Juan 18 - Kuna, Border NT

Judio-tummagan Jesús-kasgujad(Mateo 26:47-56; Marcos 14:43-52; Lucas 22:47-53)

1Tegin Jesús Pab Tummadzhe pél kochagu, Jesús aga e-chapinganbak kullubal nadmalzhun, Cedrón-tian-opakal, immal-chalgan-naidzhe. Tegin Jesús aga e-chapinganbak tebal ampagutapmalzhun.

2Tenal Judas-Iscariote-Jesúsgin-akpitchad ampa we immal-chalgan-naid wismo. Tenal Jesús aga e-chapinganbak melugus we immal-chalgan-naidbal ormadi-kus.

3Al Judas we immal-chalgan-naidzhe íchejul tulemal-cheinonimal, tegin íchejul chulubmal-cheinonimalbal. Tegin Judas tulemal-irwal-Pabzhe-kolmalad-e-mosmal, tegin Pariseomal-e-mosmal-cheinonimalbal. Tenal tulemal-nonimalad kallen-annik-nonimal, tegin achachar-ogaal cheinonimalbal. Tegin tulemal es-pilacheed tegin chowal-oro ilabal anniknonimalbal.

4Tenal Jesús pato wiis, ega igi immalmal kuoed. Al Jesús tulemal-tanimalad-abin-nad. Tegin Jesús tulemalzhe ekichialzhun:

—¿Pe toa-amimaldé?

5Tegin tule-nonimalad Jesúsga chogalmal:

—Anmal Jesús-Nazaretkined-amidanimal.

Tegin Jesús tule-nonimaladga chogal:

—Anid, an Jesús-Nazaretkineddé.

Imi teun takalgu, Judas-Jesúsgin-akpitchad tule-nonimaladbak kwichimo.

6Tegin Jesús aga tukin chogzhagu ede Jesús, tulemal-Jesús-kagal-nonimalad chorzhik-chorzhik nadmal, ilgwen napche aglatapmal.

7Tegin Jesús kannan tule-nonimaladzhe ekichialbal:

—¿Tegil pe toa-amimalzhun?

Tegin tule-nonimalad kannan Jesúsga chogalmalbal:

—Anmal Jesús-Nazaretkined-amidanimaldo.

8Tegin Jesús kannan tule-nonimaladga chogalbal:

—Imi antin, an pemalga chogzhado, ante Jesús-Nazaretkined. Tenal pe an-amidani-chogel, we an-chapingan-pukmalad, meke nemalodo.

9Al Jesús-e-chapingana-immal-kujad, Jesús-akpene-chogzhad-yopí kunoni. Tenal akpene Jesús chogzhado: “Imi tule-pe-anka-ukchamalad an kwen oweszhul-kus.”

10Tenal teun takalgu, Simón-Pedro es-nai kwichi. Tegin Pedro es unnusgu, tule-irwal-Pabzhe-koled-pul-tummad-e-mos-chiktegu, chuchu-nuedzhikpi kaledap-idirrí. Tenal tule-chuchu-chiklejad nug Malco.

11Tegin Jesús Pedroga chogal:

—Es kannan uka-yabal pe yoo. Imi Pab-chogedbal anka wileged noni, kobed-kakpi-koblegedyob. Al an weob wileged-wilub.

Chulubmal Anászhe Jesús-chejad(Mateo 26:57-58; Marcos 14:53-54; Lucas 22:54)

12Tegin chulub-tummad aga e-chapinganga igal-ukcha, Jesús-kagal. Tegin chulubmal Judio-tummagan-e-mosmalbak Jesús-kasmalgu, Jesús-chunkal kugmasmal.

13Tegin tulemal-Jesús-kasmalad ilgwen Anás-negzhe Jesús-chesmal. Imi teun takalgu, Caifás te pirkagin tule-irwal-Pabzhe-kolmalad-pul-tummadga mai. Tenal Anásdin, Caifás-e-chak.

14Tenal Anás-chapin-Caifásdin akpene Judiomalga Jesúsgin chogzhagujad, tule-walgwen purkwel, pul ib-nued pul tulemal-pel-kwapa purkwemalgal.

Pedro kepe Jesúsgin chogzhagujad: “An Jesús-kwen-wichul”(Mateo 26:69-70; Marcos 14:66-68; Lucas 22:54-57)

15Tegin Simón-Pedro tegin Juan Jesús-cholbal nadmal. Tenal tule-irwal-Pabzhe-kolmalad-pul-tummad mag Juan-tak-choggu, al Juan Jesúsbak mes togzhamo, tule-tummagan-neg-abalgin-neg-olol-naidzhe.

16Tenal Pedrodin magadbal wanagakkin kwichi-pes. Tenal tule-tummad-mag-Juan-takedbal Juan puna-wanagak-takchiidbak chunmas, Pedro-odogal. Tegin Pedro kep togdemojun.

17Tenal puna-wanagak-takchiid Pedroje ekichial:

—¿Imi pe we tule-kalejad e-chapinmojulzhí?

Tegin Pedro punaga chogal:

—Chulá. An we tule-e-chapin-chuli.

18Imi teun takalgu, neg pela-pela tampe kunaidbal, tule-tummagan-e-mosmal tegin chowal-ibgan cho ogasmal. Tegin tule-tummagan-e-mosmal chowanonimalzhun. Tegin Pedro we tulemalbak mes chowanonimo.

Anás Jesúsga igal-itojad(Mateo 26:59-66; Marcos 14:55-64; Lucas 22:66-71)

19Tegin tule-irwal-Pabzhe-kolmalad-pul-tummad-Anás Jesúszhe, e-chapingan-ekichial. Tegin Anás Jesúszhe ekichialbal: “¿Pe igi aga pe-chapingan-oturdanaibaldé?”

20Tegin Jesús tule-tummad-Anásga chogal:

—Imi antin tulemalga pel-kwapa inniki-inniki chunmadi-kus. Tegin Judiomal ampagunonimalal, an keg-chulgu Judio-ormaked-neggin tegin Pabzhe-koled-neggin tulemal-oturdadi-kusbal. Tenal antin otukal kwen chunmaszhul-kus.

21¿Tede pe ibiga anche ekisdé? Imi pe tule-an-itosmaladzhe pe ekisdo. Tenal we tulemal an-wismal, an igi chunmadi-kus.

22Tegin Jesús Anásga pél chunmasgu, chowal-ibed-walgwen-Jesús-abir-kwichid Jesús-wagal ebios. Tegin we chulub Jesúsga chogal:

—¿Ibiga pe weob tule-irwal-Pabzhe-kolmalad-pul-tummad-abinchus-wede? Imi pe tule-irwal-Pabzhe-koled-pul-tummadga pe kaka-kochadyob igal kwen maichul.

23Tegin Jesús tule-e-wagal-ebiojadga chogal:

—Imi an tule-tummadga istar chunmajal, anka pe chogdo, an igidgin istar chunmas. Tenal an istar kwen chunmaszhul. ¿Tede ibiga pe an-ebiosdé? Weobdin ib-nuedzhul.

24Tegin Anás chunkal-kugmakal tule-irwal-Pabzhe-kolmalad-pul-tummad-Caifászhe Jesús-palmis.

Pedro kannan Jesúsgin chogzhagusbalid: “Antin Jesús-kwen-wichul”(Mateo 26:71-75; Marcos 14:69-72; Lucas 22:58-62)

25Tegin Simón-Pedro ampa chowajiidgin, tule-walgwen Pedroje ekichial:

—¿Imi pe tule-kalejad-e-chapinmojulzhí?

Tegin Pedro chogal:

—Chulá. An we tule-kalejad-e-chapin-chuli.

26Tegin tule-irwal-Pabzhe-kolmalad-pul-tummad-e-mos, Pedro-tarbi-chuchu-chikchad-e-kwenad Pedroje ekichialmo:

—¿Imi an pe-takchamojulzhí, pe tule-kalejadbak immal-chalgan-naidgin pe kudimo?

27Tegin Pedro kannan chogalbal:

—Chulá. An we tule-kalejad-e-chapin-chul.

Tegidgin kallin-mastad kep namanonijun.

Pilato Jesúsga igal-itojad(Mateo 27:11-26; Marcos 15:1-15; Lucas 23:1-5, 13-25)

28Imi tule-tummagan Caifás-neggin Jesúsga igal-itosgu, Judiomal Romano-gobernador-negzhe Jesús-chesmal, Jesúsga igal-itogal. Tenal teun, neg wakur-wakur. Al Judio-tummagan melle igal-mamikidgin iskugal tegin Judio-tummagan akalzhul Pab-Najad-Itogedgin mas kunmalgal, gobernador-negzhe kwen togzhajulmal.

29Tenal Judio-tummagan gobernador-negzhe togzhajulidbal, Gobernador-Pilato tule-tummagan-pukwadzhe nononijun. Tegin Pilato Judio-tummaganzhe ekichial:

—¿Ibiga pe anka we tule-tuktidanimal-wede?

30Tegin Judio-tummagan Pilatoga chogalmal:

—Imi we tule, tule-nuedilen, anmal peje we tule-kwen-cheinonijulin.

31Tegin Pilato Judio-tummaganga chogalzhun:

—¿Teobí? Tegil pe we tule-chedmaldo, pe-igal-mamikidbal igal-itogal.

Tegin Judio-tummagan Pilatoga chogalmalbal:

—Pe anmalga nabir chogendo, tenal anmal yabli igal-kwen-nikchul tule-iskana-mesgal.

32Imi Jesús akpene chogzhagusdo, e-purkoedgin ega igi kunoniko. Tenal Jesús-chogzhad-yopí Jesúsga kunoni.

33Tegin Pilato e-negzhe kannan togzhagu, Jesúszhe kocha. Tegin Pilato Jesúszhe ekichial:

—¿Imi pede, Judiomal-erreyzhí?

34Tegin Jesús Pilatoga chogal:

—¿Pe aga tukin aga onos an Judio-errey, o tule-pid pega chogzha?

35Tegin Pilato Jesúsga chogal:

—¿Ante Judio-tulejí, an we immalmalgin yolegal? Chulá. Imi pe-tule-irwal-Pabzhe-kolmalad-e-tummagan tegin pe-tulemal anche pe-cheinonimal.

Tegin Pilato Jesúszhe ekichialbal:

—¿Tede pe ibi akaloszhun?

36Tegin Jesús Pilatoga chogal:

—An immal kwen akaloszhul. Tenal an tule-tummadyob an neg-takchido, tenal an iti-napkingajul. Tenal an tule-tummadyob iti-napkinga neg-takmailen, an-mosmal anka pila-onosmalan, Judiomal melle an-kagal. Imidin an-chapingan pila-kwen-onoszhulmal. Tenal an tule-tummadyob neg-takmaid iti-napkinedgajul.

37Tegin Pilato Jesúsga chogal:

—¿Tegil pe Erreydé?

Tegin Jesús Pilatoga chogal:

—Teobdo, an erreydo. Imi an mimmiles erreyga kugal. Tenal an iti-napche noni, igal-chunchunnadgin chunmagal. Tegin tulemal-igal-chunchunnadzhikmalad-pel-kwapa mag an-itosmal.

38Tegin Pilato Jesúsga chogal:

—¿Ibi igaldin, igal-chunchunnaddé? Pinche pe chunmama.

Tegin Pilato pél Jesúszhe immal ekichisgu, kannan Judiomal-pukwadzhe magadbal nosbal. Tegin Pilato Jesúsgin Judiomalga chogal:

—Imi pe we tulegin chogzhamaldo immal akalos. Tenal an we tuleje immal ekichisgu, an we tulegin immal-akalojad kwen onoszhul-kus.

39Imi pemalga kusgu igal mai-choggu Pab-Najad-Itogedgin tule-oturdalemaid-walgwen onoenab, al an wisgubi, ¿pe igi peimal, an we Judiomal-errey-onogo o chul?

40Tegin Judiomal sapejul kolmakalmal chogalmal:

—¡Pe melle we tule onogo! ¡Barrabásdin pe anmalga onogo!

Tenal Barrabásdin, kantikidgin-tulemalgin-immal-aturzheed-tule.