin chapi-okummakoedyobbal.”

10Tegin tule-itobukmalad Juanzhe ekichialmal:

—¿Tegil anmal ibi imakenabzhun?

11Tegin Juan tulemalga chogal:

—Imi pe yogal-koabo nikamalal, tule-yogal-nikchulmaladga pe kogwen ukenab. Tegin pe mas-kunned nikamalal, tule-mas-kunned-nikchulmaladga pe mas-kunned ukmalbalo.

12Tegin tule-Romano-tummadga-tulemalgin-mani-egwanmalad Juanzhe nonimalmo. Tenal we tulemal Juanzhe ekichialmalmo:

—¿Tule-oturdaked, anmal ibi imakenabmalmo?

13Tegin Juan we tulemalga chogalmo:

—Pemal melle tulemalgin wilub-okpis mani pal egwanmalo, unnila igal-mamikidyob pe tulegin mani egwanmalo.

14Tegin chulubmal Juanzhe nonimalmo, Juanzhe ekichialmalmo:

—¿Anmal, ibi imakenabmalmo?

Tegin Juan chulubmalga chogalmo:

—Imi pedin melle kantikidgin tulemalgin pal immal idiro. Tegin pe melle tulemalgin kakanzheedgin tule-tummaganga immal-chogo. Tegin pe mani-kanaidgin pe yer itogenabmalbal.

15Tegin tulemal-pukmalad kuakwa abintabukmal, Juande ega chogdago-dewa, ede Pab-akpene-chogzhad-palmidagoed-tule.

16Tenal Juan tulemalga chogalzhun:

“Tenal antin tiginbi unnila tule-og, oyogal pemal ulubgin chunchunnad iskuedgin pukib-itonanimal. Tenal tule-an-cholbal-tanikoed anka pul kannaleged nika. Tenal we tule anka pul tule-tummadiidbal, an kwen unnijul targa kutar-tub echikkal. Tenal tule-an-cholbal-tanikoed Pab Purpa Nuedgin tegin chogin pe-ognonimalo.

17“Tenal tule-an-cholbal-tanikoed kuakwa kwichi pis-pis tulemal-urpegal, tule pala-azhaled-kanikidgin trigo-omigal kuakwa kwichidyob. Tegin tule-an-cholbal-tanikoed Pab-neggin tule-nuegan-odogo, tule kwapí aga trigo-kwa chaboedyob. Tegin tule-an-cholbal-tanikoed cho-keg-akinnedgin tule-iskana-urpo, tule chogin kummagal trigo-e-uka urpoedyob.”

18Tegin Juan pél chunmasgu, ichejul akal-akal tulemal-uanaisbal tegin Juan tulemalga Pab-kaka-nuegangin chunmadi-kusbal.

19Imi teun takalgu, Herode e-urpa-Felipegin ome-Herodías-egwas. Al Juan Herodega pakal-pud chogzhagusdo: “Imi pedin noal kudii. ¿Ibiga pe aga urpa-Felipegin ome-Herodías-egwas-wede? Imi anmalga igal weob kwen maichul.” Tegin Juan Herodega Herode-immal-akalodiid pél chogzhabal.

20Tenal Herode ukin immal akalodiidbal, oturdaleged-neggin Juan-odos.

Juan tigin Jesús-okchad(Mateo 3:13-17; Marcos 1:9-11)

21Tenal Juan Bautista ampa tigin tulemal-ognaidgin, Juan tigin Jesús-okchamo. Tegin Jesús-Pabzhe-kolnaidgin arpak nikpa-neg arkat-nad.

22Tegidgin Pab Purpa Nued Jesúsgin nuyob aktenoni. Tegin Pab Tummad nikpa-neg-akar kolnoni, Jesúsga chogal:

—Imi pedin an-Machi-Pilaled, tegin an pegin weligwal-ito.

Jesús-tadgan ampagusmalad(Mateo 1:1-17)

23Tenal teun Jesús pirka-tulagwen-kakaambe-nikadgin kep Pab-igalbal tulemal-oturdakalzhun. Tenal tulemal ebinzhasmal Jesúsde José-e-machi.

Tenal Josédin Elí-e-machi.

24Tegin Elídin Matat-e-machi.

Tegin Matattin Leví-e-machi.

Tegin Levídin Melqui-e-machi.

Tegin Melquidin Jana-e-machi.

Tegin Janadin José-e-machi.

25Tegin Josédin Matatías-e-machi.

Tegin Matatíasdin Amós-e-machi.

Tegin Amósdin Nahúm-e-machi.

Tegin Nahúmdin Esli-e-machi.

Tegin Eslidin Nagai-e-machi.

26Tegin Nagaidin Maat-e-machi.

Tegin Maatdin, Matatías-e-machi.

Tegin Matatíasdin Semei-e-machi.

Tegin Semeidin Josec-e-machi.

Tegin Josecdin Judá-e-machi.

27Tegin Judádin Joanán-e-machi.

Tegin Joanándin Resa-e-machi.

Tegin Resadin Zorobabel-e-machi.

Tegin Zorobabeldin Salatiel-e-machi.

Tegin Salatieldin Neri-e-machi.

28Tegin Neridin Melqui-e-machi.

Tegin Melquidin Adi-e-machi.

Tegin Adidin Cosam-e-machi.

Tegin Cosamdin Elmadam-e-machi.

Tegin Elmadamdin Er-e-machi.

29Tegin Erdin Josué-e-machi.

Tegin Josuédin Eliezer-e-machi.

Tegin Eliezerdin Jorim-e-machi.

Tegin Jorimdin Matat-e-machi.

Tegin Matattin Leví-e-machi.

30Tegin Levídin Simeón-e-machi.

Tegin Simeóndin Judá-e-machi.

Tegin Judádin José-e-machi.

Tegin Josédin Jonam-e-machi.

Tegin Jonamdin Eliaquim-e-machi.

31Tegin Eliaquimdin Melea-e-machi.

Tegin Meleadin Mena-e-machi.

Tegin Menadin Matata-e-machi.

Tegin Matatadin Natán-e-machi.

Tegin Natándin David-e-machi.

32Tegin Daviddin Isaí-e-machi.

Tegin Isaídin Obed-e-machi.

Tegin Obeddin Booz-e-machi.

Tegin Boozdin Sala-e-machi.

Tegin Saladin Naasón-e-machi.

33Tegin Naasóndin Aminadab-e-machi.

Tegin Aminadabdin Admin-e-machi.

Tegin Admindin, Arni-e-machi.

Tegin Arnidin Esrom-e-machi.

Tegin Esromdin Fares-e-machi.

Tegin Faresdin Judá-e-machi.

34Tegin Judádin Jacob-e-machi.

Tegin Jacobdin Isaac-e-machi.

Tegin Isaacdin Abraham-e-machi.

Tegin Abrahamdin Taré-e-machi.

Tegin Tarédin Nacor-e-machi.

35Tegin Nacordin Serug-e-machi.

Tegin Serugdin Ragau-e-machi.

Tegin Ragaudin Peleg-e-machi.

Tegin Pelegdin Heber-e-machi.

Tegin Heberdin Sala-e-machi.

36Tegin Saladin Cainán-e-machi.

Tegin Cainándin Arfaxad-e-machi.

Tegin Arfaxaddin Sem-e-machi.

Tegin Semdin Noé-e-machi.

Tegin Noédin Lamec-e-machi.

37Tegin Lamecdin Matusalén-e-machi.

Tegin Matusaléndin Enoc-e-machi.

Tegin Enocdin Jared-e-machi.

Tegin Jareddin Mahalaleel-e-machi.

Tegin Mahalaleeldin Cainán-e-machi.

38Tegin Cainándin Enós-e-machi.

Tegin Enósdin Set-e-machi.

Tegin Settin Adán-e-machi.

Tegin Adándin Pab-Tummad-tar-opinnijad.

Tenal Jesúsdin weob tadgan-nikusdo.